¹ Yiŋtsi , nɔvinyɛ kɔkɔɛtɔwo, tsiwo kpɔ gomɛ le djipo yo yɔyɔ mɛ, mibu amɛdɔdɔ kudo vɔsalagan nɛ xɔse tsi mile nunuɔ dji se, ² Yesu tsi nyi nutexoewɔla nɛ amɛtsi ɖoe, sigbe letsi Mɔse nɔ le yo xoe mɛ. ³ Ɖo edje nɛ bubu tsi xota nɛ Mɔse tɔ sigbe letsi amɛtsi tu axoe dje nɛ bubu sɔwu axoeɛ nɛnɛ. ⁴ Amɛɖe yi tu axoe ɖesiaɖe, vɔ amɛtsi wa enu ɖesiaɖe yi nyi Mawu. ⁵ Mɔse yɛ, nyi nutexoewɔla le Mawu yo xoeɛ keŋkeŋ mɛ, sigbe subɔla, nɛ yi ɖi ɖase le nu tsi yi lanu lɔ mɛ; ⁶ vɔ Kristo yɛ nyi abe Evi le axoeɛ mɛ; yi yo xoe lɔ, miawo yɔ, nɛ be mi tinŋ le djiɖexo kudo mɔkpɔkpɔ mɛ ɖo asi kaka sɔ yi nuwuwu. ⁷ Yiŋtsi enyɔ tsinɛ gbɔgbɔkɔkɔɛ nu :Egbɛegbɛ, nɛ mise egbe tsɛ lɔ, ⁸ Mi ŋgbe sin miadjiwo mɛ, sigbe letsi amɛwo xo axua le gbeɛdji nɛnɛ , le tetekpɔ yo ŋkekeɛ dji le zogbeɛ mɛ O, ⁹ Afitsi miatɔgbewo teŋkpɔ le , yi wo kpɔ ahin dɔwɔwɔ le exoe kanɛ kpata. ¹⁰ Yi ŋbidji do djidjimɛ tsɛ nu be: Wo ɖo edji trotro. Wo ŋde djesi ahin mɔwo O. ¹¹ Yi ŋta nu le ahin dɔmɛzoui mɛ be wo ŋda yi ahin gbɔdjɔɛ mɛ! ¹² Mi kpɔnyuiɖe, nɔvinyɛwo, be amɛɖe le miado mɛ ŋgbe ɖo edji vuĩn kudo djimaxɔse, be nɛ miatrɔ le Mawu agbeagbeɛ gbɔ O. ¹³ Vɔlɔ, mido ŋsin mianɔnɔɛwo gbesiagbe, djidjiɖe be: Egbɛ! be amɛɖekpe ŋgbe sĩn djimɛ le nuvɔn yo amɛbleble mɛ O. ¹⁴ Ɖolɔ mitrɔzu gomɛkpɔtɔ nɛ Kristo, nɛ mi tinŋ le djidoxo tsi miɖo le gɔmɛdjedjeɛ mɛ sinsin ɖe ɖo asi kaka sɔyi nuwuwu. ¹⁵ Etsimɛ wo to be: Egbɛegbɛ, nɛ mise yo gbe lɔ, mi ŋgbe sĩn mia djiwo mɛ O, sigbe le tsitetsitsi gamɛ. ¹⁶ Mɛɖewo yi nyi amɛtsiwo yi so le etsimɛ yo se enya lɔ, nɛ ŋde nyi amɛtsi wo kpata djo le Egipti kudo Mɔse yo kplɔkplɔ? ¹⁷ Yi mɛŋde ŋtsi Mawu bidji le sɔnŋ exoe ka, nɛ ŋde nyi amɛtsiwo le nuvɔn wɔɔ, yi wo exuwo tsi zogbe mɛ? ¹⁸ Yi mɛŋde ŋtsi yi tanu le be wo ŋde da ɖo yo gbɔdjɔɛ mɛ, nɛ ŋde nyi amɛtsiwo ŋde ɖo eto? ¹⁹ Yi mikpɔ be wo ŋde tinŋ ɖo mɛ sɔkuɖo wo djimaxɔse ŋtsi.