¹ Kungwel iliel li iwi, Pol le yemen ba longok, le ba wi inkes. Iko bun, nde le ba wi mbwed a nsuk, le win ku Macédoine. ² Tel a fee kwe nde, mu bitswil bi ntod, nde a ko wa baklistu inkes, nde le win ku Glèce. ³ Kungwel a ngon tud iko, li bakes ifyin inkim munda ku kel ba yuda, tel li ba twe bo ku libwuu le Sylie, a koyan, nde le fidil mantiemen ku ngwel mu ifudu munzil ye Macédoine. ⁴ Munda iku mudjid tii ku Azi: Sopatel mwaan pylhus; wo Belee, Alistalque mwaan a ywel wo muklistu wo Théssalonic, Gaîllus wo Delbe, Tumthee; Tichic ani Tlofim itsin inde i bila :Azi. ⁵ Si bad ban liba bwi nkul, li ba fi lizeel ku Tloas. ⁶ Lili kes ya libwuu le Filipo, ku ngwel tsu le mampa ma taan lili fi ba baa ku Tloas. Iko kun bis li sel matsu nsamwel. ⁷ Tsu le iso le mposo, te li si vuun mbel mo mu itsid mampa, Pol le liel ku kel ba klistu. Nde bo ken ne akwe akia ipel kio kin nde alwin ilong malong ma nde ti ya nked a mpyib. ⁸ Ikele andi ba mwun ba fhun mu nzo ye itaz ku li si vuun bis. ⁹ Ya ngie neel ikele si andi mwaan baal nkwum a nde Eutichus, akel abwi ku tol li ngol, bun bo mwe Pol mu tel li lee, mwaan a mu wel, le yi bwa baa ku ikaze ke tud, li ba fi mu wol afhi. ¹⁰ Si Pol le ikimin, le leel ya ngie nde, le mubid ya ngi makuu. Le mwe ne:" Li kaan ibwa magha-maghan, nde afhi we, mwe andi nde." ¹¹ Tel a neme nde, le tsid mampa le di. Ku ngwel a imo tel li lee ti mu ipel, nde le win. ¹² Le yi mu fudul mwaan a baal andi mwe, li ba mulweng ifhun. ¹³ Munda bis, bis ya li bwi nkul, Pol mu nked a maswa, lili win ku Assos, ku li ken bis mu iku bwaan andi Pol. Iko bun bo zwel nde mu ikid munda nde bo ken me akwe mu makol. ¹⁴ Tel ayi li baa nde ku Assos, bis lili mu wel mu maswa, lili win ku Mitilen. ¹⁵ Kungwel yan, lili win, lili twe akia ipel mu ngul ye ilib ke Chios. Tsu lili lwin, lili twe mu ilib ke Samos, ku ngwel a tsu li nkim, lili win ku mbee ye Milet. ¹⁶ Bun bo ken Pol mu ilud mu nzil ye Efez, munda nde a zwele we mu ilwidis tel ku Azi munda nde a wine mana-manan mu iku to ku Yeluzalem mu tsu le Panticot kid ne nde aku-kuu. ¹⁷ Yan ya Milet nde le twim bad ku Efez mu iku yemen bakwud ba dibund. ¹⁸ Li ba twe bo ku kel nde, le ba liel ne:" Bini ba ngako li ye ne sa fa tsu le iso, le nied me makol ku Azi, mu nki mpil me a lwidis tel li me kons tel andi bini. ¹⁹ Me bo lwine isel mfum andi mukol wo muzil, andi mansia, andi minia mimi fi mu ifyin ke ba yuda. ²⁰ Bini li yeb ne, me li swûl we nto ilo imo mu bin bili kele mfun ku kel bini ani isi nki ne ali-lweng ku madis ma bad ani mu iko kwe si mu manzo-manzo. ²¹ Bini li yeb mu nki mpil me aba liele ba yuda andi ba Gelek mu min mimi tel ibaman mbwun ku nkul a Nziem ani mu likwikil ku kel mfum a bis Yesu. ²² Si tel li, tal me ya ngwin, mpev a santu a nem mu nud a me ku Yeluzalem, mu iwun yab bilo bio biso bibi ndjil ku kel me. ²³ Kiele na mpev a santu wo ndiel ku kel me ne mu ma mbee mo maso, mimiolol ani ma ngul ma nzel ku nkel me. ²⁴ Si me mwen we ne lizing li ne li lwidil ibod munki munda me man bisal bi me mu nked a liswekam bun bo zwi me ku kel Yesu klistu, munda iya ta imbang ke nsia mbwed ye lizol li Nziem. ²⁵ Si teli, li tal, me nzieb ne bine baso baba kel ne munked a bini me bo lweng imfum i Nziem, li bud mon we mbwis a me. ²⁶ Akoyan, me ya nkisi non-bu me nzieb we me nto nda mo mu makil ma mud nde muso. ²⁷ Munda me ali swil we nto ilo imo mu iku litshil lizol lo liso le Nziem. ²⁸ Kobun li bi kieb bin ba ngako ani ibwil ki mamenkin ke lishil mpev a santu mu itala. Li keb mu itweles libud le Nziem lin le zwi nde mu makil ma nde ngako. ²⁹ Me nzieb kid ne me ngwin, ba mbul ba mpud ba ku-kod mu nked bini si ba kieb we ibwil ki mamem. ³⁰ Me nzieb ne mu nked a bini, bad ba iya, ba long ma long ma ileb, munda ba tswal ba longok ku ntoye bo. ³¹ Li bi kieb bini ba ngako, li tiemen ne mu ba mvul ba tud ba, me a li yesel we mu iku lilong ani mansia mpyib ani mwil. ³² Tel li me li twim ku kel Nziem ani mu lizol le nda ye nde, yin yi kwi mu iku nuwa ngol ani iku liwa imvwam mu nked a ban bo baso ba biwi ko kel nde. ³³ Me a sa we mukol mu nzim, to mu wol, to mu biko be mud munkim. ³⁴ Bin bangako liyeb ne; makuu ma bu manseles mu bisal be me ngako ani bin bibi bad ba bakele andi me. ³⁵ Mu ilo kio iso, me ali swi nzil ne: Munked a isal mu ba feen mu isalis ban baba win ngol. Bin li ba tiemene mu manda ma mfum Yesu, man ma aliel nde ngako ne: Ikel ani lisakumun lifhun li iwa, si le iwol likel li tshi." ³⁶ Kungwel ye imo kobun, nde le bwi ku mabuu, le seem ani bo baso. ³⁷ Bo baso, li ba lil ifhun, li ba bwi mubol le Pol, le ba mukes ipa (iyam). ³⁸ Bo ba kele bo baso mungieb nsil, munda nda aliel ne: Bini li bud mon we mbwis a nde. Kunsuk, bo li ba fimu djid ku libwu, mu maswa.