¹ Kobun Aglippa le liel Pol ne:" Nze ku mu imo munda nze ngako." Pol le seen kuu linde, le bed: ² "Me abi mono mu isse mfum Aglippa, mu ku iliel manda ma me non-bu ku kel mifuun mio miso me ba yuda; ³ Munda nze bud kal ngol nsil mu mifwul, ani mu manda ma ba nkaa mama tel ba yuda. Kobun me li bwim ne li nzwil ani mukol wo lizil mu manda li liel me mo. ⁴ Ba yuda bo baso ba yeb sa fa bikû bi me, isi nki me nzing mu ntod ye me ngako ani ku Yelusalem. ⁵ Bo ba nzieb sa fa ku itsin, ba ki kisi ne me azinghe amon ne mumfadisi, Me kel mu libud limo ani bo. ⁶ Tel li me nkel ya munda ba nsemes munda me nkel mu isa likan le mfum Nziem le sel nde ku kel ba tad ba bis. ⁷ Munda lo li kel likan le makaan ma bis kwim a mwel ma ba si itswel mu iwol bun bu ba seme bo ku ibini-ibini mpyib ani mwil. Mu likwikil lin, mfum Aglippa wo fwine ba yuda. ⁸ Munda nki nto mumo we mu nked a bini a man tiemen we ikel ibini munda Nziem mu iwisul ban baba fhi? ⁹ Mu tel limo, me atiemen me ngako me ninsal bilo bi fhun ku kel nkwum ye Yesu klistu wo Nazalet. ¹⁰ Me bo bisel ku Yelusalem, me bo si ba klistu ba fhun mu bolok mu ikwud ke wel me ku kel mfum wo mukwud a ba nga-Nziem, ani tel ba dwis nde, me akele mu ibwil imo andi bo. ¹¹ Me bo bawi ndol mbal a fhun mu manzo ma Nziem ma maso, me bo mek mu iku ba tum mu ngol ne ba tuu Nziem. Me akele mu mpud ye ngol ku kel bo, me ya ba niokol nto mu mambe nkim. ¹² Tel a kide me manda ma, me awine ku Damas andi ikwud, ani mu itum mu ngol ke ba mfum ba nga-Nziem. ¹³ Mu nzil, mu nked a mwil, mfum, me le mwen mwin wo fi ku yul aghel ilud mwil, a lieme munkwa me ani ku kel bad baba wine nzil mo andi me. ¹⁴ Tel li bwi bis baso mu nsi, me li nzwil nda mo yi ndiel mu munwa wo ba Heblayic ne:" Saul, Saul munda nki nze kel mu iniokol me? Ikal mpas munda nze mu ibed bad ya ngie nswe a mbiel." ¹⁵ Me li mwe ne:" Nze kel na, mfum? Mfum le fidil ne:" Me nkel Yesu wun wo niokolo nze. ¹⁶ Tel li tsud, fukam, munda, itsin kio ki me yi ghan ku kel nze mu ku isa mu ikal mud a isal ani mbang wo tel bilo bin yeb nze ku kel me ani bilo be issu me ku nkul. ¹⁷ Me igu-gulus ku kel bad ani ba mimpan kun ko itum me. ¹⁸ Munda ifiele madis ma bo, ani iku ba kiele mu lipyib, mu iku ba sa mu mwil, mu ngol ye satana mu iku ba sa ngol ye Nziem, mu mpil ne ba zwa ndolul ye masum ku kel Nziem ani imvwam ke ba wa me, ku kel ban ba sa me mu liwuu mu nzil ye likwikil li me." ¹⁹ Akoyan, mfum Aglippa me abud kolam we mu mpev ye yul. ²⁰ Si ayiso ku kel bad ba Damas, ku ngwel ba Yelusalem ti mu ma nto ma nto ma Yudee lo liso, ani ku kel ba mimpan si, me bo lweng ne bo ba sob ma mbwun ba tad ku kel Nziem, ba sal bisal bi bwed be ibaman mbwun. ²¹ Itsin kio kin ba yuda ba nkwed mu nked a nzoNziem ani imek mu indus. ²² Nziem le nseles ti tel li, munda me nkel wo tsu-tsud ani ita imbang ku kel ba kû ani ba kwud mu manda ma tel man ma mwe ba mbikudi andi Miyize ba liel ne mi yi ya. ²³ Klistu ani-niokam, akal mud wo iso mu ifutumuk ku lifhu, ani mu ikab nsia mbwed ku kel ba yuda ani ku kel ba mimpan." ²⁴ Bun bo nwene Pol, Festus le mwe mu nda ye ngol:" Pol nze kel mu biel a mishu, maken ma nze mama lwidil li ma ita mishu." ²⁵ Si Pol le mwe ne:" Me nkel we mubiel a mishu, nze Fzstus wu lwidil mayel, si mu inkes kio iso, me a mwe manda ma ibini, iwene lileen. ²⁶ Munda mfum yeb mama tel bilo bi kobun me mu liel mu bike-bike bio biso, Munda me akisi ne nto mud mumo we wu ba swele, munda bo ba kid we nto ilo imo mu insi-nswi. ²⁷ Mfum ntod Aglippa, nze aka kwikil ku kel ba mbikud? Me nzieb ne nze ka kwikil." ²⁸ Aglippa le liel ku kel Pol ne:" Nze kwi mu inkisi mutel litshi ani mu inkidil mu klistu?" ²⁹ Pol le liel ne:" Me sama Nziem, ikala mu tel litshi to lifhun, kid na bin we, ani bo baso baba nzwile me, non-bu si, bo ba to amon-ne me, ikwen iku ba kas minot mi bolok. ³⁰ Tel li twe akoyan, Mfum a ntod le tswid, mfum a itshul imaan ani Belenice si ani bad bo baso baba kele andi bo; ³¹ Tel ba shis nzo yin, bo li ba mwe ban ani ban, le ba liel ne:" Munda wu akid we nto ilo imo, munda ne ba mu dus to ba mu kwad mu bolok." ³² Aglippa ne liel ku kel Festus ne:" Mud wu, ba kwi mu iku mu yese, kid ne nde akele a mu liel we ku kel Cayisaal."