¹ Etodɔndɔn ɖekpekpe ŋde gbe le nɛ amɛtsiwo le Yesu Kristo mɛɔn. ² Ɖoŋtsi, agbe Gbɔngbɔn mɛ seɛ ɖewo tole nuvɔn ku eku yo seɛ mɛ. ³ Ɖoŋtsi exeɛ ŋde kpeŋtsi lawɔɛ, kuɖo ŋtsilan yo ŋsin tsi kpɔ ɖo dji,Mawu bufɔn nuvɔn le ŋtsilan mɛ , yi sɔ yiŋtɔ Viɛ ɖoɖa le ŋsilan tsi sɔ kudo nuvɔn mɛ , ɖo nuvɔn ŋtsi, ⁴ ehɔn be eseɛ yo nudjɔdjɔwɔwɔ nɛ ya wɔdɔ le mia amɛtsiwo le zɔnzɔnkɔ le ŋtsilan yo agbe mɛ, vɔ le gbɔngbɔn mɛ. ⁵ Amɛtsiwo, le agbe nɔɔ le ŋtsilan lɔ, lɔnɔn ŋtsilan mɛ nuwo, ganke amɛtsiwo lɔnɔn gbɔngbɔnmɛ nuwo lɔ lɔnɔn gbɔgbɔmɛ nuwo. ⁶ Yi lɔlɔn nɛ ŋtsilan lɔ nyi eku, ke lɔlɔn nɛ gbɔgbɔn nyi agbe kudo ŋtsifafa; ⁷ ɖo ŋtsilan mɛ yo lɔnɔn tsitre ɖo Mawu ŋtsi, ɖo ŋde bɔbɔnɔ ɖo Mawu yo seɛ gɔmɛɔn, yi ŋde kpeŋtsivtsan O. ⁸ Vɔlɔ amɛtsiwo nɔnɔ agbe le ŋtsilan mɛ ŋda kpeŋtsi adje Mawu nu O. ⁹ Miawolɔ, mi ŋde le agbe nɔɔ le ŋtsilan mɛ, vɔ gbɔgbɔn mɛ, nɛ enyi be Mawu yo gbɔgbɔn le agbe le mia mɛ. Nɛ amɛɖe ŋde ɖo Kristo yo gbɔgbɔn lɔ , ŋde nyi yitɔ. ¹⁰ Yi nɛ Kristo le mia mɛ lɔ, ŋtsilan, eku sukuɖo nuvɔn ŋtsi, vɔ gbɔgbɔn yɛ le agbe sɔkuɖo nudjɔdjɔwawa ŋtsi. ¹¹ Nɛ Gbɔgbɔn tsi fɔn Yesu le amɛkukuwo domɛ le mia mɛ lɔ, amɛtsi fɔn Kristo le amɛkukuwo lɔ lagbɔ agbe mia ŋtsilan kukuwo to yo gbɔgbɔn tsile mia mɛ. ¹² Nɔvinyɛwo, yiŋtsi lɔ, mi ŋde nyi fĩn nɛ ŋtsilan be nɛ mia nɔ agbe le ŋtsilan mɛɔn. ¹³ Nɛ mile agbe nɔɔ le ŋtsilan mɛ lɔ, mila ku; vɔ nɛ to Gbɔgbɔn lɔ dji miwu ŋtsilan yo djidjiwo lɔ, mi lanɔ agbe, ¹⁴ Ɖo amɛsiamɛ tsinɛ zɔnɔn le Mawu yo Gbɔgbɔn nu lɔ nyi Mawuvi. ¹⁵ Yi mi ŋde xɔ kluvi yo gbɔgbɔn be nɛ mianɔ vɔvɔn mɛ O; vɔ mixɔ vinyinyi yo gbɔgbɔn, tsinɛ dji miyɔnɔ Mawu be: Aba! Papa! ¹⁶ Gbɔgbɔnlɔ ŋtɔ ɖinɔn ɖase nɛ mia gbɔgbɔn be minyi mawuviwo. ¹⁷ Vɔ, nɛ minyi mawuviwo, minyi gomɛkpɔlawo: Gomɛkpɔla le Mawu gbɔ, yi miaku Kristo nyi gomɛkpɔla, vɔ nɛ mi kpefu kudui, be nɛ miakpɔ ŋtsikɔkɔɛ kudui. ¹⁸ Ŋkpɔ be fifiɛ yo fukpekpe tsimɛ mile lɔ ŋda sɔ kudo ŋtsikɔkɔɛ tsi Mawu lasɔ fia mi. ¹⁹ Yi tsan hihiɛ le tenɔɔ kpɔ mawuviwo yo ɖeɖefia veveɖe. ²⁰ Ɖoŋtsi wo bɔbɔ hihiɛ lɔ ɖo nugbalo gɔmɛ, ŋde le yiŋtɔ yo drodro ŋtsi, vɔ le amɛtsi bɔbɔɛ lɔ ŋtsi, ²¹ kudo mɔkpɔkpɔ be yitsan lato le zĩzĩɖo to ɖo nugblegblewawa gɔmɛ, benɛ yakpɔ vovo le mawuviwo yo ŋtsikɔkɔɛ mɛ. ²² Vɔlɔ, minya be kakavaɖo egbɛ lɔ, hihiɛ le fun kpeɔ yile hun ɖeɔ le vidjidjiɛ ŋtsi. ²³ Vɔ ŋde nyi yiɖeka kpoyɔ; vɔ miatsan, tsi ɖo Gbɔgbɔn lɔ yo ŋkɔgbesi, miawo tsan mile hun ɖekɔ le miawo ŋtɔ mɛ, le tenɔɔ kpɔ vinyinyi yo ŋtsilan ɖeɖekpɔkpɔ. ²⁴ Ɖoŋtsi le tenɔnɔmɛ yi milakpɔ xɔxɔ. Vɔ tenɔnɔ tsi wo kpɔ lɔ gbenyi tenɔnɔa: Enu tsi wo kpɔ lɔ , wola gbe nɔte kpɔɛ? ²⁵ Vɔ nɛ mile tenɔɔ kpɔ nu nutsi mi ŋde kpɔnɔɔ lɔ, mila nɔtekpɔɛ kudo vevedodo. ²⁶ Yitsan Gbɔgbɔnlɔ kpenɔn ɖo miawo ŋtsi le mia gbɔdjɔgbɔdjɔwo mɛ, ɖoŋtsi mi ŋde nyan nutsi mila biɔnɔ le mia gbedodoɖawo mɛɔ. Vɔlɔ Gbɔgbɔn lɔ ŋtɔ xɔnɔ nya ɖo miata kudo ŋinŋin tsi nunu ŋde le ŋtsi; ²⁷ yi amɛtsi kpɔnɔ edjiwo lɔ nyanɔ susu tsile Gbɔgbɔn lɔ si, ɖoŋtsi Mawu gbɔ yi sonɔ be nɛ ya xɔ nya ɖo amɛkɔkɔɛwo ta. ²⁸ Minya be nuwokpata la tinŋ hin nyui vanɛ amɛtsiwo lɔnɔ Mawu, amɛtsiwo yiŋtɔ yɔ le yo djidji mɛ. ²⁹ Ɖo amɛtsiwo yi nya doŋkɔ lɔ, ewɔwo doŋkɔ benɛ woaɖi Viɛlɔ, benɛ Viɛlɔ yanyi vitutugban le nɔviɛwo domɛ. ³⁰ Yi amɛtsiwo yi djraɖo lɔ, egbe yɔwo; yi amɛtsiwo yi amɛtsiwo yi yɔlɔ ewa wo djɔdjɔɛtɔwo; yi amɛtsiwo yiwa djɔdjɔ lɔ, egbe sɔ ŋtsikɔkɔɛ kɔɖo wo dji. ³¹ Enyɔ ŋde milanu so nyɔtsɛwo ŋtsi? Nɛ Mawu le miadji lɔ , amɛŋde laso ɖo miaŋtsi? ³² Amɛtsi ŋde kpɔ Viɛ lɔ yo funkpekpe O, vɔ sɔɛna ɖo miata, ŋde ŋtsi ŋda sɔ nuwo kpata asɔ na mi kudui O? ³³ Amɛŋde laɖo kodjo nɛ Mawu yo amɛtsantsanwo? Mawu yi lawawo djɔdjɔtɔwo! ³⁴ Mɛŋde la bufɔn wo? Yesu ku; yiŋtɔtsan, Egbe fɔn, Ele Etɔlɔ yo lɔɖusi mɛ, yile enya xɔɔ ɖo akɔn nɛ mi! ³⁵ Mɛŋde la ɖemidjo le Kristo yo lɔlɔn gbɔ? Funkpekpe loo, alo xaxa, alo yomɛtsitsi loo, alo adɔ, alo ama- ama, vɔvɔn alo eku? ³⁶ Abe letsi wo ŋlɔɛ: Ewo ŋtsi wole mia wuɔɔ gbesiagbe, tsi wole miakpɔɔ sigbe be alin tsiwo kplɔnɔ yi wuwu gbe. ³⁷ Vɔ le etsɛwo kpata mɛ lɔ , miwu djiɖutɔwo le amɛtsi lɔmi ŋtsi. ³⁸ Ɖo ŋkanɖodji be, eku alo agbe, alo mawudɔla wo alo djiɖuɖuwo alo nu tsiwo le egbɛ alo gbɔnɔ, ³⁹ nusinwo, djiyiyi, gɔmɛyiyi alo mawu yo nuwɔwɔ ɖe ŋda man miakudo Mawu yo lɔlɔn tsiɖe to mia Xoetɔ Yesu Kristo dji O.