¹ Mipango ya moyo ni ya mtu, bali Yehova hutoa jawabu kutoka kwenye ulimi wake. ² Njia zote za mtu ni safi kwenye macho yake mwenyewe, bali Yehova huipima mioyo. ³ Kabidhi kwa Yehova kazi zako zote na mipango yako itafanikiwa. ⁴ Yehova alifanya kila kitu kwa kusudi lake, hata waovu kwa ajili ya siku ya taabu. ⁵ Yehova anamchukia kila mtu mwenye moyo wa majivuno, ingawa wanasimama imara, hawakosi kupata adhabu. ⁶ Kwa agano la uaminifu na udhamini uovu husafishwa na kwa kumcha Yehova watu hujitenga na ubaya. ⁷ Njia za mtu zinapompendeza Yehova, huwafanya hata adui zake huyo mtu wawe na amani naye. ⁸ Bora kitu kidogo pamoja na haki, kuliko mapato makubwa pamoja na udhalimu. ⁹ Katika moyo wake mtu hunuia njia yake, bali Yehova huziongoza hatua zake. ¹⁰ Mshauri yupo katika midimo ya mfalme, katika hukumu kinywa chake hakisemi kwa udanganyifu. ¹¹ Vipimo vya kweli hutoka kwa Yehova; uzito wote kwenye gunia ni kazi yake. ¹² Wafalme wanapofanya mambo maovu, hicho ni kitu cha kudharauliwa, kwa maana utawala huimarishwa kwa kutenda haki. ¹³ Mfalme hufurahia midomo ambayo husema haki na anampenda mwenye kusema waziwazi. ¹⁴ Hasira ya mfalme ni mjumbe wa mauti lakini mtu mwenye busara atajaribu kutuliza hasira yake. ¹⁵ Katika nuru ya uso wa mfalme ni uzima na fadhila yake ni kama wingu linaloleta mvua ya masika. ¹⁶ Ni bora kiasi gani kupata hekima kuliko dhahabu. Kuchagua kupata ufahamu ni zaidi kuliko fedha. ¹⁷ Njia kuu ya watu waadilifu hujitenga na ubaya; mwenye kuyahifadhi maisha yake huilinda njia yake. ¹⁸ Kiburi hutangulia kabla ya uharibifu na moyo wa kujivuna kabla ya maangamizi. ¹⁹ Ni bora kunyenyekea miongoni mwa watu masikini kuliko kugawana ngawira pamoja watu wenye kiburi. ²⁰ Mwenye kutafakari yaliyofundishwa hupata kilicho chema na wenye kumtumaini Yehova watafurahi. ²¹ Mwenye hekima moyoni anaitwa ufuhamu na utamu wa hotuba huongeza uwezo wa kufundisha. ²² Ufahamu ni chemchemi ya uzima kwake ambaye nayo, bali adhabu ya wapumbavu ni upumbavu wao. ²³ Moyo wa mtu mwenye hekima hutoa busara katika kinywa chake na huongeza ushawishi katika midomo yake. ²⁴ Maneno yenye kufaa ni sega la asali -matamu kwenye nafsi na huponya mifupa. ²⁵ Kuna njia ambayo huonekana sawa kwa mtu, bali mwisho wake ni njia ya mauti. ²⁶ Hamu ya kibarua humfanyia kazi; njaa yake humsihi kuendelea. ²⁷ Mtu duni huchimba madhara na usemi wake ni kama moto unaounguza. ²⁸ Mtu mkaidi huchochea mafarakano na umbeya huwafarakanisha marafiki. ²⁹ Mtu wa vurugu humdanganya jirani yake na kumwongoza kwenye mapito ambayo si mema. ³⁰ Yule anayekonyeza kwa jicho anapanga njama za mambo ya ukaidi; wenye kuandama midomo yao watapitisha mabaya. ³¹ Mvi ni taji ya utukufu; hupatikana kwa kuishi katika njia ya haki. ³² Ni bora kukawia kuwa na hasira kuliko kuwa shujaa na mwenye kutawala roho yake ni imara zaidi kuliko yule anayeuteka mji. ³³ Kura hurushwa kwenye mkunjo, bali maamuzi hutoka kwa Yehova.