¹ Yesu alalo mupela nu kulola awachinondo wano wawikanga ivya wila vyawo mu nsengulilo. ² Alola umwanachi wumwi umufwilwe umusaluke ukuwika mwenemo utundalama tuwili. ³ Achaleka atili, ''Nakawuzyenye nkhuwanena, umufwilwe umusaluke wee awika mwenemo izivule ukulusya wonsi mwakwe woliwo. ⁴ Wonsinye waa awapa ivyawila vyoo ukufuma mu vivule ivyawo. Ukuwa u mufwilwe wee, mu wupina wakwe, awika vyonsi vino walinji navwo pa wumi wakwe.'' ⁵ Vino wamwi awavwanga ivya tempel, muno lyayemvizwe na mawe ayazima ni vwawupe, weni atili ⁶ ''Ndi a vinthu vyoo vino mukulola, amanda yaliyiza pano nanthi lyonga iliwe lilisyala papela pa liwuye lino litalimongolwa.'' ⁷ Achaleka awamukolowozya, watinji, ''Musambilizya, wuzye alinye lino ivinthunye vyoo vili chitika? Wuzye ichilolwa chiliwa achani pano vyoo ivinthu viliwa mupipi ukuti vichitike?'' ⁸ Yesu atolelela, ''Chenjelani ukuti mutaka wipwe uwufi. Amuno awavulewaliyiza mwizina lyane, walitinji, ''Nenji anene.' swinya, 'Imphindi yili mupipi.' mutakawakonkhe. ⁹ Pano mwivwa inkhondo ni vyongo, mutakatine, amuno vyoo ivinthu vifwile vitalichile vichitike, ukuwa insilo yitalichitika paponapapo.'' ¹⁰ Ngapano atili kwe woliwo, ''Insi yilikatuka ukususya insi, swinya uwufumu ukususya uwufumu. ¹¹ Kuliwa ivizumanji ivikulu, swinya mu masyo ya kulekanalekana inzala ni zyandwala. Kuliwa ivyakutinia ni vilolwa mwiyulu. ¹² Ukuwa pansizi pa vinthu vyonsi vyoo, waliwika amakasa yawo pakwe mwemwe swinya waliwayimvya, ukuwalemeka ku masinagogi ni ng'anda zya vingololo, ukuwaleta paminso ya mafumu na wakapanzya umulandu wi zina lyane. ¹³ Chilitungulila ku longo lwa kusimichila kwinu. ¹⁴ Achaleka muwike mu myenzo yinu ukuti mutakapekanie ukuyichinjilila kwinu zuwa, ¹⁵ amuno ndiwapa amazwi na mano yano wonsi awalwani winu watalikwanisya ukuwakana pamwi ukuwasusya. ¹⁶ Ukuwa mulilemekwa swinya nawa kwasi, awanyina, awaluko, ni viwuza, nga walikoma wamwi mwakwe mwemwe. ¹⁷ Muliwapatwa na aliwensi umulandu wi zina lyane. ¹⁸ Ukuwa nanthi a lunyele lwa mu mutwe wako luli ononeka. ¹⁹ Mukusimphisya kwinu muli pususya imyoyo yinu. ²⁰ ''Pano mwemwe mwalola Yerusalemu aliwilizizwe na wa nkhondo, apo mumanye ukuti ukononekwa kuli mupipi. ²¹ Ngapano muleke wawo mu Galileya wasamalile ku myamba, muleke wawo wano wali mu mu musumba wawuleke, swinya wawo wano wali kunzi kwa musumba watakatele wanyochele mwenemo. ²² Amuno yaa a manda kunyosezya, alyakuti ivinthu vonsi vino viwalisilwe vilifiswa. ²³ Akalanda kwe wawo wano wali nu wula swinya kwe wawo wano wakonsya mu mandanye yayo! Amuno kuliwa ukuchula munsi, swinya uwukali ku wanthu waa. ²⁴ Walipona pansi nawa panga, swinya walilemwa uwuzya kunsi zyonsi, nga Yerusalemu alilyatwa mwalwe na Makandi ukufika pano imphindi zya Makandi zyafiswa. ²⁵ ''Kuliwa ivimanyikwilo mwi lanzi, mu mwezi, na nzota, na munsi ya pansi. Insi ziliwa mu machuzi, ukusaya umulandu wa chongo cha pe sumbi nu wukali wa minzi. ²⁶ Kuliwa awonsi wano walizilika ni nthete na mu kuchetekela kwa vinthu vino viliwa nu kwiza munsi ya pansi. Amuno amaka ya mwiyulu yaliyinganwa. ²⁷ Ngapan, o walilola u Mwana wa Munthu akwiza mwi wingo na maka nu wichindame uwukulu. ²⁸ Ukuwa pano inthunye vyoo vyatalika ukuchitika, yimililani swinya mwinusye kupela imitwe yinu, umulandu uwutuli winu wapalamila.'' ²⁹ Yesu awanenile woliwo umulumbe, ''Lolani umuti wa nthumbusya, ni miti yonsi. ³⁰ Pano yafuma umulemvwe, mukuyilolela mwe wenecho swinya mukamanya ukuti ichilungula chili mupipi. ³¹ Achaleka swinya, pano mwalola ivinthu vyoo vikuchitika, mukumanya ukuti u wufumu wakwe Leza wuli mupipi. ³² Awenche nkhuvwanga kwe mwemw, inkhulo yoo yitalisila ukufika pano ivinthu vyonsi vyoo vyachitika. ³³ Mwiyulu ninsi ya pansi vilifwa, kweni amazwi yane yatalitela yafwe. ³⁴ ''Ukuwa muteyelezye ku mwewenecho, alyakuti imyenzo yinu yitakang'wamwe kung'wa ukukulu swinya ukukolwa nu kusayila kwa wulanzi, swinya nu kuti uwanda wutakiyalwe umwakupitisya kwe mwemwe ngati a chipingo. ³⁵ Amuno wuliyiza pakwe aliwensi wino wikala munsi ya pansi yonsi. ³⁶ Ukuwa muwe minso pa mphindi zyonsi, ukupepa ukuti mungawa na maka ayakwane ukuti musamale ku vinthunye vyoo vyonsi vino vilichitika, swinya ukuti mwimilile pa minso yakwe Mwana wa Munthu.'' ³⁷ Achaleka mu manda yano wasambilizyanga mwi tempeli, nga nu wusiku ayile nu kwikala mu lupili lwa Olivi. ³⁸ Awanthu wonsi awiza akachelochelo ukuti wivwe Yesu mwi tempeli.