¹ Ja yoxebalix buelta te ya xboon ta atojolike. "TEME AY MACH'A YA YICH' KONTROINEL TA K'OPE YA ME SK'AN TE AY CHEB O OXEB TESTIGO YU'UNE." ² Jkalojbeyix te mach'atik la yaiyik mulwej ta sneelale sok spisil te mach'atik le' ayik a te k'alal k'oon ta xchebal buelta, sok janix jich ya jkal ta ora to: Teme k'oone mayuk me mach'a ya jna'bey yobolil sba. ³ Jich ya jkalbeyex to, melel te ja'exe ja yakex ta sk'anel te yakuk awilik te ja yak ta k'op te Cristo ta jtojole. Te Jkajwaltike ma ba yu'un ya yak' ta ilel te pek'el ay ta atojolike, ja ya yak' ta ilel te ay yu'el ta atojolike. ⁴ Melel ta swenta te bit'il pek'el la yak' sba la yich' ik'el bael ta jijp'anel ta cruz, jauk me to kuxul ta swenta te yu'el te Diose. Ja swenta te jich pek'el ayotik ta stojole, jauk me to ya xkuxinotik ta swenta te yu'el te Dios ta awolilike. ⁵ Nopa awaiyik te ja'exe teme ay xch'uunjel awot'anike. Tsajtaya me abaik ta lek ta juju tul. ¿Yu'un ba ma ana'ojik te ay ta atojolik te Jkajwaltik Jesucristoe? Jauk me to ma me ayukex ta stojol teme ma k'axex te pruebajele. ⁶ Te jo'one ya jk'an te yakuk ja na'ik te ju' jku'untik sk'asesel te pruebaetike. ⁷ Jich yu'un ta ora to yakotik ta sk'oponel Dios ta awentaik te manchuk ya apasik te beluk amen ta pasele. Ma jauk ya jk'opon Dios yu'un te lekuk jk'oplaltik te jo'otike. Jauk me to, ja yakotik ta sk'oponel Dios yu'un te jauk yakukex ta spasel te beluk lek ta pasele, manchuk teme ma lek jk'oplaltik te jo'otike. ⁸ Melel te jo'otike ma stak' ya jkontrointik te smelelile, melel ja ya jk'antik te beluk smelelile. ⁹ Melel te jo'otike binax jkot'antik yu'un te k'alal mayuk te jkiptike yan te ja'exe ay awipik yu'un. Janix jich ya jk'opontik Dios yu'un te yakuk awich'ik utstesele. ¹⁰ Ya me jts'ibubeyex spisil in to manchuk me k'ejel to ayon, swenta jich te k'alal ya xk'oon ta atojolike ma me yejt'aluk te ya jk'oponex tulane, jich bit'il yak'ojbon tulan jkat'el te Jkajwaltike, ja me yu'un te yakuk xch'iexe ma me jauk yu'un te ya jinexe. ¹¹ Ta slajibal, jkermanotak, ¡binuk nax me awot'anik! at'ejanik me swenta jich yakukex ta ch'iel ta spisil ora, ayuk me smuk'ul k'inal ya awaiyik, junuk me ayukex sok te yantike, kuxinanik me sok lamal k'inal. Jich me te Dios yu'un te xk'uxul ot'anile sok te lamal k'inale ay me ta atojolik. ¹² Patbeya me abaik awot'anik ta tulu tul ta swenta ch'ul ujts'iyel. ¹³ Spisil te ch'uunjeletike ya me yak'beyex spatjibal awot'anik. ¹⁴ Te yutsil yot'an te Jkajwaltik Jesucristoe, te xk'uxul yot'an te Diose, sok te Ch'ul Espíritue te jun ayotik soke ayuk me ta atojolik. Jichuk.