¹ Paul le tel mpenza munked abad ba ibwil inene ke ba yud, si nde le mwen ne:" Ba kunu mbwun ami iya mfun we. Mi azingi mu bifu mbwed ku madis ma Nziem ani mu nanbu." ² Si Ananias, mfum wo banga ba Nziem le sui bad ban ba bakele mu nkwa a Paul mu iku mu bed ku munwa. ³ Si Paul le mulili ne: Nziem ayi bed nzi, nzi mwud wo bimpal! nzi aya semes bun bo mo ma ngil, si nzi nga ko aya dus mangil , tel le ya ba su nzi mu imbed ku nkel mi!" ⁴ Bad baba kele mu nkwa Paul li ba mulili ne:" Nzi ya twi mfum wo banga ba Nziem?" ⁵ Paul ne:" Ba kunu mi djebe we ne nde akel mfum wo banga ba Nziem munda bu ba swen mu mukaan wo Nziem ne:" Nzi kwi we mu imo manda ma bi ku kel mfum wo bad ba nzi.">> ⁶ Paul bo yeb ne bad baba nde munked abo ba kele ba sadis ba banke ba Falisi, mi nkel mwaan wo mu falis. Bini li ya nsemesi mi munda mi aya sa mbwun ne bad ba thitswud mu lifu. ⁷ Nde le mwe ikobun, mia mi ngol limi bwi munked ye ba falis ani ba sadus, si bad man ba bakele mu ibwil li ba kebwan. ⁸ (Munda basadus ba mone bad ban baba fhi ba bud wusu we mu li fhu. Si ba falisi bu ba kise manda man mo maso.) ⁹ Lisu li ngol lili bwi si balong banke ba ma ngil ban baba kel ba falize, li ba tswid munda isa mia mingol ne:" Bisi li mwene we manda mama bi munda mwud wu. Zuk mpev to wanzio amu lile manda?" ¹⁰ Mia li mi yi mifunu, si mfum a ba suda le ywi bumu ne: tel manke li ba mutini Paul bitswil bitswil lo lini nde le swi ba suda mu iya kimini mu ikiele Paul munked abad ani mu iku mu twal diak ku nzo ye ba suda. ¹¹ Mu tsu lili lwini mu mpyib Yesu le ya ngha ku kel Paul, nde le mulil ne:" Kal ani ngol! mu mpil mwel nzi nsia mi ya Yeluzalem, ikobun si bo kumon nzi nsia yini ku bila bi Loma." ¹² Mu ipel ipel, ba yud li ba kene manda mabi munda Paul. Li basi lisil li mo ne: bisi li dia we, bisi li nwa we, kane bisi li mu dwisi we Paul a buu. ¹³ Ban baba kene manda man bakel bad (40)ma mkwim mana nkud ilud tal yini. ¹⁴ Li basi lili ba mfum ba banga ba Nziem ani ba kwud ba nke ne:" Bisi lisi lisili limo ne bisi li dia we linwa we,kane bisi li mudwis we Paul abuu. ¹⁵ Tel li bini ani bad bo baso ba ibwil ki nene ki ba yud, bini litum bad mu iku mulil mfum (komanda) ne nde a feen mu iya mutswal Paul ya li kele bis, iyab ne bini li zwele ita manda manda diak, ku ibwed ibwed. Si bis, bis li yilam mu iku mudus mutel le kele nde atwe we abuu ya." ¹⁶ Si mwaan ankel la Paul le ywi lisili line, nde le mulili Paul. ¹⁷ Paul le yeme mfum mu mo wo ba suda, si nde le mulili ne:" Mutswal mwaan bal wu ku kel mfum wo ba suda (komanda) nde akele ani manda ma iku mulili." ¹⁸ Mfum wo ba suda le mutswel ku kel komandaa si nde le mwe ne:" Paul mud wun wokel mubolok, nde ngiemen. Nde ya mbwene mu iya mutswal mwaan bala wu ku kel nzi munda nde akel ani manda ma iku ilili ku kel nzi." ¹⁹ Komanda le shim mwaan wun mukuu, nde le mutswel mbel mo a bo bwil si nde le mufwil ne:" Nkii manda?" ²⁰ Nde le fidil ne:" Ba yud ba yukan mu iya ku kel nzi mu iku iful nzi mu itswal Paul mbel ku nkul ye ibwil ki nene ki ba yud iyab ne ba ya zolo ital ku ibwed ibwed manda mande. ²¹ Si ibakisi we, munda bad makwin a mana nkud ilud ntal yini ba si sweme munda mu iku muzele nde. Bo basi lisili limo ne:"Bo ba dia we ba nwa si we, kane bo ba mudwis we abuu Paul si tel li bo bakele ba yiyilam, ba ya zele ne na nzi kisi matiemen mabo." ²² Komanda le mulil ne imo we nto ku kel mud mumo ne:" Nzi andil mi manda ma. Si nde ya mu yese mu ikwe." ²³ Tel li komanda le yemen ba mfum bwil ba ba suda si nde le ba lili bini li wolo ba suda nkam wil ban ba bakwe ku mangwil ku makol ani ba suda ma kwim nsamwel baba kwe ange ba mpud ani ba suda nkam ywil baba kwe ani makonga bakal ba yi yilam mu tel le lipyib munda bo ba kwe ku bila be Sezalea." ²⁴ Bini li yidi si ba mpund ku ibwe ibwe munda mu itswal Paul, mfum wo ntod Felikis. ²⁵ Komanda le swene mukaan ne: " ²⁶ Mi klode Lyziasi aya itwimisi nzi Felikis mbwed. ²⁷ Mud wu ba kwed ba yud ba zwele ne ba mudus. Si mi ngwii ne nde akele mwaan ngaa bila ku imfum ke Loma (Roma) lo lini mi awini ani ba suda mu iku mu wol ku ma kuu ma bo. ²⁸ Mi zwel mu iyab isi nki bad ba ya mu funu ku kele nde. Lolini mi li mutswel ku misi(ku nkul) ye ibwil inene ke ba yud. ²⁹ Mi mwen ne ba mu fine munda manda moma mama tel mangil mabo. Si me mwen we itsin ke manda man ma nfeen mi mu iku mu dus kalo imusa bolok. ³⁰ Mud mumo bondil ne ba yud ba kene manda mabi munda mud wu. Lo lini mi li mutwim ku kel nzi, mi ndil bad ban baba ya mu funu ne ba ya mu funu ku misi mi nzi!" ³¹ Ba suda ba bakwe bitumu ku makol ba sele mpil yi baba swi bo, li ba kumu wol Paul, si anked a nked ye mpyib li ba si mushisi kubila bimo Antipatlisi. ³² Mu tsuu lili lwini li ba yese ba suda ban baba kwe ange ba mpund mu ikwe ani Paul, si bo bangako liba fidi ku manzo mabo ³³ Teli ba twe ba suda ban baba tswala ba mpund li ba ya to ku kel Sezolea, li bawi mu kane wun ku kel mfum wo ya tal itwil iman (guvernere) si li ba wi Paul ku ma kuu mande. ³⁴ Tel le tesi mfumu wun wo tala itwil i ntod mukaan wun. Nde le fwil Paul ne nzi kele mud wo nki ntod, tel le ywi nde ne nde akele mud wo ntod ye Silisia, ³⁵ Nde le mulil ne: " Mi ayuu nzi mutel li bibaya bam baba ifini nzi." nde le swi bad mu isa Paul munzo mfum Elode ba mukeel.