TE PABLOE SOK TE LOTIL PUK K'OPETIKE ¹ Ya jk'anbeyex te ja'exe te yakuk ats'ikbonik te banti jowil nax ya xk'opojone. ¡Ja'uk me to ta smelelil yak ats'ikbelonik! ² Melel te jo'one bayal jk'anojex. K'alal la jkak'ex te ya xnujp'inex sok te amamlalike te jo'one bayal te xk'uxul jkot'an ta atojolik jich bit'il k'ux ya yaiyex te Diose. Te jo'one la jkal ta jamal te ya jkak'ex ta stojol Cristo jich bit'il tul ach'ix te ma staoj smule. ³ Jauk me to ya xiw jkot'an yu'un teme ay mach'a la slo'layex jich bit'il laj ta lo'layel te Eva yu'un te sbijil te chane, ya xiw jkot'an yu'un teme ay mach'a la syantesbatik te snopjibal awu'unike sok teme yan be la at'unik baele te ma ja'uk te bay smelelile sok teme yanaj te bit'il jun awot'anik yakex ta xch'uunel te Cristoe. ⁴ Ya xiw jkot'an yu'un melel ya ach'ambey awaiyik stojol te mach'a ya xk'ot xcholbeyex yan sk'oplal te Jesús te bit'il la jcholtik te jo'otike. Sok ya xiw jkot'an yu'un teme la awich'ik yan espíritu te bit'il ta sneelale. Sok teme la atsakik yan mantaliletik te ma jauk te lek yach'il k'ope. ⁵ Melel te jo'one ma ba pek'el xan ayon te bit'il te yantik puk-k'opetik te skuyoj sbaik te ja tuyem xan sk'oplalike. ⁶ Manchuk teme ma ba nojp'tesbilon ta k'op ta stojol te tsobol ants-winiketike ma ba pek'el ay te snopjibal jku'une. Spisil ta chajp' sok ta spisil te beluk aye, te jo'otike la jkak'tik ta na'el stojol ta atojolik. ⁷ ¿La ba jta jmul a te bit'il la jpek'tsan ba swenta jich muk'ub ak'oplalik a te ja'exe? Melel te jo'one majt'anil me te la jcholbeyex awaiyik te lek yach'il k'op yu'un te Diose. ⁸ Te jo'one la me jtsak te koltayel yu'un te yantik ch'uunjeletik ta swenta akoltayelik te ja'exe. ⁹ Te k'alal ayon ta atojolik a sok te k'alal ay jwokol a mayuk mach'a la jkak'bey swokol. Melel te beluk tuun jku'une k'ot yak'bonik te jkermanotaktik te talemik ta Macedoniae. Ta spisil ora ma me la jkak'beyex awokolik te ja'exe, janix jich ya jpas xan bael ta ora to. ¹⁰ Melel te smelelil sk'op te Jkajwaltike ayix ta jtojol, janix jich ta lum Acaya mayuk mach'a ya xju' yu'un te ya sk'ejbon te lamal k'inal ya jkaiye. ¹¹ ¿Bistuuk? ¿Yu'un ba ma jk'anojex te jich ya jkale? sna'oj te Dios te jk'anojexe. ¹² Te beluk yakon ta spasele, ya jpas xan bael, swenta jich ya jlajinbey sk'oplal te sk'op yaiyejik te mach'atik ya sleotik ta k'ope sok te mach'a ya snaliyone, melel ja yakik ta sleel te yakuk yich'ik ich'el ta muk'e, melel ya yalik te pajal yakotik ta at'el soke. ¹³ Melel ja'ik te lotil alwanejetike sok te lotil at'eletike. Skuyoj sbaik te alwanejetik yu'un te Cristoe. ¹⁴ Jauk me to ma me chamuk nax ya jkaiytik yu'un, melel jich uuk te pukuje ya skuy sba ta ch'ul abat yu'un te sakil k'inale. ¹⁵ Ma me chamuk nax ya jkaiytik yu'un teme jichik uuk te abatetik yu'une te ya sk'atbun sbaik ta lekil abatetik yilele. Jauk me to ta slajibal ya me yich'ik te spakol yu'un te yat'elike. ¹⁶ Ya jkalbeyex ta yan buelta: Mame ayuk mach'a ya snop te jo'on ma xk'ot ta jkot'ane. Jauk me to teme ay mach'a jich ya snope, ma me xa abajonik yu'un, ik'a me awonik jich me ya jkak'ba ich'el ta muk' tebuk. ¹⁷ Te beluk yakon ta yalel yu'un te jkak'ojba ta ich'el ta muk'e ma sk'an te Jkajwaltike, jich yakon ta k'op te bit'il mach'a ma xch'uune. ¹⁸ Melel ay bayal ants-winiketik te ya yak' sbaik ta ich'el ta muk' yu'un te sbak'etalike, janix jichon uuk ya jkak' ba ta ich'el ta muk' uuk. ¹⁹ Melel te ja'exe binax awot'anik ya ats'ikik te mach'atik ma sk'an xch'uunike, ¡ja kuyoj abaik te bijexe! ²⁰ Melel ja ts'ikojik teme ay mach'a ya yak'ex ta esclavoinele, teme ay mach'a ya yich'beyex spisil te beluk ay awu'unike, sok teme janax ya yilbeyex awot'anike, te ya skuy sbaik te ja muk' xan sk'oplalik te bit'il ja'exe, sok teme ya xt'axatik ta majele. ²¹ Ya xk'exwon ta yalel te bit'il ma ju' jku'untik te jich la jpastik te jo'otike, jich yakon ta k'op te bit'il mach'a ya yak' sba ta ich'el ta muk' yu'un spisile, janix jichon uuk ya jkak'ba ich'el ta muk'. ²² ¿Hebreoetik ba? janix jichon uuk. ¿Israelitaetik ba? janix jichon uuk. ¿Sts'umbalik ba te Abrahame? janix jichon uuk. ²³ ¿Abatetik ba yu'un te Cristoe? (Manchuk me jowelon ya'el te bit'il ya xk'opojone) jauk me to ja k'ax abaton xan te bit'ilike. Te jo'one k'axemon ta bay tulan at'elil, bayal ochemon ta chukel, bayal majel jkich'oj sok bayal buelta te k'an smilonike. ²⁴ Te judioetike la yak'bonik jo'eb buelta te "majel te jun ma sts'akaj cha'winik te yajtalulej." ²⁵ Oxeb buelta la jkich' majel ta wajch'. Jun buelta la xch'ojonik ta ton. Oxeb buelta t'umaj koel te jbarcotike. K'ax jku'un jun ajk'ubal sok jun k'aal te xkajeton ta sba te mare. ²⁶ Bayal buelta beenemonix te banti xi'bantik sba te muk'ul ja'etike, sok te xi'bantik sba te elek'etike, sok te ma lekuk te jlumale, sok te banti xi'bantik sba te yan lumetike, sok te bay xi'bantik sba te muk'ul lumetike, sok te banti xi'bantik sba te jochol takin k'inale, sok te bay te xi'bantik sba te maretike sok te bay yolil te lotil jkermanotaktike. ²⁷ Te jo'one tulan at'ejemon sok bayal k'axem jwokol, bayal ajk'ubal te ma wayone, k'axemon a te wi'nale sok te takin ti'ile, bayal buelta te la jkom jwe'ele, sok k'ax jwokol ta sik yu'un te t'analone. ²⁸ Ma jipuk nax a in to, ta jujun k'aal sut'ojon ya jkaiy ta jkot'an yu'un spisil te ch'uunjeletike. ²⁹ Teme ay mach'a mayuk yip ya jkile janix jichon uuk ya spejk'tsaj te jkipe, te jo'one amen ya jkil te mach'a ya yak' xyal ta mulil te yane. ³⁰ Teme ya jkak'ba ta ich'el ta muk'e, ja me ya jkak'ba ta ich'el ta muk' te k'alal mayuk te jkipe. ³¹ Te Dios te Stat te Jkajwaltik Jesucristoe te mach'a ich'bil ta muk' ta sbajt'el k'inale, ¡ja sna'oj te ma yakon ta spasel lote! ³² Ta lum Damasco, te ajwalil te ak'bil jilel yu'un te muk' ajwalil Aretase yak ta skanantayel a te muk'ul lum Damascoe melel ya sk'an stsakonik a. ³³ Jauk me to la skojt'esonik ta jun moch ta banti sventanail te muroe jich kolon ta sk'abik.