¹ Mfum a ba kwud wo ba nga-Nziem le mwe ne:" Bilo bi, bikel be ibini?" " ² Etienne le fidil ne:" Bakuun ani ba tad, li nzwil me: Nziem wo likum wun wo yi tswu ku kel Abalayam tad a bis le kele nde ku Masapotami ku nkul a ku kal nde ku Chalan; Le mu liel ne: ³ Kyi mu ntod a nze ani baba nze, kwe ku ntod yin ye isuu me." ⁴ Kobun nde le kyi ku ntod ye ba Chaldeen le fi kal ku Chalan. Iko kun, ku ngwel a lifhu le tad a nde, Nziem le mutswel ku ntod yin, ku likal bini tel li: ⁵ Nde a muwi we nto ilo imo, ansa ke kwi nde mu ishil makol. Si le mukenes, kyi Abalayam akele we andi mwaan wu kwi mu iku mu wa ntod yin amon ne ilo inde ngako, mu iluum ti ku kel ba tshili ba nde. ⁶ Nziem le mu liel kobun, ne mutshil a nde azing mu tel limo kobunu mu maan ma inzis, bad baba kel mu maan man, ba mu fudul mpik ani mu iku muniokol mu ites ke ba mvul minkam mi na. ⁷ Me asi-semes kaan lin, lili kel ne, mu komun mu ba kal bo ba mpik, bu mwe Nziem, ani ku ngwel a mio min, bo ba ku kwe ani iku mfukam ku nkel me mu mbel aso yi." ⁸ Nde le wi ku kel Abalayam iyukan ke itsid, kobun, Abalayam le twe tad wo Izac ani iku mutsid mu tsu le naan, Izac twe tad wo Jacob, Jacob le twe tad wo ba nka kwim a bwel. ⁹ Ba nka ban, li ba mukes imbeen ku kel zozef, li ba mutee munda ba mutswal ku Engipit, Nziem akele andi nde. ¹⁰ Nde le musi makuu mu minia mi nde, le mu seles ani mu maken ku nkul ye Falaon, mfum wo Engipit. Falaon le mu si mfumwo itswil i maan ma Engipit anki mu nzo nde yo iso. ¹¹ Ko bun, nzal ani munia wo ngol li bi kwed mu ntod yo iso ye Engipit ani ye Canaa; Ani ba tad ba bis, ba kele we andi bilo be idia. ¹² Si tel aywi Jacob ne ikel ani mfwus ye masel ku Engipit, le twim ba tad ba bis mu mbal ye isso. ¹³ Mu mbal ye ywel, Zozef le biswi ku kel ba kwun ba nde, Falaon le iyab kaan le Zozef. ¹⁴ Zozef le twim ba kuun ba nde mu iku liel Jacob tad a nde, mu iya ku Engipit ani kaan li nde lo liso,: bad linsamwel ani ba taan mu invuk. ¹⁵ Bun iko bun Jacob le kimin ku Engipit. Ku ngwele, nde ngako le yi fha ani ba tad ba bis. ¹⁶ Li ba batswel ku Sichem, li ba fi kod ku mampiem ma shwim Abalayam mu nzim ku kel baan ba Hamol ku Sichem. ¹⁷ Tel atwe ya nto-nto ikan kin ke ken Nziem ku kel Abalayam, bad ban li ba twe ba fhun li ba bwid ku Engipit, ¹⁸ Ti kun ko yi bial mfum wun wo wun muyab Zozef . ¹⁹ Mfum nde wun le fhid bad ani iniokol ba tad ba bis ti ku ba fi til bo bwa baan ba bo baba bwid mu mpil ne ba kaan ibud zing. ²⁰ Moyize ba mu bwid mu ina iso kin. Akele wu mubwed ku madis ma Nziem ani iku mu bwol ba ngween ba tud mu nzo ye tad a nde. ²¹ Tel ba muyesel nde, kaan le Falaon li ba mu wel andi iku mu bwol amon ne mwaan wo bo ba ngako. ²² Moyize ba mu lweng mu mayel mo maso ma bad ba Engipit; Nde akele ngol mu imo inde ani mu bisal bi nde. ²³ Tel a twe nde andi ites ki ba mvul ba na, ngûn le mu yil mu iku tal ba kuun ba nde, baan ba Isayel. ²⁴ Le mwen mwaan a Isayel ba mu niokol, Moyize le fi mukwedel mu inwan andi mbeen wun wo Engipit mu iku mu bed. ²⁵ Nde le ayebe ne, mukuun a nde ayi yab mu nzil ye kuu li nde, Nziem ayi ya mu iku museles, si bo ba yebe we. ²⁶ Tsu lili lwin, le yi nto akele baan ba Isayel ba mo ba ba tedene; Nde le mek mu iku ba vuu; Le mwe ne:" Ba tad, bini li kel ba kuun, munda nki bini li kel mu iku bikid ku ibi? ²⁷ Si wun wo kid ku ibi ku kel mukuun a nde le mu shini ani imo ne:" Na isi mfum zusi ku kel bis? ²⁸ Nze zwel mu indus bun bo dwis nze mud wo Engipit matsi?" ²⁹ Ku ngwel a iywil mio miso min, Moyize le bed, le twe munzis mu ntod ye Madian, ko bwid nde baan bwel, ³⁰ Ku ngwel a ba mvul makwim ma na, wanzio mumo le yi mutswil mu nse-nkaam ku mubyi wo Sanay, mu nked a lilim li mbaa. ³¹ Moyize le mwen mbaa, le yituk mu imon kobun, tel ayi baam nde mu ital, nda ye mfum li itswi, imo ne:" ³² Me nkel Nziem wo ba tad ba nze, Nziem wo Abalayam, wo Izac ani wo Jacob." Moyize le tswil, akwi we mu iseen madis. ³³ Mfum le mu liel ne:" Kiele ma sapad ma nze, munda mbel kel nze yin, ikel mbel ye santu. ³⁴ Me amwen ku ibini minia me bad ba me baba kel ku Engipit. Me aywil bilil bi bo, me inkimin munda iku ba kiele mu minia. Tel li, kwe me itwim ku Engipit" ³⁵ Moyize wun wu wu ba til bo-bwa, tel a mwe nde ne:" Na wun wo isi mfum to zusi?" Akel wun wo twim Nziem amon mfum ani wo ya kwul bad. Nziem a mu twim mu nzil ye kuuli wanzio wo yi tswu ku kel Moyize mu nked a bitsid. ³⁶ Moyize le ba tisil ku Engipit, ku ngwel ye isal bidiim ani bimang ku Engipit ani ku nzel a mungwa wo beel ani ku nse-nkaam ba mvul makwim ma na. ³⁷ Moyize nde wun mumo wo liel ku kel bad ba Isayel ne:" Nziem ati-tisil mbikud mumo mu nked a bakwim ba bini, wo kal amon ne me. ³⁸ Ikel mud aso wun, wo kele ya nked a ibwil, mu nse-nkam andi wanzio wo mwe ya ngie mubyi wo Sinay. Mud aso wun wo kele andi ba tad ba bis, nde wun wo wel manda ma lizing munda iku ba liel man mo maso. ³⁹ Ikel mud aso wun wo mee ba tad ba bis mu iku mu lemfuk; Bo li ba mufidil, si mu mikol mi bo li mi fidi ku Engipit. ⁴⁰ Mu tel liso lin, bo li ba liel ku kel Aloni," li kidil ba nziem ba ba li tsweles bis. Munda Moyize aso wu,wo litis ku Engipit, li yeb we nki bi mu lee." ⁴¹ Ako yan, bo li ba wel mwaan a limem, li ba muwi kab ku itek, li ba sem itsin isal ke makuu ma bo. ⁴² Si Nziem le ba wi mukud, le ba wi mu isaam ba mpul-mwed ba yul; bun bu ba swen mu mukaan wo ba mbikudi ne:" Bini bu li ngwi ba niam ba ba tsid miwil ani ingwa makab mu ba mvul ba Isayel? ⁴³ Bini ake li kisi(nzo nziem)ye Moloch, ani mpul-mwed wo Nziem a lamfan, bifanus bi lisel bini munda iku bisan. Me a li tswal si ilud Babilon." ⁴⁴ Ba tad ba bis bu ba zwi(nzo nziem ye ita imbang mu nked a nse-nkaam, bun bo mu twim Nziem tel a mwe nde ku kel Moyize, ne nde aku yili mu mpil ye mwen nde. ⁴⁵ Inzi-nzo afe tswala ba tad ba bis, mu ba fe kwe bo, mu ma ntod mankim andi Josue. Manda man ma bwi tel ba wel bo ntod ye bad ban ba byi Nziem ku nkul iya ke ba tad ba bis ikele kobun ti imfum ke David. ⁴⁶ Wo zwi liseles ku kel Nziem , wo lwim ne ba tswu nzo munda Nziem wo Jacob. ⁴⁷ Si Salomon le tswi nzo munda Nziem. ⁴⁸ Tel lo liso, Nziem a zinghe we mu manzo ma ba tswi mu makuu; bun bo mwe mbikudi. ⁴⁹ Yul li kel kid i me ke imfum, maan ma kel ilo ke shile me makol. Nki mutshin a nzo bini li ntswil ku nkel me? Bo mwe mfum" Ayo mbel a me ye iwum? ⁵⁰ Kel we ne kuu li me lili kide bilo bi bio biso?" ⁵¹ Bad ba mutswe ngol, baba wun tsid mukol ani matswe, bini li sa mia ti li ku kel mpev a santu;Bini li kid bun bo kid ba tad ba bini. ⁵² Nki nde mu nked a ba mbikudi, wo wun niokol ba tad ba bini? Bu ba dwis ba mbikudi ban baba yi ku nkul a Yesu; Si kel li, bini si ya li twe ba nga bili-liel ku kel nde ani iku mudus. ⁵³ Bini ba lizwi ngil yin ye si ba wanzio, si bini li ishim we. ⁵⁴ Tel a ywi ba kwud ba bila manda man, mikol ya mi lweel ani idia madjin munda Etienne. ⁵⁵ Si nde, mpev a Nziem imu biel, le mwen likum le Nziem. Le mwen Yesu a tswid ku kuu le itad le Nziem. ⁵⁶ Etienne le mwe ne:" Tal, me mwen ma yul ba fiele, mwaan a mud a tswid mu kuu le itad li Nziem." ⁵⁷ Si ibwil ke ba kwud li ba ti milaal me ngol, li ba ba kes matswe, ba ko mu she bo baso. ⁵⁸ Li ba mulwim ku mpili ye bila, li ba mudwis mu mankuun: Ba mbang li ba fisa munsi biko bi nde ku makol ma Saul. ⁵⁹ Tel ba dwis bo Etienne mu mankuun, nde le seem Nziem a mo ne:" Mfum Yesu, wol mwe me." ⁶⁰ Nde le fukam, le ti milaal mu nda ye ngol: " Mfum, nze aba wa we bilud be masum ma si ba lolul . Ku ngwel a imo mio min nde yan a fhi."