¹ Moyo wa mfalme ni mfereji wa maji katika mkono wa Yehova; anaugeuza popote anakopenda. ² Kila njia ya mtu ni sawa katika macho yake mwenyewe, lakini ni Yehova anayeipima mioyo. ³ Kutenda haki na adili hukubaliwa zaidi na Yehova kuliko sadaka. ⁴ Macho ya kiburi na moyo wa majivuno taa ya waovu ni dhambi. ⁵ Mipango ya mwenye juhudi huelekea kwenye mafanikio tu, bali kila mtu anayetenda kwa haraka huelekea umasikini. ⁶ Kujipatia utajiri kwa ulimi wa uongo ni mvuke unaopita upesi na mtego ambao unafisha. ⁷ Vurugu ya waovu itawaburuta mbali, maana wanakataa kutenda haki. ⁸ Njia ya mwenye hatia ni ukatiri, bali mwenye usafi hutenda yaliyo ya haki. ⁹ Bora kuishi kwenye kona ya juu darini kuliko katika nyumba pamoja na mke mgomvi. ¹⁰ Hamu ya mwovu ni uchu wa mabaya; jirani yake haoni ukarimu katika macho yake. ¹¹ Mwenye dhihaka anapoadhibiwa mjinga hupata busara, na mtu mwenye busara anapofundishwa, anaongeza maarifa. ¹² Atendaye haki huilinda nyumba ya mwovu; huwashusha waovu kwenye uharibifu. ¹³ Anayeziba masikio yake kwenye kilio cha masikini, pia atalia, lakini hatajibiwa. ¹⁴ Zawadi ya siri hutuliza hasira na zawadi ya kificho hutuliza ghadhabu kuu. ¹⁵ Haki ikitendeka, huleta furaha kwa mwenye kutenda wema, lakini huleta hofu kubwa kwa watenda mabaya. ¹⁶ Yule anayezurura kutoka kwenye njia ya ufahamu, atapumzika kwenye kusanyiko la wafu. ¹⁷ Anayependa raha atakuwa masikini; anayependa divai na mafuta hawezi kuwa tajiri. ¹⁸ Mtu mbaya ni fidia kwa yule atendaye haki, na mdanganyifu ni fidia kwa waaminifu. ¹⁹ Bora kuishi jangwani kuliko kuishi pamoja na mwanamke ambaye huchochea sana ugomvi na malalamiko. ²⁰ Hazina yenye thamani na mafuta vipo nyumbani kwa mwenye busara, bali mtu mpumbavu huviharibu. ²¹ Mtu atendaye haki na mwema huyu mtu hupata uzima, haki na heshima. ²² Mtu mwenye busara huupima mji wa mashujaa, na huiangusha ngome wanayoitumaini. ²³ Anayelinda kinywa chake na ulimi wake hujilinda mwenyewe na taabu. ²⁴ Mtu mwenye kiburi na maringo " Dhihaka" ndilo jina lake hutenda kwa majivuno na kujidai. ²⁵ Shauku ya mtu mvivu itamuua, maana mikono yake hukataa kufanya kazi. ²⁶ Kwa siku nzima hupatwa na uchu na uchu zaidi, lakini atendaye haki hutoa na wala hazuii. ²⁷ Sadaka ya mwovu ni chukizo; huwa ni chukizo zaidi anapoileta kwa nia mbaya. ²⁸ Shahidi wa uongo ataangamia, bali anayesikiliza ataongea kwa muda wote. ²⁹ Mtu mwovu huufanya uso wake kuwa mgumu, bali mtu mwadilifu ni thabiti juu ya njia zake. ³⁰ Hakuna hekima, hakuna ufahamu, na hakuna shauri linaloweza kusimama kinyume na Yehova. ³¹ Farasi hutayarishwa kwa siku ya mapigano, lakini ushindi hupatikana kwa Yehova.