¹ Jawabu la upole huondoa ghadhabu, bali neno la ukatili huchochea hasira. ² Ulimi wa mtu mwenye hekima husifu maarifa, bali kinywa cha wapumbavu humwaga upuuzi. ³ Macho ya Yehova yapo kila mahali, yakiwatazama juu ya waovu na wema. ⁴ Ulimi unaoponya ni mti wa uzima, bali ulimi wa udanganyifu huvunja moyo. ⁵ Mpumbavu hudharau marudi ya baba yake, bali yeye anayejifunza kutokana na masahihisho ni mwenye hekima. ⁶ Katika nyumba ya wale watendao haki kuna hazina kubwa, bali mapato ya watu waovu huwapa taabu. ⁷ Midomo ya wenye hekima husambaza maarifa, bali mioyo ya wapumbavu haifanyi hivyo. ⁸ Yehova anachukia sadaka za watu waovu, bali maombi ya watu waadilifu ndiyo furaha yake. ⁹ Yehova anachukia njia ya watu waovu, bali anampenda yule ambaye huandama haki. ¹⁰ Marudi ya ukatili hungojea kwa yeyote ambaye huiacha njia na yule ambaye huchukia masahihisho atakufa. ¹¹ Kuzimu na uharibifu vipo wazi mbele za Yehova; je si zaidi sana mioyo ya wana wa wanadamu? ¹² Mwenye mzaha huchukia masahihisho; hatakwenda kwa wenye hekima. ¹³ Moyo wenye furaha husababisha uchangamfu wa uso, bali huzuni huvunja moyo. ¹⁴ Moyo wa mwenye ufahamu hutafuta maarifa, bali kinywa cha wapumbavu hujilisha kwenye upuuzi. ¹⁵ Siku zote za watu waliokandamizwa ni taabu, bali moyo wenye furaha unakaramu daima. ¹⁶ Bora kitu kidogo pamoja na kumcha Mungu kuliko hazina kubwa pamoja na ghasia. ¹⁷ Bora mlo wenye mboga kukiwa na upendo kuliko kuandaliwa ndama aliyenona kwa chuki. ¹⁸ Mtu mwenye hasira huchochea mabishano, bali mtu ambaye hukawia kukasirika hutuliza ugomvi. ¹⁹ Mapito ya mtu goigoi ni kama sehemu yenye uzio wa miiba, bali mapito ya mtu mwadilifu ni njia kuu iliyojengwa imara. ²⁰ Mwana mwenye busara huleta furaha kwa baba yake, bali mtu mpumbavu humdharau mama yake. ²¹ Upuuzi humfurahia mtu ambaye amepungukiwa akili, bali mwenye ufahamu hutembea katika njia nyofu. ²² Mipango huharibika ambapo hakuna ushauri, bali washauri wengi wanafanikiwa. ²³ Mtu anapata furaha wakati anapotoa jibu la kufaa; je ni zuri kiasi gani neno kwa wakati muafaka! ²⁴ Njia ya uzima huwapeleka juu watu wenye hekima, ili waondoke kutoka chini kuzimu. ²⁵ Yehova hurarua urithi wa mwenye kiburi, bali huzilinda mali za mjane. ²⁶ Yehova huyachukia mawazo ya watu waovu, bali maneno ya upole ni safi. ²⁷ Mporaji huleta shida kwenye familia yake, bali yeye ambaye huchukia rushwa ataishi. ²⁸ Moyo wa yule atendaye haki hutafakari kabla ya kujibu, bali kinywa cha watu waovu humwanga ubaya wake wote. ²⁹ Yehova yupo mbali na watu waovu, bali husikia maombi ya wale watendao haki. ³⁰ Nuru ya macho huleta furaha moyoni na habari njema ni afya kwenye mwili. ³¹ Kama utazingatia wakati mtu anapokurekebisha jinsi ya kuishi, utabaki miongoni mwa watu wenye busara. ³² Yeye anayekataa karipio hujidharau mwenyewe, bali yule asikilizaye masahihisho hujipatia ufahamu. ³³ Kumcha Yehova hufundisha hekima na unyenyekevu huja kabla ya heshima.