¹ Divai ni dhihaka na kinywaji kikali ni mgomvi; anayepotea kwa kunywa hana busara. ² Kumwogopa mfalme ni kama kumwogopa simba kijana aungurumaye, yeyote anayemkasirisha hutoa fidia ya maisha yake. ³ Ni heshima kwa mtu yeyote kujiepusha na mafarakano, bali kila mpumbavu hurukia kwenye mabishano. ⁴ Mtu mvivu halimi majira ya kipupwe; hutafuta mazao wakati wa mavuno lakini hapati kitu. ⁵ Makusudi ndani ya moyo wa mtu ni kama maji yenye kina, bali mtu mwenye ufahamu huyateka. ⁶ Mara nyingi mtu husema yeye ni mwaminifu, lakini ni nani awezaye kumpata yule mwaminifu? ⁷ Mtu atendaye haki hutembea katika uaminifu wake na wana wake wanaofuata baada yake wanafuraha. ⁸ Mfalme anayeketi kwenye kiti cha hukumu akifanya kazi za kuhukumu hupembua kwa macho yake mabaya yote yaliyoko mbele yake. ⁹ Nani anayeweza kusema, "Nimeuweka safi moyo wangu; nipo huru na dhambi zangu"? ¹⁰ Mizani tofauti na vipimo visivyosawa Yehova huvichukia vyote. ¹¹ Hata kijana hujulikana kwa matendo yake, kwa mwenendo wake kama ni safi na uadilifu. ¹² Masikio yanayosikia na macho yanayoona Yehova aliyafanya yote. ¹³ Usipende usingizi au utakuwa masikini; fumbua macho yako na utakuwa na vyakula tele. ¹⁴ "Mbaya! Mbaya!" anasema mnunuzi, lakini akiondoka anajisifu. ¹⁵ Ipo dhahabu na mawe ya thamani, lakini midomo yenye maarifa ni kito cha thamani. ¹⁶ Chukua vazi kama mmiliki wake ataweka fedha kama dhamana kwa deni la mgeni, na lichukue kama anaweka dhamana kwa uzinifu. ¹⁷ Mkate uliopatikana kwa ulaghai unaladha tamu, lakini baadaye kinywa chake kitajaa kokoto. ¹⁸ Mipango huimarishwa kwa ushauri na kwa mwongozo wa busara utapigana vita. ¹⁹ Mmbea hufunua siri na kwa hiyo hupaswi kushirikiana na watu ambao huongea sana. ²⁰ Kama mtu atamlaani baba yake au mama yake, taa yake itapulizwa katikati ya giza. ²¹ Urithi uliopatikana mwanzoni kwa haraka utakuwa na mema kidogo mwishoni. ²² Usiseme " Mimi nitakulipiza kwa kosa hili" Msubiri Yehova na yeye atakuokoa. ²³ Yehova huchukia mizani isiyo sawa na vipimo vya udanganyifu si vizuri. ²⁴ Hatua za mtu huongozwa na Yehova; namna gani basi ataifahamu njia yake? ²⁵ Ni mtego kwa mtu kusema kwa pupa, " Kitu hiki ni kitakatifu" na kuanza kufikiri juu yake kwamba kina maana gani baada ya kufanya kiapo. ²⁶ Mfalme mwenye busara huwapepeta waovu na huligeuza juu yao gurudumu la kupuria. ²⁷ Roho ya mtu ni taa ya Yehova, hutafiti sehemu zake zote za ndani kabisa. ²⁸ Agano la uaminifu na udhamini humhifadhi mfalme; kiti chake cha enzi hufanywa thabiti kwa upendo. ²⁹ Utukufu wa watu vijana ni nguvu zao na fahari ya watu wazee ni mvi zao. ³⁰ Mapigo yanayoleta kidonda huusafisha ubaya na vichapo hufanya sehemu za ndani kabisa kuwa safi.