¹ Akuwa pano yesu wamala ukukomelezya awasambilizi wakwe ikumi na wawili, afuma kweneko mukusambilizya nu kuwizya mutwaya twawo. ² Lelo pano Yohani wivwa mung'anda ya vingololo pamulandu nintchito zye Yesu, atuma ilandwe nawasambilizi wakwe ³ swinya ati kwe weliwe, '' Wuzye awenuno ukwiza, nanthi tuwalindilila winji?''` ⁴ Yesu atolelela nu kuti kwe woliwo, ''Yani nga mumunene Yohani vino mukulola nu kwivwa. ⁵ Inthonkho zikupochelela ukulola, awalemale wakupita, awa mambombo wakuswefwa, awa kutwi wakwivwa swinya, awafwe wakukatuswa ukunyochela ku wumi, ni landwe zima likuwizwa kuwasaluke. ⁶ Amulotwe wensi wino atanga apunuzwe na nene.'' ⁷ Lyo waa awanthu wapitanga pa nzila yawo, Yesu atalika ukuvwanga kwi wumba ivyaYohani, ''Wuzye achani mwayile mulupalang'ang'a ukulola -- itete likuyinganwa nu muza? ⁸ Kweni achani mwayile ukulola - umunthu uwakuzwala ivizwalo ivipepuke? Nakawuzyenye, wawo wano wakuzwala ivizwalo ivipepuke wikala mu zyang'anda zya mafumu. ⁹ Kweni achani mwayile mukulola - umutumwa? Molimo, nkhuti kwe mwemwe, swinya nkhaninye ukulusya umutumwa. ¹⁰ Wee awiliwenya wino chawalikwa, 'Lolani, Nenji nkhutuma inthumi yane pankholelo ya pa minso yinu, wino ali sengania inzila yinu pankholelo yakwe mwemwe.' ¹¹ Nkhuwanena nakawuzyenye, mwakwe wawo wakwatwa ku mmwanachi nanthi wenga amukulu ukulusya Yohani Kabatizya. Lelo umunthu wakulondeka katichi mu wufumu wa mwiyulu wakula ukulusya weni. ¹² Ukufuma mu manda ya Yohani Kabatizya ukufika nomba, uwufumu wa mwiyulu wukuyimba ulombwa, nga awanthu walombwa wakusenda wenewo ku kupatichizya. ¹³ Amuno wonsi wa kasesema ni sundo wanenelanga mpaka Yohani; ¹⁴ swinya ndi mukulonda ukuchizumilizya, weni a Eliya wino walinji nu kwiza. ¹⁵ Weni wino ali namakutwi ukuti ayivwe, mulukani ayivwe. ¹⁶ Ku chani ningakolania inkhulo yoo? Chili ngati awana wakwizya pa masyo ya kukazizya, wano wikala nu kupunda kwe wenga nu muwuye ¹⁷ nu kuti, 'Twimbila mwemwe imfwemfwe, nga mwemwe nanthi kuchina. Twalosyanga, nga mwemwe nanthi kulila.' ¹⁸ Amuno Yohani wiza nanthi kulya umukate pamwi ukung'wa ipala, nga awati, 'Ali ni dimoni.' ¹⁹ U Mwana wa Munthu wiza akulya nu kung'wa nga awati, 'Lolani, a munthu umumilichisya swinya we chakolwa, e chiwuza wa wasonkhesya isonkho na wawembu!' Ukuwa amano yalungamikwa ni milimo yakwe.'' ²⁰ Ngapano Yesu atalika ukukalipila utwaya mwe tuno iviwombwa vyakwe ivya maka vyachisilwe, muno watatontholosile. ²¹ ''Kalanda ka sikolo kwe wewe Cholazini! Kalanda kwe wewe, Betisayida! Ndi iviwombwa vya maka vyachisilwe my Taya na mu Sidoni vino vyachisilwe mwe wewe, ngali watontholosile kali sana mumasaka na matoyi mu miwili yawo. ²² Ukuwa viliwa ichete kweneko kwe Taya nu Sidoni pa wanda wipanzyo ukulusya kwe wewe. ²³ Wewe, Kapenamu, wuzye ukwelengania ulikuzwa ukuya mwiyulu? Awe, uli letwa pansi ku Hade. Amuno ndi mu Sodomu mwawomvilwe iviwombwa vya maka vino vyawomvilwe mwe wewe, ngali achili alipo ukufika ilelo. ²⁴ Ukuwa nkhukunena ukuti chiliwa chipepuke kunsi ya Sodomu mu wanda wipanzyo ukulusya wewe.'' ²⁵ Pa mphindi yilyanye Yesu atili, ''Nkhutumvya wewe, Baba, Imfumu ya mwiyulu na munsi, umulandu wafisa vyoo ivinthu ku wa mano na kwivwichisya, nu kuviwumbula ku wana awatichi. ²⁶ Amolimo, Baba, amuno choo chalinji chakusechelesya mu minso yako. ²⁷ Vyonsinye ivinthu vyasuwalizwa kwe nene ukufuma kwe Baba wan; swiya pasi nanthi wenga wamanya umwana kandi e Baba wane, swinya nanthi wenga wamanya e Tata kandi umwana na wensi kwe wino u Mwana wasola ukumuwumbulila. ²⁸ Zanji kwe nene, mwensi mwe wano mukutamika swinya mung'wamilwe ni chisenda, nga ndiwapa ukupuza. ²⁹ Sendani ichikonkholi chane pakwe mwemwe nga musambilile ukufuma kwe nene, amuno ne chimyamya swinya muchefye mu mwenzo, nga mulizana ukupuza kwa myoyo yinu. ³⁰ Amuno ichikonkholi chane chitatala ni chisenda chane achipepuke.''