¹ Ko bun bis li mo ni nki? Bis lili luun mu izing mu nked a masum mu mpil ne lizol li to lifhun? ² Kid kobun we nsil! Bis ba lifhu mu masum,isi nki bis li bud zing fudu mu masum? ³ Bini li yeb we ne mu mpil yi ba libotik bis mu Yesu Klistu,ba li bwetik si mu lifhu li nde? ⁴ Mu nzil ye mbotik,bis ba li dji andi nde mu lifhu li nde,mu mpil ne bun bo futumuk nde mu lifhu mu ngol ye Tad Nziem,bis si li kwi mu iluun mu lizing le mpa. ⁵ Munda kid ne bis li ke mu imvuk ba lini tswal mu lifhu li nde,li tu kal mu imvuk andi nde mu li futumuk li nde. ⁶ Bis li yeb ne mud a bis ba mukwem ya nkulunsi andi nde,mu mpil ne nud ye masum i fha mu nud ne bis li kaan mu ibud luun nzil ye masum. ⁷ Munda wun wo fhi,a kyi mu masum mo maso. ⁸ Kid ne bis bu li fhi andi Klistu,bis likwikil ne tsu li zing si andi nde. ⁹ Bis li yeb ne Klistu afutumuk ku lifhu,abud fha we,lifhu si li bud kal we andi ngol ko kel nde. ¹⁰ Munda nde bo fhi,itsin masum nde afhi mu mbal mo; si nde akel mu lizing,azighe mu ngol ye Nziem. ¹¹ Bini si ifa imo,tel lili ke li bi tala amon ne baba fhi mu masum,si tel li nkim amon ne baba zighe mu Nzieme andi Klistu. ¹² Itsin kio kin,li kaan iwa masum nzil ne ma libial mu ma nud ba bini mama fha,mu mpil ne bini li lemfuk mu lizol le nud. ¹³ Li wa we bitshul be nud a bini mu biselel mu ma nzal ma tumo nud mu isal,si li biwa bini ba ngako ku kel Nziem amon ne bad ba kel mu izing,bun bu likele ne lifhi ani bi tshil be nud a bini amon ne biselel be masong ma Nziem. ¹⁴ Li kaan mu iwa masum nzil ne ma libial,munda bini li bud kal we ku nsi ye mansik si ku nsi ye likum le Nziem ¹⁵ Nki kobun? Li sala masum munda li win kal ku nsi ye ma nsik,si ku nsi ye lukum? Lo nsil. ¹⁶ Bini li yeb we ne nde wun wu li bi wa bini amon ne mud a isal munda iku mulemfuk,bini li kel bad ba isal ba wun wu li lemfukile bini,ikala mu masum man ma litswala ku lifhu,ikala mu ilemfuk le tswala mu nzil ye masong. ¹⁷ Si likum li kal ko kel Nziem! Munda bini li kele ba mpik ba masum,si bini ya li kisi mu mukol mu mo mu malong ma liwel bini. ¹⁸ Bini ba li kiele mu masum,bini ya li twe ba mpik ba masong. ¹⁹ Me nkel mu imo amon mud itsin yuun le nud a bini.Ifa imo,bun bu li wi bini bi tshil be nud a bini amon ba mpik ba masum ani ma manda ma bi,si tel li,li wa bitshul be nud bini amon ne ba mpik ba masong ani ba lusakumun. ²⁰ Munda tel li kele bini ba mpik ba masum,bini li kele mu pii ku nkul a masong. ²¹ Nki mbud bini li bwid mu bilo bin be ntam bi likid bini munda mu iyu nswen tel li? munda lifud le bilo bin li kel lifhu. ²² Si tel li bu ba li kiele bini mu masum,bini li kel ba mpik ba Nziem,lifud li bini li kel lisakumun ani izwa ke bini ikel lizing le mvul ani mvul. ²³ Munda lifud li masum li kel lifhu si kab li nkaam le Nziem,li kel lizing le mvul ani mvul mu Yesu Klistu Mfum a bis.