¹ Melel ya jk'an te yakuk ana'ik stojol te tulan yakon ta at'el ta atojolik sok te mach'atik ayik ta Laodicea sok te mach'atik ma sna'bonik jbae. ² Te jo'one ya x-at'ejon yu'un te yakuk yich' yip awot'anik swenta yu'un junuk me k'ux ya awaiy abaik sok te tsakal ana'ojikix te beluk mukbil jilel yu'un te Dios, te ja te Cristoe. ³ Ay ta swenta stukel spisil te bijil ot'anil sok te beluk ya sk'an ya jna'tik stojole melel k'ebil yu'un spisil. ⁴ Ya jkalbeyex in to swenta yu'un ma me ya awich'ik lo'layel yu'un te lotil k'opetik te smelelil yaele. ⁵ Manchuk me ma joinejex ta jtelemal, jauk me to joinejex ta swenta te Espíritue. Te jo'one ay bayal sbujts' jkot'an yu'un te lek yakatik spasel te at'elile sok te ay yip te xch'uunjel awot'anik ta stojol te Cristoe. ⁶ Jich te bit'il la ach'uunikix te Kajwaltik Cristoe, beenanik me sok. ⁷ Tulan me awak' abaik ta stojol sok ipajemukexme ta lek, k'axeluk me ay xch'uunjel awot'anik jich te bit'il la awich'ik nojp'tesel sok alaik me bayal wokol ta stojol. ⁸ Wik'iluk me asitik swenta yu'un mayuk mach'a ya slo'layex sok bijil k'opetik sok te lotil ayejetik te jich bit'il stalel xkuxlejalik ta namey te ants-winiketiketik te ayik ta balumilale, te ma jichuk sk'anjel yot'an te Cristoe. ⁹ Melel te Cristoe kuxinem ta sbak'etal spisil te yutsilal te Diose. ¹⁰ Sok te ja'exe ts'akal ayatikix ta stojol te Cristoe. Ja jolol yu'un spisil te beluk ay yu'el sok mach'atik tulan yat'elike. ¹¹ Ta swenta Cristo te ja'exe la awich'ikix circuncisión te ma pasbil ta sk'ab te ants-winiketike, te albil sk'oplal yu'un te ch'ich' bak'ete, ja la awich'ik circuncisión yu'un te Cristoe. ¹² Te ja'exe la awich'ik mukel sok te Cristo te k'alal la awich'ik te ja'e, ta swenta te Jesuse la awich'ik cha'kusesel yu'un te xch'uunjel awot'anik ta yu'el te Diose, te ja la xcha'kuses tel te banti ay te aelmeletike. ¹³ Te k'alal lajematik a, ta swenta te amulike sok te ma awich'ojik circuncisión yu'un te abak'etalike, ja la yak'batik ja xkuxlejalik sok la spasbotik perdón te Jesús yu'un spisil te jmultike. ¹⁴ Ja la stup' spisil te jbetike sok te beluk kechel ta jwentatik stojele. ¹⁵ Te k'alal laj ta cruz, le' la slajinbey sk'oplal spisil a. Ja la spejk'tsanbey yu'elik te mach'atik ay yu'elike sok te mach'atik ay tulan yat'elike, ja la yakbey yil te ants-winiketike, te la yaiy tsalaw ta stojolik ta banti cruz. ¹⁶ Jich yu'un, ma me ayuk mach'a ya yich'ex ta k'op yu'un te beluk ya alajinike sok te beluk ya awuch'ike, sok teme ay sk'alelal k'in sok yach'il u, sok te sk'alel ich' lewae. ¹⁷ Spisil in to ja te beluk ya smak te beluk ya xtale, jauk me to te smelelile ja te Cristoe. ¹⁸ Ma me xa awak'ik ta pojel te amajt'anik, yu'un te mach'atik te ya yalik te pek'el skuyoj sbaike sok te ya yich'ik ta muk' yilel te ch'ul abatetike. Sok te mach'a ya yalik te ay beluk ya xwaichinik sok te ay beluk stelemal ya yilik jauk me to ta sk'opik nax stukelik sok te muk' yak'oj sbaik yu'un te beluk snopojik ta swenta nax te sbak'etalike. ¹⁹ Ma sk'an te jun ayik sok te Cristo te ja jolole. Melel k'alal ta jolol, sts'aktileyoj sba ta swenta te muk' chialiletik spisil sok te baketik, swenta yu'un jich ya sta yipik sok junax ayik; spisil in to ya xch'i ta swenta de Diose. ²⁰ Teme lajematikix sok te Cristoe, jich me kolematikix yu'un te yu'el te beluk ay ta balumilale, jich yu'un ¿bistuuk te kuxulatik jich te bit'il sujbilatik yu'un te balumilal te ya yalbatike: ²¹ "Ma atsakik in to, ma awe'ik in to, ma apikik in to?" ²² Spisil in to yak ta lajel bael sk'oplal melel janax snopjibal yu'un te ants-winiketike. ²³ Jai mantaliletik to ya yak' xbijubik yilel melel janax yak'ojbey sba xch'uunik stukelik sok te pek'el yak'oj sbaik yilele sok te tulan ya yich'ik pasel ta mantal te sbak'etalike. Jauk me to ma xju' yu'unik skomel te sbak'etalike.