¹ Yesu ayita awa sambilizi wakwe ikumi na wawili apaliponga swinya awapa amaka pa mizimu miwipe, ukuyasamazya, swinya ukupozya indwala zya misango yonsi na mawulwale iya misango yonsi. ² Nomba amita ya wasambilizi wakwe ikumi na wawili yalinji yaa. Uwa kutalichila, Simoni (wino Yesu wamwisile swinya Peturo), nu Andrew umunyina wakwe; Jakobe umwana kwe Zebediya, nu Yohane u munyina wakwe; ³ Filipu, nu Batolomyu; Thomasi, nu Mateyu e kasonkhesya wa nsonkho; Yakobe umwana kwe Alufeyasi, nu Thadeyu; ⁴ Simoni Kawombesya, nu Yudasi Esikariyoti, wino alilemeka Yesu. ⁵ Waa ikumi na wawili Yesu atumile. Asambilizizye woliwo nu kuti, ''Mutakaye ku masyo kuno kwikala a Makandi, swinya mutakati mwinjile mu musumba wuli wonsi uwa wa Samaliya. ⁶ Mu malo mwakwe muye ku zisowe ing'onzi zya mu ng'anda ya Izirayeli; ⁷ swinya lyo mukuya, mulumbilile nu kuti, 'Uwufumu wa mwiyulu wiza papipi.' ⁸ Mupozye awalwale, mukatusye awafwe, muswefye awa mambombo, swinya musamazye ama demoni. mwapochelela pavye, pavye muwapa. ⁹ Mutakasende e golide, siliva, pamwi ikopala munyambi zyinu. ¹⁰ Mutakasende ichola cha pa wulendo pa wulendo winu, pamwi ichizwalo chakonjelezya, pamwi indyato, pamwi indisa, amuno umuwomvi achakwe ichakulya. ¹¹ Mu musumba pamwi akaya kalikonsi mukwinjila, muvwambe wino a muchindikwe, nga mwikale paponye ukufika pano muliwafuma mwenemo. ¹² Pano mukwinjila mu ng'anda, mulamuke. ¹³ Ndi ing'anda ayichindikwe, lekani umutende winu wuwe penepo. Ukuwa ndi asa yichindikwe, lekani umutende winu wonyochele kwe mwemwe. ¹⁴ Lero ku wawo wano watani wawapochelele pamwi ukwivwa amazwi yinu, pano mukufuma pa ng'anda yoyo pamwi mu musumba, mukung'unthe ulutukumbwi mu matamba yinu. ¹⁵ Nakawuzyenye nkhuwanena, kuliwako ichete katichi ku kaya ka Sodomu nu Gomora muwanda wipingulo ukulusya na kaya kakonye. ¹⁶ ''Lolani, natuma mwemwe ngati a ng'onzi pakasi pa wa mumbwe, achaleka muwe na mano ngati a nzoka swinya muwe ni myenzo iyizima ngati ankhunda. ¹⁷ Muchenjele na wanthu! Waliwalemeka mwemwe ku mapembo, swinya walisyempha mwemwe mu ma sinagogi yawo. ¹⁸ Apano muliletwa paminso ya wa bwanamukubwa swinya izya mfumu umulandu wakwe nene, ngati awukamboni kwe woliwo na ku Makandi. ¹⁹ Pano wawalemeka, mutakati musakamale ivya wuli pamwi achani chino muliwavwanga, amuno icha kuvwanga chilipewa kwe mwemwe mu ola lilyanye. ²⁰ Amuno asa mwemwe wano muliwavwanga, ukuwa u Muzimu wakwe Baba winu wino wuliwavwanga mwakwe mwemwe. ²¹ Umunyina alilemeka umunyina ku mfwa, swinya uyise alilemeka umwanakwe. Awana walikatuka ukususya awakwasi nu kulenga ukuti wakomwe. ²² Mwemwe mulipatwa na aliwensi umulandu wizina lyane, Ukuwa wino wajimba ukufika pa wumalilo alipokwa. ²³ Pano wakuyimvya mwemwe mu kaya kaa, samalilani mu kanji akaya , amuno nakawuzyenye nkhuwanena, mutalipita mu twaya tonsi twa Izirayeli lyo u Mwana wa Munthu atani ayize. ²⁴ ''Umusambilizi asa mukulu ukulusya u musambilizya wakwe, nanthi a muwomvi ukulusya e bwana wakwe. ²⁵ Chikwanine ukuti umu sambilizi afike awe ngati a musambilizya, nu muwomvi ukufika awe ngati we bwana wakwe. Ndi witanga e bwana wa ng'anda e Belezebu, akuwipe wuli ukulusya amita yangapundwa ya wano wa mu ng'anda yakwe! ²⁶ Achaleka mutati mwawatina, amuno pasi nanthi chimwi chino chavwama chitaliwumbulwa, swinya pasi nanthi chimwi chino achifisame chino chitali manyikwa. ²⁷ Chino nenji nkhuwanena mu mfizi, muchivwanje nu musanya, swinya chino mwivya nizwi ilitichi mu makutwi yinu, muwizye papela pa zya ng'anda. ²⁸ Mutaki muwatina wawo wano wakukoma umuwili kweni wanga wakwanisye ukukoma umoyo. Mu malo mwakwe, utine weyo wino angakwanisya ukonona vyonsi viwili umoyo swinya umuwili mu gehena. ²⁹ Wuzye impheta ziwili zisikazwa na kandalama akatichi? Lero nanthi yonga mwe zyolizyo yingapona pansi e Baba winu nanthi kumanya. ³⁰ Ukuwa ni nyelenye zya mu mutwe wako zyonsi zyapendwa. ³¹ Mutati mwatina. Mwemwe muli papela ukuchila i mpheta. ³² Achaleka ali wensi wino ukuzumila nene paminso ya wanthu, nanenye ndimuzumila pa minso yakwe Baba wane wino ali mwiyulu. ³³ Ukuwa weyo wino akunkhana paminso ya wanthu, nanenye ndimukana paminso yakwe Baba wane wino ali mwiyulu. ³⁴ ''Mutakelenganie kuno nenji niza mukuleta umutende munsi ya pansi. Nenji nthiza ukuleta umutende, kweni e panga. ³⁵ Amuno niza ukumuwika umonsi ukususyania nu yise, swinya umukazania ukususyania nu nyina, swinya e manguvyala ukususyania nu nyinavyala. ³⁶ Awalwani wa munthu a wawo wano wali mu ng'anda yakwe umwenecho. ³⁷ Weyo wino watemwa e baba wakwe pamwi e nyina ukulusya nene umunthunye weyo nthamwenelela; weyo wino watemwa umwanakwe umonsi panwi umwanachi ukulusya nene umunthunye weyo nthamwenelela. ³⁸ Weyo wino atanga anyamule uwuchingane wakwe nu kukonkha nene umunthunye weyo nthamwenelela. ³⁹ Weyo wino wazana uwulanzi wakwe aluwusovya. Ukuwa weyo wino wasovya uwulanzi wakwe umulandu wakwe nene aliwuzuna. ⁴⁰ ''Weyo wino awapochelela mwemwe akumphochelela nene, swinya weyo wino wapochelela nene akupochelela swinya weyo wino wanthuma nene. ⁴¹ Weyo wino akupochelela e kasema umulandu we kasema alipochelela ichawila ukuyana na che kasema, swinya weyo wino akupochelela u mulungamane umulandu a munthu u mulungamane alipochelela ichawila ngati cha munthu umulungamane. ⁴² Aliwense akupa kwe wonga wakwe waa awatichi nu komejinye wa minzi amatalale ukuti ang'we umulandu a musambilizi, awenche nkhuwanena, chitalichitika ukuti atakapokwe ichawila chakwe.