SPATJIBAL OT'ANIL ¹ Pablo, wolwanej puk k'op yu'un te Jesucristo ta swenta sk'anjel yot'an Dios sok te Timoteo te jkermanotike, ² te mach'atik ch'uunjeletik sok te mach'atik toj yot'anik ta swenta Cristo te ayik ta Colosas. Aka sjoines te yutsil yot'an sok te lamal k'inal yu'un te Jtatik Diose. TE PABLO LA SK'ANBEY TE DIOS TE YAKUK YICH'IK SBIJIL YOT'ANIKE ³ Te jo'otike ya jkalbeytik wokol Dios, te ja stat te Kajwatik Jesucristoe sok ta spisil ora ya jk'oponbeyex Dios. ⁴ Te jo'otike jkaiyotik stojol te xch'uunjel awot'anik ta stojol te Jesucristo sok te k'ux ta awot'anik spisil te mach'atik tsabilik yu'un te Diose. ⁵ Te ja'exe ay xk'uxul awot'anik ja yu'un te yakatik ta smaliley te beluk k'ejbil ta ch'ulchane. Te ja'exe la awaiyik stojol te smelelil k'op, ja te lek yach'il k'ope, ⁶ te ja talix ta atojolik. Te lek yach'il k'op yak ta yak'el sit sok yak ta ch'iel ta spamal balumilal. Jich yak ta spasel ta atojolik uuk, ja to te k'alal la awaiyik stojole sok te la ana'beyik sk'oplal te yutsil yot'an Dios ta smelelile. ⁷ Jai lek yach'il k'op to, te ja la anopeyik te Epafrase, te ja joy jba ta at'el sok te bayal k'ux ta jkot'ane, te ja jun yot'an yak'oj sba ta abat ta stojol te Cristo ta atojolike. ⁸ Te Epafras la yak'botik jna'tik stojol te bit'il ay te xk'uxul awot'anik ta swenta te Espíritue. ⁹ Ta swenta te xk'uxul ot'anile, te k'alal la jkaiytik stojol te bit'il ayexe mayuk ni junuk k'aal te la jkik'teytik ta sk'oponel Dios ta atojolik.Te jo'otike yakotik ta sk'anel te yakuk xnojex ta sbijil ot'anil yu'un jich ya ana'beyik te beluk ya sk'an yot'an te Diose sok te yakuk awich'ik abijilik ta swenta te Espíritue. ¹⁰ Te jo'otike yakotik ta sk'oponel Dios ta atojolik yu'un te tojuk ya xbeenex jich te bit'il ya sk'an te Kajwaltike. Te jo'otike yakotik ta sk'oponel Dios ta atojolik yu'un te yakuk awak'ik asitik ta swenta spisil te lekil at'elile sok te ya xmuk'ubex ta swenta te yakuk ana'bey sbaik te Diose. ¹¹ Te jo'otike ya jk'opontik Dios ta atojolik yu'un te yakuk awich'ik smuk'ul awot'anik yu'un te beluk ya ana'ik spasele sok ta swenta yu'el te yakuk awak'beyik yipal sok te ayuk smalib awu'unike. ¹² Te jo'otike ya jk'opontik Dios ta atojolik yu'un binuk nax me awot'anik ya awalbeyik wokol te Jtatike, te ja la yak' te pajaluk ya awich'ik te majt'anil yu'un Dios sok te ch'uunjeletik te ayik ta sakil k'inale. ¹³ Te Jtatik Dios ja la skoltayotik tel lok'el yu'un te yip te ijk'al k'inale sok la yak'otik ta ba ay ta ajwalinel te Snich'an te k'ux ta yot'ane. ¹⁴ Ta swenta te Nich'anil te ay jkoleltik yu'une sok ja la yak'botik perdón yu'un te jmultike. ¹⁵ Te Nich'anile ja slok'omba te Dios te ma chikanuk ta ilele. Ja sbabial ay yu'un spisil te beluk pasbile. ¹⁶ Melel ja ta swenta te la yich' pasel spisil te beluk ay ta ch'ulchan sok te beluk ay ta balumilale, te beluk chikan ta ilel sok te beluk ma chikanuk ta ilele. Teme muk'ul ajwaliletik, teme mantalteswanejetik, teme ajwaliletik, sok te mach'a tulan yat'el yich'ojike, spisil la yich' pasel ta swenta te Cristo sok ja yu'un stukel. ¹⁷ Ja neel yu'un spisil te beluk aye sok spisil yich'oj yip ta swenta. ¹⁸ Ja jolol te Cristo yu'un te ch'uunjeletike, te ch'uunjeletike ja sbak'etal k'oem te Cristoe. Ja ay ta xjajch'ibal stukel sok ja neel cha'kux tel ta bay aelmeletik jich neel ay yu'un spisil te beluk aye. ¹⁹ Melel te Diose binax yot'an yu'un te Cristo te ja kuxinem jich te bit'il sk'anjel yot'ane, ²⁰ sok ja ta swenta te Nich'anil te ya yak' xjunaj ta stojol Dios spisil te beluk ay ta balumilal sok te beluk ay ta ch'ulchane. Te Diose la yak' lamajuk k'inal ta swenta te la smal xch'ich'el ta cruz te Jesuse. ²¹ Janix jich ta neelal to, ma ba na'bilabaik a yu'un te Diose sok akontroinojik a ta swenta te beluk ya anopike sok te beluk ma lek ya apasike. ²² Yan ta ora to, te Cristoe la yak' lekubatik ta swenta te laj te sbak'etale. Ja la spas yu'un te ch'uultesbilex ya xk'oatik, te mayuk amulik sok te mayuk bi ya stak' ya yalbeyex te k'alal ya xk'oex ta stojol te Diose, ²³ teme la awak'beyik yipal ta swenta te xch'uunjel awot'anik sok teme jun awot'anike, teme ma la awijk'teyik te smuk'ul awot'anik ta stojol te lek yach'il k'op te la awaiyikix stojole. Ja in to ja te lek yach'il k'op te la yich' albeyel ta spisil te ants-winiketik te ay ta balumilale. Ja me ta swenta te lek yach'il k'op te la jkak'ba ta abatinel te jo'on Pabloone. ²⁴ Ta ora to binax jkot'an yu'un te yak ta k'axel jwokol awu'unik sok te ya jts'aktes ta swenta swokol jbak'etal te bit'il te Cristo te k'ax swokol ta swenta te ch'uunjeletik te jich k'oem te bit'il te sbak'etale. ²⁵ Ja swentail te ayon ta abatinel yu'un te ch'uunjeletike, te ja la yak'bon te Dios te ya jwentainatik, yu'un jich me ts'akal ya xk'ot te sk'op te Diose. ²⁶ Ja in to ja smelelil te mukbil jilel ta namey k'inale. Jauk me to la yich'ix na'el stojol yu'un te mach'atik ya xch'uunike. ²⁷ Dios la sk'an yot'an te la yak' na'el stojol te yutsil sk'ulejal te beluk mayuk ta na'el stojol ta swenta te mach'atik yantik lumetike. Ja te Cristo te ay ta atojolike, te le' ya jtatik a te beluk yakotik ta smaliyele. ²⁸ Te jo'otike ya jkalbetik sk'oplal te Cristo sok ya jnojp'testik te ants-winiketik ta swenta sbijil ot'anil, swenta yu'un chapal ya xk'ot stejk'an sbaik ta stojol te Cristoe. ²⁹ Ja yu'un tulan yakon ta at'el, melel te Cristo ja yak ta at'el ta jtojol sok ja yak'obon te yu'ele.