¹ Pano Yesu wika ukufuma pa lupili, iwumba ikulu alimukonkha. ² Lolani, uwa mambombo wiza kwe weliwe nu kufukamila pankholelo zyakwe, atinji, ''Mfumu, ndi ukulonda, unganswefya.'' ³ Yesu ayololosya ikasa lyakwe nga amupalamansya, ati, ''Nkhulondesya. Uswepe.'' Paponapapo aswefizwe ku mambombo. ⁴ Yesu atili kwe weliwe, ''Lolechesya ukuti atakanene ku munthu nanthi chimwi. Yanga pa nzila yako, uyilolesye kwe simapepo, nga uwike ichawila chino Mose wa patichizizye, ukuti chiwe awukamboni kwe woliwo.'' ⁵ Pano wizanga ku Kapenamu, e kenturiyo wiza kwe weliwe, amulenga ⁶ nga ati, ''Mfumu, umuwomvi wane alazile mulemale swinya ali mu wulumya uwukulu.'' ⁷ Ngapano Yesu atili kwe weliwe, '' Nandi nize nu kupozya weliwe.'' ⁸ E kenturiyo atolelela nga wati, ''Mfumu, nenji nthenelela ukuti unginjila na pansi pa musonje wane. Landavye izwi nu muwomvi wane alipola. ⁹ Amuno nanenye ne munthu wino ali pansi pa wamaka, swinya ndi na wa vita pansi pakwe nene. Nenji nkhuti kwe wee, 'yanga' nga akuya, swinya kwe wunji wenga, 'Zanga' nga ayize, swinya ku muwomvi wane, 'Womba choo,' nga akuchiwomba.'' ¹⁰ Pano Yesu wivwa choo, azunguka nu kuti kwe wano wamukonkhanga, ''Nakawuzyenye nkhuti kwe mwemwe, nthatele inzane wumwi uwisuwilo ngati alyoo mu Izirayeli. ¹¹ Nkhuwanena, awavule walifuma kuwufumilo wi lanzi na kuwinjililo wi lanzi, swinya waliwayikala pachakulya nu Abrahamu, Iyizeki nu Yakobi, mu wufumu wa mwiyulu. ¹² Ukuwa awana wa mu wufumu wali tayilwa kunzi kumfizi, kuno kuliwa akulila nu lumania amino.'' ¹³ Yesu atili kwe kenturiyo, ''Yanga! Ndivino wasuwila, chiwombwe kwe wewe wowonye.'' Nga umuwomvi wapozizwe i ola lilyanye. ¹⁴ Pano Yesu wiza ku ng'anda ya kwe Peturo, aweni unyina wakwe Peturo alazile mulwalwe ku nzegema. ¹⁵ Yesu apalamansya ikasa lyakwe, nga ichizegema chafuma mwakwe weliwe. Ngapano ayimilila nu kutewetela weliwe. ¹⁶ Pano amanguzi yiza, awanthu awaleta kwe Yesu awavule wano walemilwe ni mizimu imiwipe. Asamazya imizimu ni zwi nu kupozya wonsi wano walwile. ¹⁷ Mu nzila yonyeyo chafisilwe chocho chino chawalisilwe ne kasema, ukuti, ''Weni weliwenye asenda izya ndwala zyitu swinya wayitwika amawulwale yitu.'' ¹⁸ Nomba pano Yesu aweni iwumba limuliwizizye, awanenile ukuti waye imbali yinji yakwe sumbi wa Galileya. ¹⁹ Apano e kawalika iyiza kwe weliwe nu kuti, ''Musambilizya, nenji ndikonkha wewe kulikonsi kuno uliya.'' ²⁰ Yesu atili kwe weliwe, ''Wa mumbwe wali na mazonzi, ni nyuni zya mupela zili ni visalanzo, kweni u Mwana wa Munthu asi nanthi pamwi pano angalalika umutwe wakwe.'' ²¹ Wunji mu wasambilizi atili kwe weliwe, ''Mfumu, unzumilizye tasi ukuti inje nu kuzyika e baba wane.'' ²² Kweni Yesu atili kwe weliwe, ''Unkhonkho nene, swinya usye awafwe wazyike awafwe wawo.'' ²³ Pano Yesu winjila mu wato, awasambilizi wakwe awakonkha weliwe ukuya mwenemo. ²⁴ Lolani, akukatuka umuza pe sumbi, alyakuti uwato awuliwilizwa na minzi, Ukuwa Yesu alinji mu tulo. ²⁵ Awasambilizi wakwe awiza kwe weliwe nga awa mukatusya, awati, ''Tutule, Mfumu; tuli mupipi nu kufwa!'' ²⁶ Yesu atili kwe weliwe, ''Wuzye achani fwandi muli ni nthete, mwe wi suwilo ilitichi?'' Ngapano akatuka nu kukalipila umuza ne sumbi. Apano kwawa umyalale uwukulu. ²⁷ Awanthu awazunguka awati, ''Amunthuchi wee, ukuti nu muzanye ne sumbi vikwivwila weiwe?'' ²⁸ Pano Yesu wiza kumbali yinji swinya mu kaya ka Gadaleni, awanthu wawili wano walemizwe nama demoni wasunkhine na weliwe. Awafuma mu manda swinyawalinji awakalipe, alyakuti nanthi wumwi uwa pa wulendo angapitila inzila yoyo. ²⁹ Lolani, ayapunda nizwi ikulu nga ayati, ''Wuzye ukulonda chani kwe sweswe, Mwana wakwe Leza? Wuzye wizya koo ukuti utuyimvye pano imphindi yitu yitandi yize?'' ³⁰ Lelo wakapoli walyanga palyanye, papipi na woliwo. ³¹ Ama demoni ayatwalilila ukulenga Yesu nu kuti, ''Ndi ungatufumya, ututumwe mwe wakapoli.'' ³² Yesu atili kwe yoliyo, ''Yanji!'' Ama demoni ayafuma nu kuya mu wakapoli; nga lolani, awa kapoli wonsi awa samala ukwika ulupili ukuya mwe sumbi nga awafwila mu minzi. ³³ Wawo wano wachemanga wakapoli awasamala swinya awaya mu musumba nga wawanena vyonsi, sana sana chino chachitisile ku wanthu wano wainji na ma demoni. ³⁴ Lolani, umusumba wonsi awiza ukumusunkhania Yesu. Pano wamuweni weliwe, awa mulenga ukuti afume mu chiputulwa chawo.