¹ Awa Farisi nawa Saduki wizile nu kumwelezya weliwe ukumukolowozya kuno awalanjizye ichimanyisyo ukufuma kwi kupela. ² Kweni weni atolelela nu kuti kwe woliwo, ''Pano kwawa manguzi, mukati, 'Kwasi kuwe impindi nzima, amuno kupela akuwenzu.' ³ Ndi amutondotondo, mukati, 'Kwandi kuwe imphindi iyiwipe, amuno kupela kwawenza swinya kwafita.' Mwamanya kali ukupiliwula imilolechele ya mupela, kweni mutanga mupiliwule ivimanyikwilo ivya mphindinye yoyo. ⁴ Inkhwatwa imbipe niya wuzelele ikavwamba ichimanyikwilo, kweni pasi nanthi chimanyikwilo chino chingapwa ukufumyavye ichimanyikwilo chakwe Yona.'' Ngapano Yesu wawasile nu kufumapo. ⁵ Pano awasambilizi wafisile imbali yinji, wiwilizile ukusenda umukate. ⁶ Yesu watili kwe woliwo, ''Lolechesyani swinya muchenjele nichakuvimvya chwa wa Farisi na wa Saduki.'' ⁷ Awa sambilizi walandine pakasi pakwe woliwo nu kuti, ''Amuno tutasenzile umukate.'' ⁸ Yesu wachimanyile choo nga watili, ''Mwemwe mwewisuwilo ilyakuchepa, achani chino mukulandana swinya mukuti amulandu mutasenzile nanthi amukate? ⁹ Wuzye mutanga mwiluke pamwi ukwizuka imikate yisano iya wano walinji imyanda yisano ikumi ni mphindi zisano (5,000), swinya vyalinji vinga ivitundu mwawunginie? ¹⁰ Pamwi imikate munenulambali (7) iya wano walinji imyanda ikumi ni mphindi ziwili (4,000), swinya vyalinji vinga ivitundu vino mwasenzile? ¹¹ Ngamuno chani chino mutanga mwiluke kuno nsina kuwanena ivya mukate? Chenjelani swinya mwiluke ivya mutawa uwa wa Farisi na wa Saduki.'' ¹² Ngapano awivwichisya kuno atawanenanga ukuti wiluke ivya mutawa uwa mukate, kweni ukuti wiluke ivya misambilizye yawa Farisi nawa Saduki. ¹³ Nomba pano Yesu wiza ku chiputulwa mupipi ne Kesariya Filipi, weni akolowozya awa sambilizi wakwe, ukuti, ''Wuzye awanthu wakuti u Mwana wa Munthu weweni?'' ¹⁴ Watili, ''Wamwi wakati we Yohani kabatizya; wamwi, Eliya; swinya wanji, Yeremiya, pamwi wenga uwa watumwa.'' ¹⁵ Atili kwe woliwo, ''Kweni mwemwe mukuti ne weni?'' ¹⁶ Ukwasuka, Simoni Peturo atili, ''Wewe we Kristu, u Mwana wakwe Leza mumi.'' ¹⁷ Yesu atolelela nu kuti kwe weliwe, ''We mupepwa, Simoni umwana kwe Yona, amuno umuwili nu wazi vitawumbula choo kwe wewe, kweni e Tata wane wino ali mwi Yulu. ¹⁸ Naninye nkhuti kwe wewe kuno we Peturo, swinya pi lyalawe lyoo ndizenga ichiwanza chane. Imipinjilichizyo ya mfwa yitalitela yichimvye kwe chenecho. ^{19 20} Ndikupa ivyiyulilo vya wufumu wa mwiyulu. Chilichonsi uli nyepa munsi chili nyepwa mwiyulu, swinya chilichonsi uli sapula munsi chili sapulwa mwiyulu.'' Ngapano Yesu akomelezya awa sambilizi wakwe ukuti watize wanene umunthu wumwi kuno walinji we Kristu. ²¹ Ukufumila paponye Yesu atalika ukuwanena awasambilizi wakwe kuno afwile aye mu Yerusalemu, achule ivinthu ivivule mu makasa ya wasongo na wasimapepo wakulu na wakawalika, wamukome, swinya akatuswe ukunyochela ku wumi pa wanda wa chititatu. ²² Ngapano Peturo akwemela Yesu pambali nu kumukalipila, ati, ''Choo chiwe ukutali na wewe, Mfumu; choo chitakize chitele chiwombwe kwe wewe.'' ²³ Kweni Yesu apiluka nu kuti kwe Peturo, ''Yanga kunsizi yane, Satana! We chakupunuzya kwe nene, amuno utasakamana nivinthu vya kwe Leza, kweni ni vinthu vya ku wanthu.'' ²⁴ Ngapano Yesu ati kuwa sambilizi wakwe, ''Ndi wumwi akulonda ukunkhonkha, afwile ayilesya, akutusye uwuchingane wakwe, nu kunkhonkha. ²⁵ Amuno wensi wino akulonda ukukakatizya uwumi wakwe ali wusumba, swinya wensi wino akusumba uwumi wakwe muno anene ali wuzana. ²⁶ Muno chani chingazipila umunthu ndi akakatila insi yonsi kweni akulovya uwumi wakwe? Achani chino umunthu angapa ukukankhania nu wumi wakwe. ²⁷ Amuno u Mwana kwe Munthu aliyiza mu wuchindame wakwe Tata na wangeli wakwe. Ngapano weni alilambula umunthu wensi ukulingana ni milimo yakwe. ²⁸ Achisinkha nkhuwanena, pali wamwi mwakwe wano wimilizile paa wano watalifwa mpaka walole u Mwana kwe Munthu akwiza nu wufumu wakwe.''