¹ Ku ngwel a bilo bin, Pol le kyi ku Atene, le win ku Colinto. ² Ikokun nde le mwen yuda mu mo nkwum a nde Akilas, bila bi nde be itsin pon, yan ya yi to nde ku Itali andi mukel a nde Plicil munda Colod bo twim ne ba yuda bo baso ba kyi ku Loma munda Pol aya ko kel bo. ³ Pol azinghe, a sele andi bo munda akele isal ibo imo. Ba tswe ma nzo. ⁴ Pol a lwenghe mu nzo Nziem limeen lo liso. Nde aba we ngol ku kel ba yuda ani ba Gelek mu isama ifhun. ⁵ Si tel awin Silas ani Tumthee ku Macedoine, mpev a santu li imu twim ku kel Pol ne ata imbang ku kel ba yuda ne Yesu akele klistu. ⁶ Tel a mee ba yuda ani iku mutuu mangwum, Pol le kwimin biko bi nde le ba liel ne:" Makil ma bini ma bwa me nzieb we me manda man, tel li me kwe nto kel ba mimpan." ⁷ Mu ilud akoyan, le win ku nzo ye Titus Justus, mud mumo abede Nziem, nzo nde ikele munkwa nzo Nziem. ⁸ Clispus, mfum wo nzo Nziem ani nzo nde yo iso li ba kwikil ku kel mfum. Ba Colinto ba fhun ba ba ywile Pol, li la kwikil, li ba wel mbotik. ⁹ Mfum le mu liel Pol mu mpyib mu ileel:" Kaan ibad bwum si mo, kaan ikas munwa. ¹⁰ Munda me nkel andi nzi, nto mud we wo mek mu iku ikid ku ibi, munda me nkel andi bad ba fhun mu mbee yi." ¹¹ Pol le zing ako yan mvul mumo ani ndaam, mu ilong nda Nziem mu nked a bo. ¹² Tel atwe Gallion mfum wo itswil i maan ma Achaîe, ba yuda bo baso li ba twembek ku kel Pol, li ba mutswel ku nkul a Tuminal. ¹³ Li ba mwe ne:" Mud wu, bad bo baso ba mu ywil mu isaam Nziem, ba mee mu ilwun ngil ye bis." ¹⁴ Pol, le si ne amo, Gallion le liel ku kel ba yuda:" Ba yuda, kid ikal ne nde akid ku ibi nsil, to nde a lwim we ngil, ako yan itu kal ku ibwed mu iya mutswal ku nkel me. ¹⁵ Si bu ikel amon ne manda ma bini ani ma nkwum ani ngil yi itel bini, li iyili bini ba ngako. Me nzel we mu ikal zusi mu manda man." ¹⁶ Gallion le ba byi mu Tuminal. ¹⁷ Kobun bad bo baso li ba fi sostheen mfum wo nzo Nziem, li ba mu bed ku nkul ye Tuminal. Si Gallion atele we man mo maso ma ba sele bo. ¹⁸ Pol le shiel akoyan tel li lee andi ba kwum, le ba shis, le wel maswa, le win ku Syli andi Plistil andi Aquilas. Ku nkul a ikiele maswa, le fi kie mfus ku Senchlee munda nde akwe ku lisûl le Nazaleen. ¹⁹ Tel ba twe bo ku Efezo, Pol le si shis Plescille ani Akilas akoyan, si azwele nde ngako akod mu nzo Nzieme ye ba yuda munda mu iteden andi bo. ²⁰ Li ba mu lwim Pol ne a shial an di bo mu tel li tshi, nde le mee. ²¹ Si nde le si ba shis, le mwe ne, me aya fu-fudu ku kel bini kid ne Nziem zwel." Nde le kyi ku Efez. ²² Tel a twe Pol ku Cesalee, nde le neme, le wi mbwed ku kel bad ba nzo Nziem ye Yelusalem, ku ngwele, le kimi ku Antioche. ²³ Ku ngwel a ilisi ma tsu iko kun, Pol le win ku bitsul bi ntod ye Galat ani Fligi ani iku ba wa inkes ku kel balongok bo baso. ²⁴ Yuda mumo nkwum a nde Apollo, itsin i nde ki bila ku Alexendli, le yi ku Efez. Akele mud a mayel mu imo ani ngol mu ison. ²⁵ Apollo akele ba mu lweng ngol mu mamlong ma mfum. Wu ba lwid bo baso mu impev, a mwe imbe-imbe mu manda ma tel Yesu, Ayebe mbotik na ye Zwan. ²⁶ Apollo abe imo andi inkes mu nzo Nziem. Si tel ba ywil PLiscilia ani Akilas, li ba win ku kel nde, li ba mu swi imbe-imbe nzil ye mfum. ²⁷ Tel azwele nde mu ilud ya Achaîe, ba kuun li ba mwi inkes, le ba swenen ku kel ba longok ba Achaîe ne ba mu yam. Tel a twe nde, le seles ngol ban baba kisi mu nzil ye likwikil. ²⁸ Apollo a liele ba yuda mu wili itsin ngol a nde ani inkes i nde, mu isuu mu bison ne Yesu akele klistu