¹ Yesu ayinjila mu wato, ukuya pambalama ye sumbi, nga ayiza mu musumba wakwe. ² Lolani, awamuletela umunthu umulemale alazile pa chitanda. Ukulola isuwilo lyawo, Yesu atili ku mulemale, ''Mwanane umulumendo, usechelele ichete. Amawembuko yako ya tetelwa.'' ³ Lolani, wamwi mwe wakawalika awati ku wenecho, ''Umunthu wee ali nu musamu kwe Leza.'' ⁴ Yesu wamanyile amelenganio yawo nga atili, ''Wuzye achani chino mukwelengnia iviwipe mu myenzo yinu? ⁵ Amuno achani chino achipepuke, ukuti uti, ''Amawembuko yako yatetelwa,' pamwi ukuti uti, 'Katuka swinya utalike ukupita'? ⁶ Kweni ukuti mungamanya kuno u Mwana wa Munthu ali na maka munsi ya pansi ukuti atetele amawembu, ... ''Atili kwe mulemale, ''Katuka, senda ichitanda chako, nga uye ku ng'anda yako.'' ⁷ Ngapano u munthunye weyo akatuka nu kuya ku ng'anda yakwe. ⁸ Pano ama wumba yaweni choo, awazunguka swinya awa tumvya Leza, wino wapa amaka ngati yaa ku wanthu. ⁹ Lyo Yesu apitilanga ukufuma kulyanye, aweni umonsi wino witwanga Mateyu ikazile mu kang'anda ka wakasonkhesy wansonkho. Atili kwe weliwe, ''Ukonkhe nene.'' Akatuka swinya akonkha weliwe. ¹⁰ Lyo Yesu ayikala pansi ukuti alye mu ng'anda, lolani, awavule awasonkhesya wa nsonkho swinya awa wembuke awiza nga awalya nu Yesu na wa sambilizi wakwe. ¹¹ Pano awa Farisi walola choo, awati ku wasambilizi, ''Wuzye achani fwandi chino umu sambilizya winu akulya na sonkhesya wa nsonko na wa wembuke?'' ¹² Pano Yesu wivwa choo, atili, ''Awanthu wano walichete mu miwili yawo wasilonda ing'anga, lelo wawo wano awalwale. ¹³ Mufwile mwaya swinya musambilile chino chikusula; 'Nkhuvwamba inkhumbu swinya nthakuvwamba inzuwi.' Amuno nthiza ukwita awa lungamane ukuti wapiliwuke, kweni awawembu.'' ¹⁴ Ngapano awasambilizi wakwe Yohani awiza kwe weliwe nga awati, ''Wuzye achani fwandi chino sweswe na wa Farisi tukasala ukulya papipi na papipi, kweni awa sambilizi wako wasi sala ukulya?'' ¹⁵ Yesu atili kwe woliwo, ''Wuzye awateweti wa winga wangawa ni chilanda pano e siwinga achili ali na woliwo? Ukuwa amanda yaliyiza pano e siwinga alipokwa ukufuma kwe woliwo, ngapano walisala ukulya. ¹⁶ Pasi nanthi wumwi umunthu wino akawika akenda akapya pa zizwalo icha kali, amuno ichigamba chili nyepuka ukufuma ku chizwalo, swinya ukunyepuka kuno kuliwa penepo kuliwa ukukulu. ¹⁷ Nawanthunye wasiwika ipala ilipya mu chakusendela icha kali. Ndi wachita woo, ikwela lingapuntha, nu kutaya ipala, swinya ni chakusendelanye chingononeka. Mu malo mwakwe, wakuwika ipala ilipya mu chakusendela ichipya, nga vyonsi vilisungwa.'' ¹⁸ Pano Yesu wachilinji akuvwanga ivinthu vyoo, lolani, e katungulula ayiza nu kufukama kwe weliwe. Atili, ''U mukazyana wane wafwa nambanye, ukuwa zanga swinya umupalamansye, nga aliwa nu wulanzi.'' ¹⁹ Ngapano Yesu wimilila nu kumukonkha, nga na wasambilizi wakwe nawonye wakonkha. ²⁰ Lolani, u mwanachi wino walinji ni ndwala ya wazi imyaka ikumi na yiwili wiza kunsizi ya Yesu swinya apalamansya mumbali mwa chizwalo chakwe. ²¹ Amuno atili kwe wenga umwenecho, ''Ndi ningapalamansya ivizwalo vyakwe, lyo nandi imbe ichete.'' ²² Ukuwa Yesu apiliwuka swinya amulola umwanachi, nga ati, ''Mukazyana wane, jimba; isuwilo lyako lyakupozya.'' Nga umwanachi awa ichete i ola lilyanye. ²³ Pano Yesu wiza mu ng'anda yakwe katungulula, waweni wa kalizya wa mfwemfwe na mawumba yakupanga ichongo ichikulu. ²⁴ Atili, ''Fumanimo, amuno umukazyana atafwile, kweni alazile utulo.'' Ukuwa awa museka. ²⁵ Pano iwumba lyawikwa kunzi, ayinjila mu ng'anda nga asenda umukazyana ni kasa lyakwe, nga umukazyana akutuka. ²⁶ Ilyasi lya choo alisata mu chiputulwa chonsi. ²⁷ Lyo Yesu apitila ukufuma kulyanye, Awonsi inhonkho awamukonkha. Azipunda nanthi kuleka swinya zyati, ''Wanga ni nkhumbu pakwe sweswe, Mwana kwe Davide!'' ²⁸ Pano Yesu wizile mu ng'anda, awanthu wanthonkho awiza kwe weliwe. Yesu atili kwe woliwo, ''Wuzye mukusuwila ukuti ningawomba choo?'' Awati kwe weliwe, ''Molimo, Mfumu.'' ²⁹ Ngapano Yesu alema mu minso mwawo nga wati, ''Lekani chichitike kwe mwemwe ukuyana ni suwilo lyinu,'' ³⁰ nga aminso yawo yiyusile. Ngapano Yesu alamula woliwo nga ati, ''Mulolechesye ukuti nanthi wenga amanye ivya choo.'' ³¹ Kweni awonsi wawili awafuma nga waya wasasya ilyasi lya choo mu chiputulwa chonsi. ³² Lyo wawo awonsi wawili wakupita, lolani, e chinunu umonsi wino walinji ni demoni walesilwe kwe Yesu. ³³ Pano i demoni lyasamazwa, u munthu u chinunu atalika ukuvwanga. Amawumba ayazunguka nga ayati, ''Choo chitatela chilolwe mu Izirayeli!'' ³⁴ Ukuwa awa Farisi watinji, ''Ukuwomvya e katungulula wa ma demoni, amo akusamazizya ama demoni.'' ³⁵ Yesu aya mu kupitana mu misumba na mu twaya. Watwalilizile ukusambilizya mu ma sinagogi yawo, akulumbilila ilandwe zima lya wufumu nu kupozya izya ndwala zyonsi. ³⁶ Pano waweni amawumba, wawa ni nkhumbu umulandu woliwo, muno wayimvile swinya amaka yasizile. Walinji ngati a ng'onzi zino zisi nu muchemi. ³⁷ Atili ku wasambilizi wakwe, ''Ukuvuna akuvule, lelo awawomvi awatichi. ³⁸ Achaleka pitisyani ukupepa kwe Mfumu ya kuvuna, alyakuti wanga tuma awawomvi mu kuvuna kwakwe.''