PABLO YA XK'OPOJ YU'UN TE YAT'ELE ¹ Jo'on, Pabloon, ya jkalbeyex bayal wokol ta swenta yutsil sok slekil yot'an te Cristoe. Te jo'one pek'el me ya jkak'ba te k'alal joinejexe, jauk me to tulan me ya jkalbeyex te k'alal najt' ayon ta atojolike. ² Ya jkalbeyex wokol te manchuk me ya awak'ik te tulan ya jkalbey te mach'atik amen ya yalbotik jk'oplaltike, melel ja ya yalik te ja yakotik ta spasel spisil in to ta swenta nax jbak'etaltik. ³ Melel, manchuk teme jkich'ojtik te jbak'etaltike, ma ba ya jkaiytik kerajel jich bit'il ya smulan te jbak'etaltike. ⁴ Melel te jkat'ibtik te ya jkaiytik tsalaw a ma ba ch'ich' bak'et. Jauk me to ay me yu'elik te talem ta ch'ulchane swenta yu'un jich ya sjin spisil te yu'el te beluk ma lekuke. Ya sjin spisil te k'op-ayej te ya xlo'laywane. ⁵ Janix me jichotik uuk ya me jintilaytik te beluk ya smakotik te bit'il ya jna'beytik sba te Diose. Te jo'otike ja ya jkak'tik ta ilel te ja ya sk'an jch'uuntik te Cristoe. ⁶ Sok te jo'otike ya me jchajp'anbatik te ya jkak'beytik kastigo te mach'atik ma xch'uunik te mantale, ja to teme la jch'uuntik ta jpisiltike. ⁷ Te ja'exe ja ya awilik te beluk ya yil te asitike. Teme ay mach'a xch'uunej ta yot'an te ja ayix ta swenta te Cristoe, ayuk me ta sjol te bit'il ayix ta stojol Cristo, janix me jichotik uuk. ⁸ Manchuk me tulan ya jkalbeyex, jauk me to ma xk'exawon melel ya jna' te ja la yak'bon yip jkot'an te Jkajwaltik te la jkalbeyexe, ma yu'unuk ja jinelik, ja yu'un te yakuk xch'iex a, jich yu'un te ma xk'exawon ta yalbelexe. ⁹ Ma me xa kuyik te yu'un yakon ta yotsesbelex xi'wel yu'un te beluk la jts'ibuybatike. ¹⁰ Melel ay mach'a ya yal: "Te ts'ibubil jun yu'une tulan ya yal sok ay yip, jauk me to te sbak'etale mayuk yip. Ma snujp'in te ya jkaiybeytik stojol te sk'ope." ¹¹ Jai ants-winik bi aka me yich'ik ta muk' te beluk la jts'ibuytik ta jun te k'alal ma joinejtikex a, melel janix me jich ya xchiknaj ta ilel te k'alal ya xk'ootike. ¹² Te jo'otike ma ba ya jkiltik sok ma ba ya jpajbatik sok te mach'atik ya yak' sbaik ta ich'el ta muk'e. Jauk me to te k'alal ya stoy sbaik sok ya spaj sbaik sok te yantike ja ya yak'ik ta ilel te mayuk snopjibal yu'unike. ¹³ Yan te jo'otike ma xjelawotik ta k'axem to xan te banti ma jwentatikuke. Ja Dios stukel te la sbisbotik ta bay k'alal ya x-at'ejotike sok ja la stikunotik ta banti ayexe. ¹⁴ Melel ma ba ya jtoyba yu'un te ja neel k'oon ta atojolike. Jootik k'ootik neel ta xcholel te lek yach'il k'op ta swenta te yakuk asujt'es awot'anik ta stojol te Cristoe. ¹⁵ Te jo'otike ma ba ya jtoybatik yu'un te beluk ma ja'uk jpasojtike. Jauk me to ja ya jk'an te yakuk x-at'ejon xan bayal ta awolilik jich me ya xmuk'ub xan te xch'uunjel awot'anik, jich me ya xmuk'ub xan te jkat'eltik sok jich me ya xpujk' xan bael te bay ma to k'oemuke. ¹⁶ Ja jich ya sk'an jkot'antik te yakuk xba jcholtik te lek yach'il k'op ta k'axel to xan a te banti ayexe. Ja ya jk'antik x-at'ejotik te banti mayuk mach'a at'ejeme swenta yu'un jich mayuk mach'a ya yal a te yakotik jkak'bel jbatik ta ich'el ta muk' ta swenta yat'el te yane. ¹⁷ "TEME AY MACH'A MUK' NAX K'INAL YA YAIYE, JAUK ME TA SWENTA TE JKAJWALTIKE." ¹⁸ Melel ma jauk ya yich' ich'el ta muk' te mach'a janax lek ya yalbey sba sk'oplale, ja me te mach'a lek sk'oplal yu'un te Jkajwaltike.