¹ Munda ne bis ba lisemes ikwil mu likwikil,li kel mu ngemb andi Nziem mu nzil ye mfum a bis Yesu Klistu. ² Mu nzil a nde,bis si li wel kab li bis mu nzil ye likwikil,mu dieng liso lin lili kel a lo,bis li kal mu issem bun bu li nem bis mu likum le Nziem. ³ Ya nghe ko yan,bis li kel mu issem mu minia mu iyab ku ibwed minia mu budo ikas mbwun. ⁴ Ikas mbwun ibudo iyukan, iyukan ibud likwikil. ⁵ Likwikil li fudo we munda lizol li Nziem ba liyemen mu ma mbwun ma bis mu nzil ye mpev santu yi ba liwi ko kel bis. ⁶ Munda tel li kele bis ba yu-yunu,Klistu bo fhi mu tel li kuu itsin bad ban baba wun sama. ⁷ Munda tel li ba kwi mu ifha munda mud wu kel imbe-imbe, mud kuu mu ikisi mu ifha munda mud wun wo sala ma mbwed. ⁸ Si Nziem aswi lizol li nde ku kel bis,munda Klistu afhi munda bis tel li kele bis bad ba masum. ⁹ Mu imo ku ibwed,tel li bis ba lisemes mu makil ma nde,li guluk mu nkwum a nde mu mpud ye Nziem. ¹⁰ Munda tel li kele bis mu imbeen,bis li kele mu iyukan andi Nziem mu nzil ye lifhu le mwaan a nde, mbal kwe fudu,ne ku ngwel ye iyukan kin,li kal ba guguluk mu nzil ye lizing li nde. ¹¹ Kel we ne na yo yin,si bis li bi wa si likum ku kel Nziem mu nzil ye mfum a bis Yesu Klistu,mu nzil ye nde,bis lili kwed tel li mu iyukan. ¹² Kobun,bun bo kwed lisum mu mukil mu nzil ye mud mu mo,iko bun si bo kwed lifhu mu nzil ye masum. ¹³ Ikobun si lifhu ya li kwed mu mud nde so,ku kel bo baso ban baba sel masum. Munda ti ma ku ma nsik,masum ma kele mu mukil,si masum ma kele we ne ma wa bilud ku nsik. ¹⁴ Mu kio kin,lifhu li liliel mpu ba ku Adam ti mu tel le Moyize, ani ku nkul,ban baba win sal masum mu idus amon ne mu tel le Adam,nde wun wu kel mbwis ye wun wu feen mu iya. ¹⁵ Si kobun,ikel we lifud le nkaam amon ne ikel ifhu. Kid ne,mu nzil ye ifhu ke mud mu mo,ba fhun ba fhi,mbal kwe lizol li Nziem ani kab lili fa mu lizol le mud mu mo,Yesu Klistu,mama lwid binen ma ba mwel ko kel bad bo baso. ¹⁶ Ikel we kio munda kab bun bu liyi mu nzil ye mud mu mo wun wo sel lisum,munda nto likwe, ku ngwel a mabi mama mud mu mo,isemes li itwe itsid nkan,nto ye mo,kab li nkaam lili fa mu isemes,li kel lifud le manda ma bi ma fhun. ¹⁷ Kid ne manda ma bi ma mud mu mo,lifhu li bial mpu na mu lo ngako,mbal kwe ban baba wolo mama lwidil mu dieng ani mu kab le masong ba bial mpu mu lizing mu nzil ye Yesu Klistu nde ngako. ¹⁸ Kobun si,bun bu kel mu mbi ye mud mu mo,bad bo baso ba twe bad ba masum,ifa imo bun bo ya mu isal imo ke masong,kwi mu iya masong ma isemes ke wa lizing ko kel bad bo baso. ¹⁹ Amon neikolam ke mud mu mo,bad bo baso ba twe bad ba masum,ifa imo si mu ilemfuk ke mud mu mo,bad bo baso ba basisemes. ²⁰ Kyi nsik iyi munda ne likwikil li to li fhun,si yan ya kel masum ma fhun,lizol li lwidil mutel. ²¹ Mio mi mi twe mu mpil ne bun bo biel masum mpu mu lifhu,lizol li bial mu nzil ye masong munda lizing le mvul andi mvul mu Yesu Klistu mfum a bis.