¹ Nɔvinyɛwo, ahiŋ djimɛ djidji kudo gbedodoɖa tsinyɛ nɛ Mawu yinyi be wo nɛ kpɔ ɖeɖe. ² Ŋle ɖase ɖiɔ so wo ŋtsi be wo ɖo ŋyaya nɛ Mawu, vɔ numanyamanya tɔ. ³ Ɖo tsi wo ŋde nya Mawu yo nudjɔdjɔɛ wawa O lɔ, wo ŋtɔ wodji be ye woa ɖo yo nudjɔdjɔɛ wawa, yi wo ŋde bɔbɔ wo ɖekui ɖo Mawu gɔmɛɔ. ⁴ Krsito yi nyi nuwuwu nɛ ese lɔ, be nɛ amɛsiamɛ tsi xɔnɔ dji selɔ lakpɔ nudjɔdjɔwawa. ⁵ Ɖo lɔ Mɔse ŋlɔnu kuɖo nudjɔdjɔwawa tsi so ese mɛ be : Amɛtsi lasɔ nya tsɛ do dɔwawa mɛ lɔ lakpɔ agbe to wo mɛ. ⁶ Vɔ nudjɔdjɔwawa tsi sonɔ xɔse mɛ yɛ nu be : Ŋgbe nu le djiwo mɛ be amɛŋde layi djipo? Djidjiɔ ole be Kristo nɛ ɖia; ⁷ alo mɛŋde layi ahluimɛ? Odjibe Kristo nɛfɔn so amɛkukuwo domɛa. ⁸ Vɔ ŋde toɔ yile? Enyɔ lɔ le mia gbɔ, le nutɔwo kudo djiwo mɛ. Etsɛ yi nyi xɔse yo nya tsi misɔ le gbefan ɖeɔ. ⁹ Ɖo nɛ ohun emɛ kudo nuwo be Yesu yi nyi Axoetɔ lɔ, yi nɛ oxɔɛse le axo djimɛ be Mawu fɔɛ so amɛkukuwo domɛ, ola kpɔ xɔxɔ. ¹⁰ Ɖo to djimɛ yo tonɔ sɔhɔnɔ nudjɔdjɔwawa, yi to numɛ yo ɖenɔ gbefan xɔxɔ le. ¹¹ Yiŋtsi to Mawu nyɔ mɛ, amɛsiamɛ tsi xɔnɔ senɔ lɔ ŋda kpɔ ŋkpin O. ¹² Vovototo ŋde le Yudatɔ alo Grɛkitɔ domɛɔ. Ɖo Axoetɔ ɖeka yi wo ɖo, tsi nyi yaylatɔ nɛ amɛsiamɛ tsi yɔnii. ¹³ Ɖo amɛsiamɛ tsi yɔnɔ Axoetɔ lɔ lakpɔ xɔxɔ. ¹⁴ Lede wo la kpeŋtsi ayɔ , amɛtsi ŋtsi wo ŋde xɔse? Yi lede wola xɔɛdjise nɛ amɛɖe ŋde to nya nɔwo? Yi lede wola se nya nɛ amɛɖekpe ŋde le nyɔlɔ nuɔ? ¹⁵ Yi lede gbefanɖetɔwo lananyi nɛ wo ŋde dɔwo ɖoɖa? Wo ŋlin be : Gbefanɖetɔwo tsiwo ɖenɔ gbefan yo afɔ nyɔ loo! ¹⁶ Vɔ wokpata wo ŋde ɖoto Mawu nyanyuilɔ. Ezaya nu be , Axoetɔ, ameŋde se mia nya? ¹⁷ Xɔse vanɔ to nya tsi wose mɛ , yi nya tsi wo senɔ lɔ so Kristo yo nya mɛ. ¹⁸ Vɔ ŋnu be : Ɖe wo ŋde se O? Gbefanɖetɔwo wo nyawo ɖi le anyigban kpatadji yi wo gbewo yiɖo xixeɛ yo tsitsrimɛ. ¹⁹ Yi Israɛlu ŋde nya be Mɔse nu tutugban: Nana míla houãnu to dukɔn tsi ŋde nyi dukɔn O dji, yi naho mia djiku to dukɔn tsi ŋde ɖo nunya O dji. ²⁰ Ezaya nu ŋtɔtsan be: Amɛtsiwo ŋde djiŋ lɔ kpɔŋ. Yi ŋɖe ɖekuinyɛ fiɔ amɛtsiwo ŋde le yɔyɔŋ. ²¹ Vɔ sɔkuɖe Israɛlu ŋtsi lɔ : ŋsɔ alɔ ɖoɖa dukɔn etomaɖotɔ kudo ekɔlialiatɔ gbɔ gbesiagbe.