¹ Jich yu'un te bit'il cha'kuxematikix sok te Cristoe, ja me aleik te beluk ay ta ch'ulchane, te banti ay te Cristo te nakal ta swa'el sk'ab te Diose. ² Nopaik me te beluk ay ta ch'ulchane, ma me jauk anopik te beluk ay ta balumilale. ³ Melel te ja'exe lajemex sok ayix akuxlejalik yu'un Dios ta swenta Cristo. ⁴ Te k'alal ya xchiknaj tel te Cristo, te ja kuxlejalile, jich ya xchiknajex uuk ta bay yutsilal. ⁵ Ja yu'un aka lajuk ta atojolik te beluk ya smulan te abak'etalik te ay ta balumilale, ja te chijil jolole, te beluk ilaybil sbae, te beluk ya smulan te awot'anike, te sk'anel te beluk malekuke sok te sbik'tal ot'anile, melel ja pajal k'oem sok te xch'uunel te lok'ombaetike. ⁶ Ja ta swenta te muliletik to, te ya xk'ot ta stojolik te yilimba te Dios te mach'atik k'axinte mantaliletike. ⁷ Te ja'exe jich nix la apasik uuk te k'alal kuxulex ta balumilale. ⁸ Jauk me to te ja'exe ya me sk'an ya awijk'tayik spisil in to: Te la' ot'anile, te ilimbae, te ya anopik spasel te beluk ma' lekuke, te bolk'optaywaneje sok te ixta' k'ope. ⁹ Ma me apas abaik lot ta tulutul, melel te ja'exe la wijk'tayikix te spokol akuxlejalike sok spisil te beluk k'ayemex ta spasele, ¹⁰ sok te alapojikix te yach'il akuxlejalik te yan yan yak ta yanubel ja to teme jich k'oatik te bit'il te mach'a la spasatike, swenta yu'un ya ana'beyik sba ta lek. ¹¹ Ja in to mayukix sk'oplal teme griego soy teme judioe, teme yich'oj circuncisión sok teme ma yich'oj te circuncisione, te mach'a yan lum taleme, teme talem ta Escitae ja te mach'atik malek te beluk ya spasike, teme mosoinbile, teme koleme, melel janax ay sk'oplal te Cristo sok ay ta swenta spisil. ¹² Jich yu'un lapaik me te lekil akuxlejalik, te bit'il tsabilex yu'un te Diose, te ch'uultesbilex sok te k'ambilex yu'une, ayuk me xk'uxul awot'anik ta spisil ora, lekuk me awot'anik, pek'el me awak' abaik, manso me awot'anik sok ayuk me smalib awu'unik. ¹³ Jech ts'ikbeyame abaik. Jech kuxtayame abaik. Teme ay tul te mach'a ya xjach k'ope, pasbeyame perdón jich bit'il te Kajwaltik la spasbeyex perdóne. ¹⁴ Ta swenta spisil in to, ayuk me xk'uxul awot'anik, te ja junax ya yak'otik ta swenta te beluk lek ta pasele. ¹⁵ Ak'aik me te jauk swentainbeyex awot'anik te lamal k'inal yu'un te Cristoe. Ja yu'un te lamal k'inal te la awich'ik ik'el swenta yu'un junax ya xk'oex ta apisilik. Sok albeyaik wokol te Dios ta spisil ora. ¹⁶ Jauk me nojel ta awot'anik ta spisil ora te sk'op te Cristoe. Sok ayuk me sbijil awot'anik te k'alal ya awaiyik nojp'teswaneje sok jech tojtesame abaik sok salmoetik sok k'ayojetik yu'un Dios sok k'ayojetik ta swenta Espíritu. Albeyaik me wokol Dios sok spisil awot'anik sok k'ayojetik. ¹⁷ Spisil te beluk ya apasike, teme ta ak'opik naxe o teme ya apasike, pasaik me spisil ta swenta sbiil te Kajwaltik Jesuse. Albeyaik me wokol Dios ta swenta sbiil te Jesuse. ¹⁸ Antsetik te nujp'inemexe, ich'aik ta muk' te amamlalike, jich te bit'il ya sk'an te Kajwaltike. ¹⁹ Winiketik te nujp'inemexe, k'ux me awaiyik ta awot'anik te awinamike, ma me amenuk k'inal awaiyik ta stojol. ²⁰ Aletik ch'uunbeyaik me spisil te smantal te ame'-atatike, melel ja lek yot'an yu'un te Kajwaltike. ²¹ Me'el-tatiletik, ma me xa awak' x-ilinuk te awal-anich'anike, swenta yu'un ma me xchebaj yot'anik ta awentaik. ²² Abatetik, ch'uunbeyaik me spisil te smantal te ajwalil awu'unik te ja pajal ch'ich' bak'etex sok, ma me jauk nax te k'alal ya yilex te lek ya x-at'ejex ta stojole, junuk me awot'anik ya apasik te at'elile. Ja me xa xi'ik te Kajwaltike. ²³ Spisil te beluk ya apasike, at'ejanik me sok spisil awot'anik jichuk me te bit'il yu'un te Kajwaltike, ma me jauk ta stojol te ants-winiketike. ²⁴ Melel te ja'exe ya ana'ikix te ya awich'ik te amajt'anik yu'un te Kajwaltike. Melel ja ayatik ta abatinel yu'un te Kajwaltik Cristoe. ²⁵ Yan te mach'a ma toj te beluk ya spase, janix jich ya yich' kastigo yu'un sok ma tsabil uuk nax yu'un te Diose.