¹ Mwanamke mwenye busara huijenga nyumba yake, bali mwanamke mpumbavu huibomoa kwa mikono yake mwenyewe. ² Yeye aendaye kwa uaminifu humcha Yehova, bali mkaidi humdharau katika njia zake. ³ Katika kinywa cha mpumbavu hutoka chipukizi la kiburi chake, bali midomo ya wenye busara itawalinda. ⁴ Pale pasipo na mifugo hori la kulishia ni safi, bali mazao mengi huweza kupatikana kwa nguvu za maksai. ⁵ Shahidi mwaminifu hasemi uongo, bali shahidi wa uongo hupumua uongo. ⁶ Mwenye dharau hutafuta hekima na hakuna hata, bali maarifa huja kwa urahisi kwa mwenye ufahamu. ⁷ Nenda mbali kutoka kwa mtu mpumbavu, maana hutapata maarifa kwenye midomo yake. ⁸ Hekima ya mtu mwenye busara ni kuifahamu njia yake mwenyewe, bali upuuzi wa wapumbavu ni udanganyifu. ⁹ Wapumbavu hudharau wakati sadaka ya hatia inapotolewa, bali miongoni mwao waaminifu hushiriki fadhila. ¹⁰ Moyo unayajua machungu yake mwenyewe na hakuna mgeni anayeshiriki furaha yake. ¹¹ Nyumba ya waovu itaangamizwa, bali hema ya watu waaminifu itasitawi. ¹² Kuna njia ambayo huonekana sawa kwa mtu, lakini mwisho wake huelekea mauti tu. ¹³ Moyo unaweza kucheka lakini bado ukawa katika maumivu na furaha inaweza kukoma ikawa huzuni. ¹⁴ Yule asiye mwaminifu atapata anachostahili kwa njia zake, bali mtu mwema atapata kilicho chake. ¹⁵ Yeye ambaye hakufundishwa huamini kila kitu, bali mtu mwenye hekima huzifikiria hatua zake. ¹⁶ Mtu mwenye hekima huogopa na kutoka kwenye ubaya, bali mpumbavu huliacha onyo kwa ujasiri. ¹⁷ Yeye ambaye anakuwa na hasira kwa haraka hufanya mambo ya kipumbavu, na mtu anayefanya hila mbaya huchukiwa. ¹⁸ Wajinga hurithi upumbavu, lakini watu wenye hekima wamezingirwa kwa maarifa. ¹⁹ Hao ambao ni waovu watainama mbele yao walio wema na wale wenye uovu watasujudu kwenye malango ya wenye haki. ²⁰ Mtu masikini huchukiwa hata na marafiki zake, bali watu matajiri wanamarafiki wengi. ²¹ Yeye ambaye huonyesha dharau kwa jirani yake anafanya dhambi, bali yule ambaye huonyesha fadhila kwa masikini anafuraha. ²² Je wale wanaofanya njama mbaya hawapotei? Bali wale wenye mpango wa kutenda mema watapokea agano la uaminifu na udhamini ²³ Katika kazi zote ngumu huja faida, bali palipo na maongezi tu, huelekea kwenye umasikini. ²⁴ Taji ya watu wenye busara ni utajiri wao, bali upuuzi wa wapumbavu huwaletea upuu zaidi. ²⁵ Shahidi mkweli huokoa maisha, bali shahidi wa uongo hupumua uongo. ²⁶ Mtu anapokuwa na hofu ya Yehova, pia anakuwa na matumaini zaidi ndani yake; vitu hivi vitakuwa kama sehemu imara ya ulinzi kwa watoto wa mtu huyu. ²⁷ Kumcha Yehova ni chemchemi ya uzima, ili kwamba mtu aweze kujiepusha kutoka katika mitego ya mauti. ²⁸ Utukufu wa mfalme upo katika idadi kubwa ya watu wake, bali pasipo watu mfalme huangamia. ²⁹ Mtu mvumilivu anaufahamu mkubwa, bali mtu mwepesi wa kuhamaki hukuza upuuzi. ³⁰ Moyo wenye raha ni uzima wa mwili, bali husuda huozesha mifupa. ³¹ Anayemkandamiza masikini humlaani Muumba wake, bali anayeonyesha fadhila kwa wahitaji humtukuza yeye. ³² Mtu mwovu huangushwa chini kwa matendo yake mabaya, bali mtu mwenye haki anakimbilio hata katika kifo. ³³ Hekima hukaa katika moyo wa ufahamu, bali hata miongoni mwa wapumbavu hujiachilia mwenyewe kwa kujulikana ³⁴ Kutenda haki huliinua taifa, bali dhambi ni chukizo kwa watu wowote. ³⁵ Fadhila ya mfalme ni kwa mtumishi mwenye kutenda kwa hekima, bali hasira yake ni kwa yule atendaye kwa kuaibisha.