¹ Boóma go bébe Yónasɛ ,a báa dugé odɛ́má. ² Gɛ́hɛ́ go bósógolidio Asaŋa a amɔ́ :Áa !Daadáa, caá boóma bɔ́ɔbɔ mboó oyɛ́dá ká lɛ́ naá gɛdɔŋɔ gámɛ?Boóma bɔ́ɔbɔ mbaá lɔmɔ́ ndɛ́galɛga go dóógio aŋa mbaá ságɛ́ná naá Telesíse. Goŋaá mba lɛ́ ŋgíyimene caá o lɛ́ Asaŋa uŋgíní mahana, o do ɔbɔ́nɔ́ɔ mpímí fɛaŋɔ, o lɛ́ dácɛ na besé, o nco gundene goŋaá o do ŋaáa gɛbɛ́ gɛ́ɛgɛ o bá ná lɛ́gá go ŋa. ³ Godɔ́ɔdɔ, Daadáa, gɔ́lɔ́ gɛɔyɔ gámɛ, goakɛ́ nigúe nɛ́ lɛ́ besé namɛ bó dómba gɛɔyɔ. ⁴ Kanɛ-Mesúge go gundie a amɔ: O ŋanana besé goŋaá o duge odɛ́má lí? ⁵ Yónasɛ go úlukie naá tɛ́sɔnɔ, a bɛ́ɛ ɛ́dá lukumene naá boayá bá tɛ́sɔnɔ bá mbálɛ́ná buisí. Hɔ́ɔ hɔ́ɔlɔ́, go báfóagɛna ɛnyaánnyaŋá, go ɛ́da go gɛ́ga naá gifií gó ɛ́da go éme aŋa a ga nɛ́ ɛ́ná bɔ́ɔbɔ bó ga ná bolɛ́ná tɛ́sɔnɔ. ⁶ Daadáa Asaŋa go besie boɛ́tɛ uf́ino lɛsɛ́ŋɛ, boɛ́tɛ go goma bó fáanana Yónasɛ gifií, bó báa fuugíe mpímí yɛhɛ́. Yónasɛ go ɔ́bɔ bese makɔ́nɔ́ na boɛ́tɛ bɔ́ɔbɔ. ⁷ Kanɛ́ gó ́ bélenye, Asaŋa go dóma giibibi go nyáa lɛsɛ́ŋɛ, lɛsɛ́ŋɛ go gúe. ⁸ Aŋa gɛonyá gɛ́ mbaá bálá, Asaŋa go dóma gɛfɛ́ɔdɔdɔ gá ufufu yó ɛ́da go úlene gɛayáa gá mbálɛ́ná buisí, gɛonyá go góba Yónasɛ, a báá bayɛ́gá go obana bɛnamá. A báá dɔ́ŋɛ́nɔ́ nigúe a amɔ́: Nigúe nɛ́ lɛ́ bese go busío bámɛ bó dómba gɛɔyɔ. ⁹ Asaŋa gá Yónasɛ a amɔ́: Bó lɛ́ nahɔ bese goŋaá o duge odɛ́má go busío ba lɛsɛ́ŋɛ o? Gɛ́hɛ́ go gundie a amɔ́: Ŋŋanana bese goŋaá tuge odɛ́má gó héme naá nigúe. ¹⁰ Daadáa a amɔ́: Go á gɔ́lɔ́ lɛsɛ́ŋɛ mahana, yɛ́ɛyɛ o lɔ́mɔ́ kanɛ go bɛa gɛdɔmbɔ go yɛ́, kanɛ go yɛ gumie; ɛ mba basá na budúgú ɛ báá gúé naá budúgú bá go bélíe. ¹¹ Yɔmɔ́ɔ ndɛ go ŋa cɛ gɔ́lɔ́ Ninífe mahana, gɛkɔ́nɔ́nɔ́ɔ gá tɛ́sɔnɔ gɛ́ɛgɛ batɔ bá dómba tɔ́sɛnɔ ntɛdɛ na nitíno bɔ́ ɔyɔmɔ́ kɔ́ɔ; batɔ báaba bá lɔ́mɔ́ bá dɛ iyíménée boayá bá ombɔ́gɔ onɔ́mɛ na boayá bá ombɔ́gɔ odádɛ́, anáa gɛcɛcá gá nnyama gɛ́ lɔ́mɔ́ kɔ́ɔ.