¹ Unapoketi kula pamoja na mtawala, angalia kwa uangalifu kilichopo mbele yako, ² na kama ni mtu unayependa kula chakula sana weka kisu kooni. ³ Usitamani vinono vyake maana ni chakula cha uongo. ⁴ Usifanye kazi sana ili kupata mali; uwe na busara ya kutosha ili ujue wakati wa kuacha. ⁵ Je utaruhusu macho yako yaangaze juu yake? Itaondoka, maana itavaa mabawa kama tai na kuruka angani. ⁶ Usile chakula cha yule mwenye jicho baya na usiwe na shauku ya vinono vyake, ⁷ maana ni mtu mwenye kuhesabu gharama ya chakula. "Kula na kunywa!" anakuambia, lakini moyo wake haupo pamoja nawe. ⁸ Utatapika kiasi kidogo ulichokula na utakuwa umepoteza sifa zako njema. ⁹ Usiongee katika usikivu wa mpumbavu, maana atadharau hekima ya maneno yako. ¹⁰ Usihamishe jiwe la mpaka wa kale au kunyang'anya mashamba ya yatima, ¹¹ maana Mkombozi wao ni imara na atatetea kesi yao dhidi yako. ¹² Elekeza moyo wako katika mafundisho na masikio yako kwenye maneno ya maarifa. ¹³ Usizuie kuadilisha mtoto, maana ukimchapa kwa fimbo, hatakufa. ¹⁴ Ni wewe unayepaswa kumchapa kwa fimbo na kuiokoa nafsi yake kuzimu. ¹⁵ Mwanangu, kama moyo wako una busara, basi moyo wangu utafurahi pia; ¹⁶ sehemu zangu ndani kabisa zitafurahi sana midomo yako inaponena haki. ¹⁷ Usiruhusu moyo wako kuwahusudu wenye dhambi, lakini endelea kumcha Yehova siku zote. ¹⁸ Hakika tumaini lako halitaondolewa na siku zako za hapo baadaye. ¹⁹ Sikia wewe! mwanangu, na uwe mwenye busara na uelekeze moyo wako katika njia. ²⁰ Usishirikiane pamoja na walevi, au pamoja na walaji wa nyama walafi, ²¹ maana mlevi na mlafi wanakuwa masikini na usingizi utawavika kwa matambara. ²² Msikilize baba yako ambaye alikuzaa na usimdharau mama yako wakati akiwa mzee. ²³ Inunue kweli, lakini usiiuze; nunua hekima, nidhamu, na ufahamu. ²⁴ Baba yake mwenye haki atafurahia sana, na yule amzaaye mtoto mwenye busara atamfurahia. ²⁵ Mfurahishe baba yako na mama yako na yule aliyekuzaa afurahie. ²⁶ Mwanangu, nipe moyo wako na macho yako yachunguze njia zangu. ²⁷ Maana malaya ni shimo refu, na mke wa mume mwingine ni kisima chembamba. ²⁸ Anavizia kama mnyang'anyi na huongeza idadi ya wadanganyifu miongoni mwa wanadamu. ²⁹ Nani mwenye taabu? Nani mwenye huzuni? Nani mwenye mapigano? Nani mwenye malalamiko? Nani mwenye majeraha bila sababu? Nani mwenye macho mekundu? ³⁰ Ni wale ambao wakaao kwenye mvinyo, wale wanaojaribu kuchanganya mvinyo. ³¹ Usiutazame mvinyo ukiwa mwekundu, wakati unametameta kwenye kikombe na kutelemka kwa uraini. ³² Mwisho wake unauma kama nyoka na sumu yake kama kifutu. ³³ Macho yako yataona vitu vigeni na moyo wako utatamka vitu vya ukaidi. ³⁴ Utakuwa kama anayelala kwenye bahari au anayelala juu ya mlingoti. " ³⁵ Wamenipiga," utasema, " lakini sikuumia. Wamenichapa, lakini sikuwa na hisia. Nitaamka lini? Nitatafuta kinywaji kingine."