¹ Apano wamwi awa Farisi na wakawalika wiza kwakwe Yesu ukufuma ku Yerusalemu. Awati, '' ² Ngamuno achani chino awasambilizi wako wakususya imiwele yawa songo?'' ³ Atolelela nukuti kwakwe woliwo, '' Ngapano chani chino mukususya isundo lyakwe Leza umulandu wa miwele yinu? ⁴ Amuno Leza ati, 'Uwachindika eso nu nyoko,' swinya ''wensi wino akuvyanjila uwuwipe uwa yisi nanthi wenyina nakawuzyenye alifwa. ⁵ Kweni mukuti, 'Wensi wino wanena yisi nanthi wenyina, '' Wuliwonsi uwutuli wino ungapochelela ukuma kwakwe nene nomba nandi imupe e Leza, '' ⁶ umunthunye wee atakulonda ukuchindika e yisi.' Mu nzila yoo mwaleka lyononeka izwi lyakwe Leza umulandu wa miwele yinu. ⁷ mwemwe mwewawufi! Achizima ndivino Yesaya walawuzile ivya mwemwe pano watili, ⁸ 'Awanthu waa wachindika nene nimilomo yawo, kweni imyenzo yawo yili ukutali nanene. ⁹ Wakamfukamila nene achavye umulandu wakasambilizya amasundo yaviwanza na masundo ya wanthu.''' ¹⁰ Apano ayita iwumba kwakwe weliwe nu kuti kwakwe woliwo, '' Teyelezyani nu kwivwichisya-- ¹¹ Pasi nanthi chimwi chino chikakwinjila mu mulomo chino chikakombezya u munthu. Ukuwa, chino chikafuma mu mulomo, choo achino chikakombezya umunthu.'' ¹² Apano awasambilizi wizile nukuti kwakwe Yesu, ''Wuzye umanyile kuno awa Farisi walumilwe pano wivwile umuvwango yoo?'' ¹³ Yesu atolelela nu kuti, ''Umuti wonsi wuno e tata wane uwa mwiyulu atakomela wulinyunkhulwa. ¹⁴ Walekani wonga, wakalanjizya wanthonkho. Ndi umunthu wino we nthonkho akukolela umuwuye umunthu wino anthonkho, wonsinye wawili wangaponela muchizinji.'' ¹⁵ Peturo atollela nukuti kwakwe Yesu, '' Utwilulile umulumbenye woo.'' ¹⁶ Yesu ati, '' Namwenye mutani muwe nukwivwichisya? ¹⁷ Mutakulola ukuti chonsi chino chikaya mu mulomo chikapitila munda swinya apano chikafuma ukuya kulonde? ¹⁸ Ukuwa ivinthu vino vikafuma mumulomo vikufuma mu mwenzo. Vyovyonye avino vika kombezya umunthu. ¹⁹ Amuno mumwenzo mukakolelela amelenganio amawipe, uwuchikoma, uwuzelele, uwumalya, uwifi, uwukamboni waufi, nu kuwipila awanthu. ²⁰ Ivinthunye vyoo avino vikakombezya awanthu. Ukuwa ukulya sita kupwizya amakasa kutanga kukombezye umunthu.'' ²¹ Apano Yesu afuma kweneko nukuya ku viputulwa vya misumba ya Taya nu Sidoni. ²² Awala, umwanachi umu kanani wiza ukufuma muchiputulwa chilyanye. Wizile apunda nu kuti, '' Mfwila inkhumbu, Mfumu, Mwana kwe Davide! Umwanane umukazyana akolizwe nkhaninye numuzimu muwipe.'' ²³ Kweni Yesu atasi amutolelele nanthi a lizwi. Awa sambilizi wakwe wiza nukumulenga, ukuti, '' Muwinge apite, umulandu akutukonkha nichongo.'' ²⁴ Kweni Yesu atolelela ati, '' Nenji nthatumilwa kwakwe aliwensi kano ku ng'onzi nsowe izya mung'anda mwakwe Izirayeli. '' ²⁵ Kweni wizile nu fukama pansi paminso pakwe weliwe, ukuti, '' Mfumu, unjavwe.'' ²⁶ Atolelela nu kuti, Chitangandi chizipe ukusenda ichakulya chawana nukusumbila utwana twambwa.'' ²⁷ Nawe ati, ''Molimonye, Mfumu, kweni nutumbwanye tukalya utumelemenswa tuno tukupona pansi pano e tatakulu wawo akulya.'' ²⁸ Apano Yesu atolelela nu kuti kwakwe weliwe, '' Mwanachi, alikulu isuwilo lyako; leka chiwombwe kwakwe wewe ndimuno ukulondela.'' Umwanakwe umukazyana wizile wapola imphindi yoyonye. ²⁹ Yesu wafumile pa masyo yayonye nukuya papipi nakwe sumbi wa Galileya. Apano waya ku lupili nukwikala kulyanye. ³⁰ Iwumba ikulu lyizile kwakwe weliwe. Awaleta na woliwo awalemale, inthonkho, na wakontha, nawavule wano walwile. Wizile wawaleta pa matamba yakwe Yesu, nukuwapozya woliwo. ³¹ Achaleka iwumba lyazunguka pano walola wiwi akuvwanga, uwa chikonda awa ichete, umulemale akupita ni nthonkho yikulola. Awatumvya e Leza uwa Izirayeli. ³² Yesu ayita awasambilizi kwakwe weliwe nukuti, '' Indinichilanda kuwanthu waa amuno wikala nani amanda yatatu yapita nanthi chimwi ichakulya. Nthakulonda ukuti imbawezye nanthi kulya chimwi, suka wawe ulupwe munzila. ³³ Awa sambilizya watili kwakwe weliwe, '' Akwinye kuno tungazana imikate iyivule mulumphalang'ang'a chino chingalela iwumba ikulu lyoo?'' ³⁴ Yesu ati ku woliwo, '' Muli nimikate yinga?'' Awati, ''Munenulambali(7) ninswi inthichi vyenye.'' ³⁵ Apano Yesu apatichizya iwumba akuti lyikale pansi. ³⁶ Ngapano asenda imisumba munenulambali ni nswi, ngapano asalifya, amenyulania imikate nukuwapa awasambilizi. Awasambilizi awapa kwi wumba. ³⁷ Awanthu wonsi awalya awikuta. Ngapano wawungania ivitundu munenulambali ukwizula invongonyo ya vino vyasyazile. ³⁸ Wano walile walinji imyanda ikumi imphindi zini, ukufumyako awanachi na wana. ³⁹ Apano Yesu atuma iwumba lyapita nu kwinjila mu ngalawa nu kuya mu chipatulwa chakwe Magadani.