¹ Pawanda wowonye Yesu afuma mu ng'anda nu kwikala mu mbali mwe sumbi. ² Iwumba ikulu nkhaninye aliwungana ukuliwilizya weliwe, achaleka ayinjila mu wato nu kwikala mwenemo pano iwumba lyonsi aliyimilila pa chitunthu. ³ Apano Yesu avwanga ivivule ivinthu kwe woliwo mu milumbe. Weni atili, ''Lolani, u mulimi ayile ku chalo ukuti atande imbeyu. ⁴ Lyo akutanda, yimwi imbeyu ayipona mumbali mwa nzila, nga ivinyunyi avyiza nu kulya yeneyo. ⁵ Yinji imbeyu ayipona pansi ya mawe, pano patalinji umusili uwuvule. Paponapapo imbeyu yamela umulandu umusili wutayile pansi nkhani. ⁶ Ukuwa pano ilanzi lyakatuka, alyocha zyenezyo umulandu zitalinji nu musisi, nga zyumila. ⁷ Zinji imbeyu azipona pa miti yamyunga. Imiti ya myunga ayikula nu kuyifyenyelezya. ⁸ Zinji imbeyu azipona pa musili uwa muvundo nga ayikoma ivyakulya, yimwi umwanda ukulusya, yimwi amakumi mutanda, swinya yinji amakumi yatatu. ⁹ Weni wino ali namakutwi lekani ayivwe.'' ¹⁰ Awasambilizi awiza nu kuti kwakwe Yesu, ''Ngafwandi achani chino ukulanda kwi wumba mu milumbe?'' ¹¹ Yesu atolelela nu kuti kwe woliwo, ''Mwemwe mwapwa ulongo lwa kwivwichisya ivifiswe vya muwufumu wa mwiyulu, kwe kwe woliwo chitapwa. ¹² Amuno wensi wino alinavyo aliyonjelezwa, swinya aliwa navyo ivivule. Ukuwa wensi wino asi navyo, na vino ali navyonye vilipokwa ukuma kwe weliwe. ¹³ Choo acho nenji nkhuwavwanzya mu milumbe: Napano wakulola, watakulola; swinya napano wakwivwa, watakwivwa, pamwi ukwivwichisya. ¹⁴ Kwakwe woliwo uwutumwa wakwe Yesaya wukufiswa, lyolyo lino likuti, 'Pano mukwivwa muliyivwa, kweni mutaliyivwichisya nanthi akatichi; pano mukulola mulilola, kweni mutaliyiluka nanthi akatichi. ¹⁵ Amuno imyenzo ya wanthu waa ya yitumphe, swinya awawome ukwivwa, swinya wiyalizile aminso yawo, alyakuti watakalole na minso yawo, pamwi ukwivwa na makutwi yawo, pamwi ukwivwichisya ni myenzo yawo, alyakuti watontholokwe swinya, nga nenji ningapozya woliwo.' ¹⁶ Ukuwa ayalotwe aminso yinu, amuno yakulola; swinya amakutwi yinu, amuno yakwivwa. ¹⁷ Nakawuzyenye nkhuwanena kuno awatumwa na wonsi awalungamane wakumbwanga ukulola ivinthu vino mukulola nga wataviweni. ¹⁸ Teyelezyani nomba ku mulumbe wa mulimi wino atanzile imbeyu yakwe. ¹⁹ Pano wumwi wivwa izwi lya wufumu kweni atakulivwichisya, umuwipe akwiza nu kusomphola chino chatandazwa mu mwenzo wakwe. Yoo ambeyu yino yatanzwile mumbali ya nzila. ²⁰ Yiino yatandazwa munsi ya mawe a munthu wino akwivwa izwi nga paponapapo akulipochelela ni chimwemwe, ²¹ kweni atali nanthi a misisi mwakwe weliwe wenga swinya weni akujimba pa kamphindi. Pano ukuchula nu kutamika kwakatuka umulandu wizwi, weni zuwazuwa akapona. ²² Yino yatandazwa pakasi pa miti ya myunga, wee amunthu wino akwivwa izwi, kweni ivyakulondeka ivya munsi swinya uwukachenjezya wa vyuma wukufyenyelela izwi, nga akuwa sita vikomwa. ²³ Imbeyu yino yatandazwa mu musili uwuzima, wee a munthu wino akwivwa izwi nu kulivwichisya. Weni akukoma ivikomwa swinya ayikoma ivyakulya, ukusinza mu masyo yonga umwanda, mu yanji amakumi mutanda, swinya mu yanji amakumi yatatu ukulusya yino wakomela.'' ²⁴ Yesu avwanga u mulumbe wunji kwe woliwo. Weni atili, '''Uwufumu wa mwiyulu wuli ngati a munthu wino atanzile imbeyu iyizima mu chala chakwe. ²⁵ Ukuwa pano awanthi wachilinji wakusipula, umulwani wakwe wiza nga nawenye atanda isote mukasi mwe tirigu nga apita. ²⁶ Pano vyamela ichetenye, ngapano isote nalyonye lyaloleka. ²⁷ Umuwomvi wa mweni chalo ayiza nu kuti kwe weliwe, 'Mukwayi, wuzye utatandile imbeyu inzima mu chalo? Ngafwandi wuliwuli nomba muli inswaswa?' ²⁸ ''Weni atili kwe woliwo, 'Umulwani awomvile choo,' ''Umuwomvi atili kwe weliwe, 'Nga ukulonda sweswe tuye swinya twipe lyenelyo?' ²⁹ ''Umweni chalo atili, 'Awe. Umulandu mungala pano mukwipila inswaswa, munganyunkhulila apaliponga ni nkhumba. ³⁰ Lekani vyonsi vikulile apaliponga yasuke yawe amasika. Pa mphindi ya masika nditi ku wakasinza, ''Pakutalichila munyunkhulile inswaswa nu kulinyepa mumyanzi nu kulyocha, ukuwa muwunganike inkhumba mulonge mu nkhoma yane. '''' ³¹ Apano Yesu awapa umulembe wunji. Weni atili, ''Uwufumu wa mwiyulu wuli ngati ambeyu ya muzimwa yino umunthu akatanda mu chalo chakwe. ³² Yoo imbeyu amolimonye ayitichi akulusya imbeyu zyonsi. Ukuwa ndi yakula, yikuwa ayikulu ukulusya imbeyu zya muchalo. Aliwa a muti, alyakuti inyunyi zya mupelaazyiza nu kuzenga ivisalanzo munsamba zyakwe.'' ³³ Apano Yesu anena woliwo umulumbe wunji, ''Uwufumu wa mwiyulu wuli ngati a mutawa wuno umwanachi asenzile nu kusanzya ni vipimo vitatu ivya wusu suka umunya wonsi watutumuka.'' ³⁴ Vyonsi ivinthu vyoo Yesu avanzile ku mawumba mu milumbe; swinya weni atatela avwange nanthi chimwi kwe woliwo sita mulumbe. ³⁵ Choo chalinji amwakuti chilya chino chavwanzilwe ukupitila mwakwe mutumwa chingize chiwe achisinkha, pano weni atili, ''Ndiyiyula umulomo wane mu milumbe. Nenji ndivwanga ivinthu vino vyalinji avifise ukutalichila pa luwandi lwansi.'' ³⁶ Ngapano Yesu asyile amawumba nu kuya mung'anda. Awasambilizi wakwe awiza kwakwe weliwe nukuti, ''Londolola kwakwe sweswe umulumbe wa nswaswa mu chalo.'' ³⁷ Yesu atolelela nu kuti, ''Weni wino akutanda imbeyu inzima a Mwana wa Munthu. ³⁸ I chalo ansi; nga imbeyu inzima, waa awana wa mu wufumu. Inswaswa a wana wa muwipe, ³⁹ swinya u mulwani wino watanzile zyenezyo a muwipe. Ukusinza ayili nsilo ya nkhulo, nga a wakasinza a wangelo. ⁴⁰ Achaleka, pano inswaswa zikuwunganikwa azyochwa nu mulilo, avyo chiliwa pa nsilo ya nkhulo. ⁴¹ U Mwana wa Munthu alituma awangelo, nga waliwunganika ukuma mu wufumu wakwe ivinthu vyonsi vino vikupanga uluwembu swinya wawo wano watakwivwila amasundo. ⁴² Waliwasumbila mwi lungu lya mulilo, kuno kuliwa ukulila nu kusyekula amino. ⁴³ Ngapano awalungamane waliwala ngati a lilanzi mu wufumu wakwe Tata wawo. Weni wino ali namakutwi, lekani ayivwe weliwe. ⁴⁴ Uwufumu wa mwiyulu wuli ngati a nsawo infisame mu chalo. U munthu ayizanile nu kuyifisa. Mu chimwemwe chakwe weni akupita, akazya chilichonsi weni ali nacho, nga akala ichalonye chocho. ⁴⁵ Swinya, uwufumu wa mwiyulu wuli ngati a munthu wino akachuluzya akulonda uwukasi wamutengo wapapela. ⁴⁶ Pano wazana uwukasi uwa mutengo uwukulu nkhaninye, weni aya nu kukazya chili chonsi chino chalinji achakwe nu kukala wenewo. ⁴⁷ Swinya, uwufumu wa mwiyulu wuli ngati awukonde wuno wasumbilwa mwe sumbi, wuno wawunginie ivilewulwa vya misango yili yonsi. ⁴⁸ Pano lyizuzwa, awalondo awalikwemela pa chitunthu. Ngapano awikala pansi nga awawunganika ivizima muvise, ukuwa vino visi nintchito awavitaya. ⁴⁹ Chiliwa wonye woo pa nsilo ya nkhulo. Awangelo waliyiza nu kulesania awawembu ukufuma ku walungamane. ⁵⁰ Walisumba woliwo mwilungu lya mulilo, kuno kuliwa ukulila nu kusyekula amino. ⁵¹ ''Wuzye mwiluka vyonsi ivinthu vyoo?'' Awasambilizi watili kwe weliwe, ''Eee.'' ⁵² Ngapano Yesu atili kwe woliwo, ''Achaleka e kawalika aliwensi wino wawa a musambilizi ku wufumu wa mwiyulu ali ngati a munthu wino a mweni ng'anda, wino akufumyanga ivya kali ni vipya ivinthu ukufuma munkhoma yakwe.'' ⁵³ Apano chizile chawa kuno pano Yesu amalizizye imilumbe yoo, afuma pa masyo yayo. ⁵⁴ Apano Yesu ayinjila mu chiputulwa chakwe swinya asambilizya awanthu mu sinagogi. Icha kusula chalinji kuno wazungusile nga watili, ''Wuzye akwinye kuno umunthu wee akufumya amano yakwe swinya swinya ivizungusyo vyoo? ⁵⁵ Umunthunye wee asa mwana wa kapala wa matabwa? E nyina asa wino akwitwa Mariya? Wa munyina asa Yakobi, Yosefu, Simoni, nu Yudas? ⁵⁶ Wankhazi zyakwe wonsi wasi na sweswe paa?'' Wuzye akwinye kuno wazana ivinthu vyonsi vyoo?'' ⁵⁷ Wizile wachisika na weliwe. Kweni Yesu atili kwe woliwo, ''Umutumwa akachindikwa suka kunsi yakwe na pamwawo.'' ⁵⁸ Weni atawomvile ivizungusyo ivivule koko umulandu wa kunthasuwila kwawo.