¹ Tsinɛ ŋtsaka kudo Kristo lɔ, na to nyawo nɛ mi. Nyɛ ŋde le adje ɖaɔ! Ahin djitsinyan ɖokpe nutsi ŋle nunuɔ ɖo Gbɔgbɔnkɔkɔɛ te ŋle. ² Ŋle ŋzinzin kudo vevesese mɛ ɖo nɔvinyɛwo Israɛluviwo ŋtsi. ³ Ɖo ŋdji be masɔ ɖekinyɛ sɔdo busutɔ yi na klan djo le Kristo gbɔ le nɔvinyɛwo ŋtsi, xomɛ tsinyɛwo le ŋtsilan mɛ, ⁴ tsi nyi Israɛluviwo, tsiwo tɔ yi nyi vinyɛnyɛ lɔ, kudo ŋtsikɔkɔɛ, kudo nublablalɔ, kudo eseɛ, kudo subɔsubɔ lɔ, ⁵ kudo ŋgbedodo, kudo patriashiwo, yi domɛ yi Kristo so le ŋtsilan mɛ, Kristo tsi le tanɔ nusianu, yi Mawu yra tɛgbɛtɛgbɛ. Evɛmɛ! ⁶ Ŋde be mila nu be mawunyɔ lɔ tsi edɔmawɔ yɔ. Ɖolɔ amɛtsiwo so Israɛlu lɔ ŋde nyi Israɛlu yo dukɔn, ⁷ yi, nɔlanyi Abraham yo djidjimɛ lɔ, wo kpata ŋde nyi yo viwo; vɔ wo nu be: To Isaki mɛ yi Oda kpɔ xomɛ le, ⁸ Yi gɔmɛ yinyi be ŋde nyi ŋtsilan mɛ viwo yi nyi Mawuviwo, vɔlɔ ŋgbedodo viwo yi nyi djidjimɛ lɔ. ⁹ Ŋgbedodo nyɔ lɔ yike: Nava ŋkeke yɛ tututu , yi Sara ladji vi. ¹⁰ Yitsan lɔ, nɛnɛ yinyi nɛ Rebeka, tsi dji Isaki nɛ miatɔ; ¹¹ ɖolɔ; tsinɛ wo ŋde kpɔ dji neviɛwo tsan Ɔlɔ, wo ŋde wa nunyui alo nuvɔn O, benɛ Mawu yo amɛtsantsan yanɔ anyi, nɛ ŋgbe to dɔwɔwɔ mɛɔn, vɔ to amɛtsi to yo lɔlɔnu yɔ, ¹² wo to nɛ Rebeka be: Amɛganxo lɔ lanɔ gɔmɛ nɛ vifintɔ lɔ, sigbe letsi wo ŋlɔɛ be: ¹³ Ŋlɔn Yakɔbu Yi ŋtsri Esao. ¹⁴ Enyɔŋde mila nu? Nuglɔnglɔn le Mawu mɛ? Nɛte haa djole hɔn! ¹⁵ Ɖo Etonɛ Mɔse be: Naku ŋzĩzĩ nɛ amɛtsi ŋdji be na ku ŋzĩzĩ na, yi nalɔn amɛtsi ŋdjibe nalɔn. ¹⁶ Yiŋtsi, ŋde so amɛtsi ledjidjiɔ alo amɛtsi leduxuɔ gbɔ, vɔ Mawu tsi kpɔnɔ nublanyi. ¹⁷ Mawunyɔ tonɛ Faraɔn be: Enutsɛ ŋtsi ŋsɔwo ɖo fiɔ ɖo Egipti dukɔn nu benɛ mawɔ axua kudo yi masɔ nusin fiɔ, yi nyikɔ nyɛ laxoxla anyigban kpata dji. ¹⁸ Yiŋtsi, Ekunɔ ŋzĩzĩ nɛ amɛtsi dji, yi lana dji lasinŋ nɛ amɛtsi dji. ¹⁹ Olanu nuɔn be ŋde ŋtsi yigbe dɔnɔ to namɛ ɖo? Ɖolɔ mɛŋde latinŋ gbe le yo djidji ŋtsi? ²⁰ O agbetɔ, wo bohun, mɛŋde wo nyi be nɛ nadɔnu kudo Mawu? Eze latiŋ atonɛ amɛtsi mɛ be ŋde ŋtsi omɛŋ nɛnɛ ɖo? ²¹ Ezemɛtɔ ŋkpatsɛnɛ esu lɔ, yi yilatinŋ sɔ esuɖeka asɔ mɛ eze tsiŋtsi ŋtsikɔkɔɛ lanɔ kudo eze maɖo bubu O? ²² Vɔ lede miato sɔkuɖo Mawu yo adɔmɛzoe ŋtsi benɛ ya ɖe yo ŋsin fia, tsimɛ yile djigbɔɔ ɖɛ nɛ djikuze yi wowɔ sɔnɛ gbegble, ²³ yi nɛ yidji be yaɖe yo ŋtsikɔkɔɛ fia sɔkuɖo ŋzĩzĩkpɔkpɔ yo zewo tsi djraɖo ɖɛ nɛ ŋtsikɔkɔɛ? ²⁴ Yiŋtsi yi yɔmi, so Yudatɔwo, alo so trɔnsubɔlawo domɛ, ²⁵ Sigbe letsi yi nui le Ose mɛ be: Nayɔ dukɔn amɛtsi ŋde nyi ahin dukɔn, yi lɔnlɔntɔ amɛtsi ŋde nyi ahin lɔnlɔntɔ O; ²⁶ yi le afitsi wo le totoɔ nɔwo le be: Mi ŋde nyi ahin dukɔn lɔ! Wo layɔwo Mawuagbeagbe viwo. ²⁷ Ezaya tsan nu so Israɛlu ŋtsi be: Nɛ Israɛluviwo yo hinhlinmɛ le sigbe axutakɔ lɔ, amɛ vitukui ɖe kpoe lakpɔ xɔxɔ. ²⁸ Ɖo Axoetɔ lɔ lana yo nyalɔ lakpɔ emɛvava kpata le anyigban lɔ dji. Yi, tsi ²⁹ Ezaya nui san lɔ: Nɛ Axoetɔ sɔdja yo amɛgan, ŋde gble djidjimɛ ɖe kpɔtɔ nɛ mi O lɔ, milanɔ sigbe Sodoŋ, alo Gomɔru. ³⁰ Enyɔ ŋde mila nu fifiɛ? Etrɔnsubɔlawo, tsiwo ŋde le nudjɔdjɔɛ djiɔ, xɔ nudjɔdjɔ, nudjɔdjɔɛ tsi so xɔse mɛ, ³¹ Vɔlɔ Israɛlu , tsi le ese yo nudjɔdjɔ djikɔ lɔ, ŋde kpeŋtsi kpɔ ese lɔ, ³² Ŋdeŋtsi ? Ɖoŋtsi Israɛlu ŋde dji to xɔse mɛɔn, vɔ to sigbe be to dɔwɔwɔmɛ. Yi wo vayi sɔ afɔ xlaɖo ekpe ŋtsi, ³³ sigbe letsi wo ŋlin nɛnɛ: Kpɔ ŋsɔ ekpeklinklin ɖe daɖo ziɔn yi amɛtsi la xɔɛ se lɔ ŋda kpɔ ŋkpin.