¹ Pa mphindi yilyanye Yesu apitila mu vyalo vya nkhumba pa wanda wa Sabata. Awa sambilizi wakwe walinji ni nzala nu kutalika ukufyanula inkhumba awapukusa nu kulya. ² Kweni pano awa Farisi waweni choo, wowonye, awati kwe Yesu, ''Lola, awasambilizi wako wakuchita chino akuchila isundo pe Sabata.'' ³ Ukuwa Yesu atili kwe woliwo, ''Wuzye mutatela muwazye chino Davidi wachisile pano weni walinji ni nzala, swinya awanthu wano walinji na weliwe? ⁴ Weni wayile mu ng'anda yakwe Leza nu kulya umukate wa pa minso, chino akuchila isundo kwe weliwe ukuti alye swinya akuchila isundo kwe wawo wano walinji na weliwe, ukuwa alisundo ku wa simapepo watupu. ⁵ Wuzye mutawazya mwi sundo kuno pe Sabata awa simapepo mwi tempeli wakawifya e Sabata kweni nanthi kuwa nu mulandu? ⁶ Ukuwa nenji nkhuwanena kuno wenga umukulu ukulusya i tempeli ali panye. ⁷ Ndi mwamanya chino choo chasulanga, 'Nenji nkhukumbwa inkhumbu inzuwi pole,' mwemwe nge mutawapile umulandu wano wasi nu mulandu. ⁸ Amuno Umwana wa Munthu a Mfumu ya Sabata.'' ⁹ Apano Yesu afuma kulyanye nu kuya mu sinagogi yawa. ¹⁰ Lolani, palinji umunthu wumwi wino walinji ni kasa ilikwinyane. Awa Farisi awamukolowozya Yesu, awati, 'Wuzye alisuno ukupozya pe Sabata?'' Alyakuti wangapa weliwe umulandu uwa kuwembuka. ¹¹ Yesu atili kwe woliwo, ''A munthuchi mwakwe mwemwe, wino, ndi alinji ni ng'onzi yonganye, swinya ndi ing'onzi yoyonye yaponela muchizinji ichitali pe Sabata, atanga ayileme nu kuyifumya mwenemo? ¹² Nga amutengo uwapapela wuli, nomba, u munthu ali ukuchila ing'onzi! Achaleka alisundo ukuchita ichizima pe Sabata.'' ¹³ Apano Yesu atili ku , ''Tambalika ikasa lyako.'' Weni alitambalika, nga lyanyochela lyawa ichete, ndi vino ikasa iliwuye. ¹⁴ Kweni awa Farisi awafuma nu kumuzanila umulandu weliwe. Wavwambanga muno wangakomela weliwe. ¹⁵ Ala Yesu wamanya choo, afuma kweneko. Awavule awanthu awakonkha weliwe, nu kuwapozya wonsinye. ¹⁶ Weni wapatichizizye woliwo watakamuwumbule ku wanji, ¹⁷ kuno chingawa achisinkha, chino chavwangwa ukupitila mwe Yesaya umutumwa, atinji, ¹⁸ ''Lolani, umuwomvi wane wino nasola; umukundwe wane wenga, mwakwe wino u mwenzo wane wukusechela ichete sana. Nenji ndiwika Umuzimu wane pakwe weliwe, swinya weni aliwizya ipanzyo ku wa Makandi. ¹⁹ Weni ataliwa ni mipanzi nanthi akupunda nkhani; nanthi wenga aliyivwa izwi lyakwe mu tunzila. ²⁰ Weni atalikonyola nanthi alitete ifwanthike; weni atalizimya nanthi amunyeta wuno wukasuka, suka weni akolele ipanzyo ku kuchimvya, ²¹ swinya mwizina lyakwe a Makandi yaliwa nu kuchetekela.'' ²² Apano yimwi inthonkho ni chiwiwi, wino walemwizwe ni dimoni, walesilwe kwe Yesu. Weni wamupozya, ichakukonkha penepo kuno e chiwiwi avwanga nu kulola. ²³ Ama wumba yonsi ayazunguka swinya watili, ''Wuzye u munthu wee angawa a Mwana wakwe Davidi?'' ²⁴ Ukuwa pano awa Farisi wivwa ivya chizungusyo choo, awati, ''U munthu wee atakusamazya ama dimon kano mwe Belezebu, umwana wa mfumu wa ma dimoni.'' ²⁵ Ukuwa Yesu wamanya imelenganio yawo nu kuti kwe woliwo, ''U wufumu wonsi uwupawunkhane pakwe wonga wukusyala wenga, swinya u musumba pamwi ing'anda iyipawunkhane na yenga yitalitela yimilile. ²⁶ Ndi Satana akuwinga Satana, weni apawunkhine na wenga.Nomba, uwufumu wakwe wungimilila wuliwuli? ²⁷ Swinya ndi nkhuwinga ama dimoni mwe Belezebu, awana winu wakuwinga yoliyo mwe wenu ? Pa chifukwa choo, waliwa awakapanzya winu. ²⁸ Ukuwa ndi nkhuwinga ama dimoni mu Muzimu wakwe Leza, lyo uwufumu wakwe Leza wiza pakwe mwemwe. ²⁹ Wuzye wumwi anginjila wuliwuli mu ng'anda iya munthu wa maka nu kwiwa ivinthu vyakwe aleka anyepe tasi umunhu wa maka? Ngapano aliyiwa ivinthu vyakwe ukufuma mu ng'anda yakwe. ³⁰ Weyo wenga wino asi na nene akususya nene, swinya weyo wenga wino asi wunganika na nene akusamphania. ³¹ Achaleka nenji nkhuti kwe mwemwe, uluwembu luli lonsi nu musamu wulitetelwa awanthu, kweni umusamu kwe Muzimu wutalitela wu tetelwe. ³² Wensi wino akuvwanga izwi lililyonsi ukususya u Mwana wa Munthu, lyolyo lilitetelwa weliwe. Ukuwa wensi wino akulanda ukususya nu Muzimu Umwimichile, lyolyo litalitela litetele weliwe, nanthi a munsi yoo, pamwi mwe yoyo yino yandi yize. ³³ Pangani umuti wuwe wuzima ni chikomwa chakwe ichizima, pamwi pangani umuti uwuwipe ni chikomwa chakwe ichiwipe, amuno umuti wukamanyikwa ni chikomwa chakwe. ³⁴ Mwe nkhwatwa ku nzoka, Pano mwemwe mwe wawipe, wuzye mungalanda wuliwuli ivinthu ivizima? Amuno pa vivule ivya mu mwenzo umulomo wakwe wukuvwanga. ³⁵ U munthu umuzima ukufuma mu chuma cha mwenzo wakwe akuleta chino achizima, swinya umunthu umuwipe ukufuma ku chuma ichiwipe icha mu mwenzo wakwe akaleta chino achiwipe. ³⁶ Nenji nkhuti kwe mwemwe kuno mu wanda wakupanzya awanthu wali luwulula pizwi ilyavye lililyonsi waliwa wavwanzile. ³⁷ Amuno na mazwi yako uli lungamikwa, swinya na mazwi yako ulisulwa.'' ³⁸ Ngapano wamwi awakawalika na wa Farisi awamutolelela Yesu nu kuti, ''Musambilizya, tukukumbwa tulole ichimanyisyo ukufuma kwe wewe.'' ³⁹ Ukuwa Yesu atolelela nu kuti kwe woliwo, ''Inkhwatwa imbipe ni ya wuzelele yikavwamba ichimanyikwilo. Ukuwa pasi nanthi chimanyikwilo chino chilipwa kwe woliwo kano ichimanyikwilo chakwe Yona umutumwa. ⁴⁰ Amuno ndivino Yona walinji amanda yatatu nu wusiku wutatu mu wula wa nswi inkhulu, avyo nu Mwana wa Munthu aliwa amanda yatatu nu wusiku wutatu mu mwenzo wansi. ⁴¹ Awanthu wa mu Ninive waliyimila pi panzyo ni nkhwatwa ya wanthu yoo swinya waliyisula. Amuno watontolosile pa kulumbilila kwe Yona, nga lolani, wenga wumwi umukulu ukulusya Yona ali paa. ⁴² Imfumu yaku kambanzwa yili katuka pi panzyo na wanthu awa nkhwatwa yoo nu kusula woliwo. Wizile ukufuma ku nsilo yansi ukuti wivwe amano yakwe Solomoni, nga lolani, wenga wumwi umukulu ukulusya Solomoni ali paa. ⁴³ Pano umuzimu umuwipe wafuma mu munthu, wukapitila mu masyo yano yasi n minzi nu kulonda ukupuza, kweni wusiyazana. ⁴⁴ Ngapano wukati, 'Nenji nandi nyochele ku ng'anda yane kuno nafuma.' Wati wati wanyochela, wukazana ukuti mu ng'anda amupyele swinya chilichonsi chilichete. ⁴⁵ Apano wukaya nu kusenda ponga na weliwe imizimu yinji munenulambali(7) imiwipe ukulusya iyinecho, swinya yonsi yikwiza nu kwikala mulyanye. Ngapano imiwele yawumalilo ya munthunye weyo yikulusya iya nthaliko. Avino chiliwa wowonye ni nkhwatwa imbipe yoo.'' ⁴⁶ Ala pano Yesu wachili akuvwanga ku ma wumba, lolani, enyina na wanyina wimilile panzi, ukuvwamba ukuti wavwange kwe weliwe. ⁴⁷ Wenga wumwi atili kwe weliwe, '''Lola, enyoko na wanyoko wimilila kunzi, ukuvwamba ukuti wavwange kwe wewe,'' ⁴⁸ Ukuwa Yesu atolelela nu kuti kwe weliwe wino wamunenile, ''Wuzye e mayo weweni nga awanyina wane waweni?'' ⁴⁹ Ngapano atambalika ikasa lyakwe kuwa sambilizi wakwe nu kuti, ''Lola, waa awili wa mayo na wanyina! ⁵⁰ Amuno wensi wino akuwomba ukulonda kwakwe Tata wane wino ali mwiyulu, weyonye umunthu awili a munyina wane, ni nkhazi, nu mayo.''