¹ Kanɛ-Mesúge go oyana Yónasɛ dogálɔ dɔ́ɔdɔ go oŋɛndɔ yá gáandɛ́ɛ a amɔ́: ² Fadɛ́gɛ́na, go ɛ́da naá gɛkɔ́nɔ́nɔ́ɔ gá tɛ́sɔnɔ Ninífe, o gɛ́ dóoginyo gɛlɔsɛnɔ gɛ́ɛgɛ! ³ Yónasɛ go fadɛgɛna, a bɛ́ɛ́ ɛ́dá naá Ninífe aŋa Kanɛ-Mesúge a mbaá mo oyáná. Ninífe a mba lɛ́ gɛkɔ́nɔ́nɔ́ɔ gá tɛ́sɔnɔ gɛ́ɛgɛ gɛ́ mbaá lɛ gɛ́ úhene medúgú mádadɔ́ má oŋɛndɔ go gɛ́ báca. ⁴ Yónasɛ go manɛ ŋa buisí búmmue bá oŋɛndɔ naá tɛ́sɔnɔ; a á anca a amɔ́ : Bó á síéné medúgú otíno áhandɛ́, bá gaá gadá Ninífe! ⁵ Batɔ bá Ninífe go ága odɛ́má naá Asaŋa, gáábɔ́ go gedie butíé, bá báá báágánáa ŋkudu aŋa bɛla, gó bayɛga naá bagɔ́nɔ́ bá batɔ gó ncó go éme naá bihelege. ⁶ Boóma go ɛ́da bola naá edúu yá ufuŋe yá Ninífe; gɛ́hɛ́ go fadɛgɛna naá oŋgɛ́yɔ́ yá bufuŋe go búúlie gɛla gɛ́hɛ́, a báá báboáa ŋkudu, a báá lukúméné naá madɔ́ɔ. ⁷ A báá dónógígíé naá Ninífe gɛlɔsɛnɔ go bogaaga bɛ́hɛ́ na bá bagɔ́nɔ́ɔ bɛ́hɛ́ a amɔ́: Ŋgáa batɔ na nnyama, gúlúge na bɛdómbáa mó do nyáá boóma, mó do kɛ́bɛ́dá mbínyí, mó do bóónyó miimpo. ⁸ Ŋgáa batɔ na nnyama mó bɛ́ɛmba na ŋkudu boɛgáná boɛgáná, ŋgáa bá ánca na bogaaga naá Asaŋa, bú úlukie biimée naá bɛbɛ́ bábɔ́ na naá bɛbɛ́ bá meŋigíe bɛ́ɛbɛ bá á lɔmɔ́ kɔ́ɔ! ⁹ Ánɛ́ɛ i íyimenemú aáŋa Asaŋa a dɛ gaá ncó gunde a núgie, i inye gɛantá gɛ́hɛ́ gá mpímí, mbɔ́dɔ ya goŋaá dɛ dɛ fúé o? ¹⁰ Asaŋa go ɛ́na goŋaá bá mba lɛ́ bá ŋanana nɔ́ɔ, bá báá ncó gunde naá gɛnɔ́gɔ́ gá pɛ́. Gɔ́ɔ i inyemú go ŋa gɛbɛ́ gɛ́ɛgɛ a mbaá gegé go ŋa.