TE TULAN WOKOLIL TE AY TA SBAK'ETAL TE PABLOE ¹ Ya jna' te mayuk beluk ya xlok' jku'un a te k'alal ya jkak'ba ta ich'el ta muk'e. Jauk me to ya jkalbeyex awaiyik te beluk la yak'bon jkil sok te beluk la yak'bon jna' stojol te Jkajwaltike. ² Te jo'one ay tul winik te la jna'bey sba ta swenta te Cristoe, xchan lajunebal ja'wil xk'axelix, ma jna' teme yich'oj sbak'etal a o teme xch'ulel xanix a, janax Dios ya sna', jauk me to ik'ot bael ta bay te yox lamal ch'ulchane. ³ Ya jna' te jai winik to, ay to ba ta sbak'etal abi o xch'ulel xanix bal abi, ma jna', janax Dios ya sna', ⁴ la yich' ik'el bael ta bay paraiso sok la yaiy stojol k'opetik te k'ax bayal yutsilal te mayuk mach'a jich yaloje. ⁵ Ya stak' te ya jkak'ba ta ich'el ta muk' yu'un te la jna'bey sba jai winik bi. Jauk me to janax ya jkak' ba ta ich'el ta muk' yu'un te bit'il mayuk jkipe. ⁶ Te yakuk jk'an jkak' ba ta ich'el ta muk'e, ma ba jich ya xk'oon te bit'il mach'atik ma xch'uunike, melel spisil te beluk la jkalbeyexe smelelil. Jauk me to ma jkak'ba ich'el ta muk' yu'un, jich me mayuk mach'a ya snop te ja bayal xan jk'oplal yu'un spisil te beluk ya jpase sok te beluk ya jkale. ⁷ Janix jich ma jkak'ba ta ich'el ta muk' yu'un spisil te beluk la yak'bon jkil sok la yak'bon jna' stojol te Jkajwaltike. Jauk me to, ta swenta te manchuk ya jkak'ba ich'el ta muk' a, la jkich' ak'beyel ta jbak'etal tulan wokolil (aguijon), tul yabat te pukuj te yak ta yuts'inbelone, swenta jich ma jkak' ba ta ich'el ta muk' a. ⁸ Oxeb buelta la jkalbey wokol te Jkajwaltik ta swenta in to, te yakuk sk'ejbon lok'ele. ⁹ Jauk me to jich la yalbon: ''Tik'at a te yutsil jkot'ane, melel te jku'ele yak ta utsubel ta swenta te pek'el te awipe." Ja yu'un te ya jkak'ba ta ich'el ta muk' yu'un te bit'il mayuk jkipe, swenta jich te yu'el te Cristoe ya yilik ta jtojol. ¹⁰ Jich yu'un te jo'one, binax jkot'an yu'un melel ta skaj te Cristoe, ayon ta woklajel, ta utel, ta k'opetik, ta nutsel sok te k'alal ay mel-ot'ane. Melel te k'alal mayukix te jkipe, ja ay xan jkip abi. ¹¹ ¡Jich yakon ta k'op te bit'il mach'a ma sna' k'inale, te ja'exe ja la asujonik te jich ya jpase, melel te jo'one ya sk'an te la awich'onik ta muk'e. Melel ma ba pek'el xan ayon te bit'il te mach'atik skuyoj sbaik ta chol k'ope, manchuk teme mayuk jtulale. ¹² Te smelelil senyailetike k'ot ta pasel ta awolilik melel bayal smalib jku'un te at'ejon ta atojolik, sok bayal senyailetik sok te at'elil te bayal yutsilal te pastaj ta awolilik sok te at'elil te bayal yu'ele. ¹³ Jich yu'un ¿bistuuk te ja'exe la akuyik te ja pek'el xan ayex te bit'il te yantik ch'uunjeletike, janax bal yu'un te ma ba la jk'an te ijk'atsil k'oon ta atojolike? ¡Pasbonik perdón teme ch'ayone! ¹⁴ ¡Ilawilik! chapalonix te ya xba jkilex ta yoxebalan buelta. Te jo'one ma jk'an te ijk'atsil ya awayonike, melel ma jk'anbeyex te beluk ay awu'unike. Ja ya jk'anex te ja'exe. Melel te al-nich'ane ma ba ya stsob sbiluk ta stojol te sme'-state, ja ya sk'an te ja te me'el-tatil te ya stsob sbiluk ta stojol te yal-snich'ane. ¹⁵ Jich yu'un te jo'one binax jkot'an ya jkak'beyex spisil te beluk ay jku'une, janix jich binax jkot'an te ya jkak' te jkuxlejal ta awentaike. Teme bayal jk'anojexe, ¿Bistuuk te ma ak'anonik bayal jiche? ¹⁶ Ja na'ojik te ma la jk'an te ijk'atsil k'oon ta atojolike. Jauk me to ay mach'atik te ya yalik te yu'un ay bayal jbijil ta slo'laybelex te jich la jpas in to. ¹⁷ ¿Yu'un ba la jlo'layatik sok tuluk te mach'a la jtikunbeyex tele? ¹⁸ Te jo'one bayal la jkalbey wokol te Tito te ya xba yilexe, sok la jtikun bael sok yan jkermanotik. ¿Yu'un ba te Tito la slo'layex te ja'exe? ¿Yu'un ba ma junuk yakotik ta beel? ¿Yu'un ba yan a te stalele? ¹⁹ ¿Yu'un ba ya akuyik te yakotik ta slektesel jk'oplaltik ta atojolik? ta sit te Diose, te jo'otike yakotik ta k'op ta swenta te Cristo te yakuk xch'iex te ja'exe. ²⁰ Te jo'one ya jxi' teme ma jichuk k'ot jtaex te bit'il ya smulan jkot'ane. Janix jich ya xiw jkot'an yu'un teme ma jichukon ta atojolik te bit'il ya smulan awot'anike. Ya xiw jkot'an yu'un teme jajch' atsakabaik sok teme jajch' paichal, ilimba, sbik'tal ot'anil, letomba k'op, toybajel sok teme kaj ajin abaike. ²¹ Ya xiw jkot'an yu'un teme la yak'on ta k'exlal te Dios te k'alal ya xk'oon ta atojolike. Ya xiw jkot'an teme k'ot jta te mach'atik yakik ta mulwej ta sneelal, teme ma sutojik yot'anik yu'un te beluk ilaiybil sba ta pasele, sok te chijil bak'ete sok te beluk amen ya snopike sok te beluk k'ayemik ta spasele.