¹ Kwizile kwawa uwanda wumwi pano Yesu wachilinji akusambilizya awanthu mwi tempeli nu kulumbilila ilandwe zima apano awa simapepo wakulu, swinya awakawalika awiza kwe weliwe ponga na wa songo. ² Awavwanga, awati kwe weliwe, ''Tunene amakachi yano ukuwombela ivinthunye vyovyo, pamwi weweni wino awapile amakanye yaa.'' ³ Atolelela nga atili kwe woliwo, ''Nanenye nandi imbakolowozye, swinya munene. ⁴ Uwubatizyo wakwe Yohani: Wuzye walinji a wakufuma mwiyulu pamwi ukufuma ku wanthu?'' ⁵ Awa pazinkhana awenecho, awati, ''Ndi twati, 'Ukufuma mwiyulu,' andi ati, 'Ngachani fwandi chino mutasuwizile weliwe?' ⁶ Ukuwa ndi twati, 'Ukufam ku wanthu,' awanthu wonsi wandi watupole namawe, amuno wapanichisya kuno Yohani walinji amutumwa.'' ⁷ Achaleka awatolelela ukuti watamanya kuno wafuma. ⁸ Yesu atili kwe woliwo, ''Nanenye nthandi imbanene ukupitila mu makachi nkhuwombela ivinthunye vyoo.'' ⁹ Wawanenile awanthu umulumbe woo, ''Umunthu akomezile ivikomwa mu chalo, awasya mwenemo awakalima, nga aya kunsi yinji imphindi iyitali. ¹⁰ Pa mphindi yino wivwine atuma umuwomvi ku wakalima, ukuti waye wamupe ivikomwa vya mu chalo. Kweni wakalima awa muma, nga awamunyosya amakasavye. ¹¹ Atuma swinya umuwomvi wunji nga wamuma nawenye, awamukwelengula, nga awamunyosya makasavye. ¹² Atuma swinya uwa chititatu nga nawenye awamuchisa, nu kumusumbila kunzi. ¹³ Achaleka umweni chalo atili, 'Wuzye ni ngachita wuli? Nandi inthume umwana wane umukundwe. Pamwi wangaya wamuchindike.' ¹⁴ Ukuwa pano wakalima wamuweni, awavwanzania wonga, awati, 'Wee amphyani. Tuyani tumukome, ukuti vyonsi ivya mpyani viwe avwitu.' ¹⁵ Awamusumbila kunzi ya chalo cha vikomwa nga awamukoma. Wuzye umweni chalo cha vikomwa angawawombela chani wakalima? ¹⁶ Aliyiza nu konona waa wakalima wa vikomwa, nga alipa ichalo chavikomwa kwe wanji.'' Pano wivwa choo, awati, ''Sa vyo chifwile ukuwa!'' ¹⁷ Kweni Yesu alolechesya woliwo, nga ati, ''Wuzye chikusula chani choo chino chawalikwa: 'Iwe lino wakazenga walikana aliwa ilyenecho'? ¹⁸ Aliwensi wino akuponela pa lyoo iliwe alimonthoka, na wino lyamuponela alisyonongoka.'' ¹⁹ Achaleka wa kawalika na wa simapepo wakulu awavwamba ukuti wamuleme imphindinye yoyo, amuno wamanyile kuno wavwanzile umulumbe ukususyania na woliwo. Kweni watinanga awanthu. ²⁰ Awamuchema weni ichetechete, awatuma awa kateya wano wayilolesyanga ngati awalungamane, ukuti wazane uwupunuzyo mu mivwanjile yakwe, alyakuti wangamulemeka ku kutungulula na maka ya Bwanamukubwa. ²¹ Awamukolowozya, awati, ''Musambilizya, twamanya kuno ukuvwanga nu kusambilizya umwakusimichila, swinya utawa na kapatulula, kweni ukusambilizya ivya nzila yakwe Leza. ²² Wuzye alisundo kwakwe sweswe ukuti twalipa umusonkho kwe Kayisara, pamwi pole?'' ^{23 24} Ukuwa Yesu wamanyile umuchenjelo wawo, nga ati kwe woliwo, ''Ndanjizyani ulupiya. Wuzye ichikolania ni zina vino vili penepo avya weni?'' Awati, ''Vya Kayisara.'' ²⁵ Awati kwe woliwo, ''Fwandi mupe kwe Kayisara ivinthu vino avya kwe Kayisara, swinya kwakwe Leza mupe ivinthu vino avya kwakwe Leza.'' ²⁶ Awapotwa ukuzana ichifukwa pe vino wavwanga paminso ya wanthu, ukuwa awazunguka nimitolele yakwe, awamyalala. ²⁷ Pano wamwi awa wa saduki wiza kwe weliwe, waa wano wakuti kutawa ukuzyulupuka, ²⁸ awa kolowozya weliwe, awati, ''Musambilizya, e Mose watuwalichizile sweswe ukuti ndi umunthu umunyina wakwe wafwa, ali nu muchi, swinya asi nanthi awana, umunthu afwile atwale umuchi wa munyina, nga amupapile umwana umunyina. ²⁹ Kwalinji awanyina munenulambali(7) nga uwa nthaliko atwala umwanachi, nukufwa nanthi amwana, ³⁰ swinya uwa chitiwili nawenye. ³¹ Uwa chititatu wapyana, nga wonsi munenulambali nanthi kusya umwana, nga awafwa. ³² Pakupelechezya umwanachi nawenye wafwa. ³³ Nomba pakuzyulupuka, umwanachi aliwa waweni? Amuno wonsi munenulambali walinji awalume.'' ³⁴ Yesu atili kwe woliwo, ''Awana awalumendo wa munsi yoo wakutwala swinya wakupwa ku nthwala. ³⁵ Ukuwa wawo wano walizumilizwa munkhulo yoyo ukupochela ukuzyulupuka ukufuma kawafwe watalitwala pamwi ukuwa munthwala. ³⁶ Watalitela wafwe swinya, amuno waliyana na wangelo swinya awana wakwe Leza, wawa awana wa kuzyulupuka. ³⁷ Ukuwa pakuti awafwe wakukatuswa, nu Mose nye walanjizya, pa masyo yakuyana ne vupa, kuno wita Imfumu a Leza wakwe Abrahamu, swinya e Leza wakwe Isaki swinya e Leza wakwe Yakobi. ³⁸ Lelo asa we Leza wa wafwe, kweni uwa wapuma, amuno wonsi wali nuwumi kwe weliwe.'' ³⁹ Wamwi wa wakawalika awatolelela, ''Musambilizya, watolelela ichete sana.'' ⁴⁰ Amuno watelezizye ukuti wangamukolowozya weliwe na mawuzyo yakonjelezya. ⁴¹ Yesu atili kwe woliwo, ''Wuzye wuliwuli wakuti e Kristu a mwana wakwe Davide? ⁴² Amuno Davide umwenecho akuvwanga mwe kalata wa Masalimo, Imfumu yatili ku Mfumu yane, 'Yikala kwi kasa lyane ilya ndilo, ⁴³ suka ndeke awalwani wako wawe awakulyata amatamba yako penepo.' ⁴⁴ Davide achaleka akwita e Kristu 'Mfumu,' Nomba wuliwuli Kristu amwana wakwe Davide?'' ⁴⁵ Mukwivwa kwa wanthu wonsi atili kuwa sambilizya wakwe, ⁴⁶ ''Chenjelani na wakawalika, wano wakulondesya ukupita mu myinjilo imitali swinya wakunda ukulamukwa numuchinzi uwawo mu masyo yakukazizya swinya ukwikala pa vipuna ivizima mu ma sinagogi swinya amasyo ayazima pa chakulya. ⁴⁷ Nga na swinya wakatondowezya mu ng'anda zya awanachi awafwilwe, nga pakuyilolesya wakupepa amapepo amatali. Awanthu wa mwata woo walipochela ichilambu ichikulu.''