¹ Ja'ex ajwalilex, ak'beyameik te abatetik awu'unik te beluk lek sok te beluk stojile sok na'aik me te ay ajwalil awu'unik uke te ay ta ch'ulchan. ² Ma me xkomatik ta sk'oponel te Diose. Wik'iluk me asitik ta stojol sok ma me xlujp'atik ta yalel wokol. ³ Junax me ya ak'oponik Dios ta jwentatik uuk, swenta yu'un jich te Dios ya stak' sjambotik bael ti'nailetik, yu'un jich ya stak' jcholtik te lek yach'il k'op yu'un te Cristo te mukbil ae. Ja ta swenta in to, te chukulone. ⁴ Sok k'oponaik Dios te jamaluk ya stak' jchol te sk'op te Cristoe, te k'alal ya xjajch'on ta k'ope. ⁵ Bijanik me te bit'il ya xbeenex ta stojol te mach'a mayuk xch'uunjel yot'anike, lek me xa ana'ik stuuntesel te jujun k'aale. ⁶ Ta spisil ora te k'alal ya xk'opojatike, ayuk me yutsil te ak'opike. Ayuk me xchi'il jich te bit'il te ats'ame, swenta yu'un jich me ya ana'ik sutbeyel sk'op ta tulutul. ⁷ Jauk me to, spisil te beluk yak ta k'oel ta pasel ta jtojole, te Tíquicoe ya me yalbeyex te bi jkilele. Te Tíquico ja tul jkermano te bayal k'ux ta jkot'ane sok te ja tul abat te jun yot'ane, sok ja joy ta abatinel ta swenta te Jkajwaltike. ⁸ Ja yu'un te ya jtikunbatik tel ta atojolike, swenta yu'un jich ya ana'ik te bit'il ayotike sok nix te ya yak'batik yip awot'anike. ⁹ Ja la jtikun tel sok te Onésimoe, te jun yot'an sok te ja tul jkermano te bayal k'ux ta jkot'ane, te le' talem te banti ayexe. Ja me ya yalbatik spisil te beluk yak k'oel ta pasel le' in to. ¹⁰ Te Aristarco, te ja joy ta chukel, ya yak'batik spatjibal awot'anik sok nix te Marcos, te snich'an stajun te Bernabé (te ja la yak'batik mantale; teme bajt' ta atojolike, ik'aik me), ¹¹ sok nix te Jesús te justo te yan sbiile. Jaik nax me te ox tulik te ja judioetik te yich'ojik circuncisión te sjoinojonik ta at'el ta swenta xcholel te ja awalil te Dios ta swenta te Cristo Jesuse. Ja ya yak'bonik smuk'ul jkot'an. ¹² Te Epafras ya yak'batik spatjibal awot'anik. Te le' talem ta banti ayexe sok ja abat yu'un te Jesucristoe. Ta spisil ora ya sk'oponbatik Dios, swenta yu'un ya xmuk'ubex sok te yakuk ana'beyik te beluk ya sk'an yot'an te Diose. ¹³ Melel te jo'one ya jkak'ba ta testigo yu'un te Epafrase, te ja tulan te at'ejem ta atojolik sok ta stojolik te mach'atik ayik ta Laodicea sok te mach'atik ayik ta Hierápolis. ¹⁴ Te Lucas, te poxtaywanej te bayal k'ux ta jkot'antike sok te Demas ya yak'batik spatjibal awot'anik. ¹⁵ Ak'beyaik spatjibal yot'anik te jkermanotaktik ta Laodicea sok nix te Ninfa sok te ch'uunjeletik te ya stsobilay sbaik ta bay te snae. ¹⁶ Te k'alal ya yich' k'oponel jai ts'ibubil jun to ta atojolik, k'oponbeyaik me uuk ta stojol te ch'uunjeletik te ayik ta Laodicea sok k'oponaik me uuk te beluk la yich' jts'ibubel bael te ch'uunjeletik te ayik ta Laodicea. ¹⁷ Albeyaik me uuk te Arquipoe, "te manchuk me ya xch'ay ta yot'an te ya sts'aktes te yat'el te ak'bil yu'un te Jkajwaltike. ¹⁸ Jo'on nix me Pablo te la jts'ibuy ta jk'ab jai spatjibal awot'anik in to. Naaik me te chukulone. Ayuk me ta atojolik te yutsil yot'an te Diose.