¹ Phimaana, assun'naka attakhattifu, asipathani owiihaniya wo wiirimo, mwakhalihe ethu arumei ni aholeli anamukutho olaphululawihu, Yesu. ² Yena ahonroromela Muluku N'helaliaawe, ntoko Moises tjariaawe ni nupa yoteene ya Muluku. ³ Kontha Yesu ahokhalihiya ophwanela nu waaria tjinene ovirikana ni Moises, kontha yoole noteka enupa ya Muluku hana nttittimiho muulupale ovirikanatho ni nupaaya. ⁴ Kontha enupa yooteene enaatekiya ni nthu, massi namateka tjotheene Muluku. ⁵ Wo mphantti m'motj, Moises, ari owaamani ntoko eenupa yooteene ya Muluku, wo opheela ovaha osaahiti mwa tjithu tjahala ohimiya nuu hoolo. ⁶ Wo mphsntti nkhwaawe, Kristo narieene Mwaana rii watjuluwaya enupa ya Muluku, ni nari hivano, nakhala olipa omaleliaa ni wittittimiha wokhuluvela wihu. ⁷ Phimaana, ntoko tjihimaliaaya N'nepa Nttakattifu: "Elelo, winwa ntju nawe, ⁸ n'hilipihe nrimen'nhu ntoko tjihininwelelen'nhu, owakathi wolawihiya muthakoni. ⁹ Eyo ehiiraniaa owakathi an'napaapen'nhutjahinwelelen'nhu, Akittehattehaka, mwaakha arupaini, ayenatja ahoona Mitekotjaka. ¹⁰ Massi mi kihokhala oviruwela nikhoton'ne. Mi kihiira: "Ayenatja ahokhala owettiheriya ni mirimatjaya, ni khayatjuwelale Ephirotjaka. ¹¹ Philaphaliaaka tjo mu Viruwani waka: Ayenatja khan'hala okela moomumulani waka. ¹² Nkhale owirattavenla, assun'naka, wo wiira hikhumenle eriyari winhu nrima wootakhala, nrima onihattussa wa Muluku nkumi. ¹³ Massi, mwilipihere nthu ninkhuaawe wakuta nihuku, ni nihuku nihaniyaka "Elelo", wo wiira wa nhuva hikhale nthu n'hala okhala olipihiya muthepiani wo tampi. ¹⁴ Phimaana nikhalenleehu mphantti mwa Kristo nasunkaka woolipa mpaka wemaleloni nu khuluvela orineehu ni Yena wupatjeroni. ¹⁵ Wa yeeyo phineriyaaya: "Olelo, muinwaka Ntjuunawe, n'hilipihe mirimatjinhu, ntoko tjaariaaya ohinweleliyaka". ¹⁶ Vano thaapani yinwale ntju na Muluku, ahinwenlale? Kahi oteene yaaale Moises akumihaliaawe wEgito? ¹⁷ Ni wa yaayo Muluku aviruwenliaawe mwaakha arupaini? Khayari yathekale, ni eruthutjaya tjikhwelaka muuthakoni? ¹⁸ Wa yaale Yena alaphaliaawe wiira khayaahala okela Moomumulani waya, wahikhanle yaale Ahimwinwelelale? ¹⁹ Vano noone, ayenatja khayakelatjale Moomumulani waya, mwaha wolipiha nrima.