¹ Nomba amasika ya mukate wuno wusi nu mutawa yalinji mupipi, chino chikakwitwa Kupitililwa. ² Wa simapepo wasongo nawa kawalika wavwanzyanianga muno wangamukomela Yesu, amuno watinanga awanthu ³ Ngapano Satana ayinjila mwakwe Yudasi Isikariyoti, wino walinji wenga mwi kumi na wawili. ⁴ Yudasi aya ku wa simapepo wasongo nawa kalola nu kuvwanzyania nawo vino angize awalemechele Yesu kwe woliwo. ⁵ Awasechela nkhaninye nu kuzumila ukuti wamupe imphiya. ⁶ Azumilizya nu kulonda ulongo ulwa kulemechela weliwe kwe woliwo ukutali ni wumba. ⁷ Apano kwiza uwanda wa mukate wuno wusi nu mutawa, pano ing'onzi ya Kupitililwa yifwile yikomwe. ⁸ Nga Yesu atuma Peturo nu Yohani, ati, ''Yanji mutusenganizye ichakulya cha Kupitililwa, alyakuti twize tuchilye.'' ⁹ Awavwanga kwe weliwe, ''Wuzye akwinye kuno ukulonda tuye tusenganizye?'' ¹⁰ Weni awatotolelela, ''Lolani, mwala mwinjila mu musumba, u monsi wino anyamuzile insembo ya minzi wandi akawasunkhanie. Mumukonkhe ukuya mu ng'anda yino wandi ayinjile. ¹¹ Ngapano munene kwe mwening'anda, ''U musambilizya akuti kwe wewe, 'Wuzye ing'anda ya walendo yili kwi, muno nandi ndile ichakukya cha Kupitililwa na wa sambilizi wane?''' ¹² Wandi akawalanjizye ing'anda nkhulu injanie iya papela. Mukasenganie kokonye.'' ¹³ Nga awapita, nu kuzana vyonsi ndimuno wavwanjizile kwe woliwo. Ngapano awasengania ichakulya cha Kupitililwa. ¹⁴ Lyo imphindi yafichila, weni wizile yikala pansi nawa positole. ¹⁵ Ngapano atili kwe woliwo, ''Nene nakumbwanga sano ukuti indye choo icha Kupitililwa na mwemwe pano nthani ntchule. ¹⁶ Amuno nkhuti kwe mwemwe, nthalitela intchilye swinya chisuke chifiswe mu wufumu wakwe Leza.'' ¹⁷ Ngapano Yesu asenda ulupindi, ala pano wasalifya, atili, ''Senda choo, nu kuyankania mwa kwe mwemwe mwenga. ¹⁸ Amuno nkhuti kwe mwemwe, nthalitela ing'we swinya ivya chipaswa cha muti wusuke uwufumu wakwe Leza wizewize.'' ¹⁹ Ngapano asenda umukate, ala pano wasalifya, amonthola, nu kuwapa, akuti, ''Woo amuwili wane, wuno wapwa kwe mwemwe. Chitanji choo ngamuwanjizuchila nene.'' ²⁰ Asenda ulupindi chilichonganye, ati, ''Loo ulupindi alipanganopya muwazi wane, wino witichila mwemwe, ²¹ Kweni teyelezyani. Weni wino akunkhutilila alinanene panye pakabechi. ²² Amuno u Mwana wa Munthu amolimonye wandi apite ndimuno chatanthizilwe. Kweni akapelu ku munthu weyo wino ukukutilila kwandi kupitile mwenemo!'' ²³ Awatalika ukuvwanzania awenechonye weweni mwe woliwo angachita choo. ²⁴ Ngapano kwakatuka imipanzi pakasi pe woliwo ivya kuno weweni mwakwe woliwo walolekanga ngati we songo ukulusya. ²⁵ Weni watili kwe woliwo, ''Imfumu zya Makandi zili papela pe woliwo, na wano wali na maka pakwe woliwo wakakwitwa kwe wawo wano wakachita ivizima ku wanthu wawo. ²⁶ Kweni chitakawe wonye na mwemwe. Lelo, lekani weyo wino amukulu mwakwe mwemwe ize awe amutichi, swinya lekani weyo wino awakulondeka sana awe ngati weyo wino akuteweta. ²⁷ Amuno weweni wakula, weyo wino akakwikala pa kabechi, pamwi weyo wino akuteweta? Asa weyo wino akakwikakala pa kabechi? Lelo indi mwakwe mwemwe ndivino weyo wino akuteweta. ²⁸ Kweni mwemwe mwe wawo wano mwapitilila ukuwa nani mumyelezyo yane. ²⁹ Nene nkhupa mwemwe uwufumu, ndivino e Tata wane wapa uwufumu kwe nene, ³⁰ kuno mungalya nu kung'wa pi bechi lyane mu wufumu wane, swinya muliyikala pazyandulu ukupanzya amaluko ikumi na wawili wa mu Izirayeli. ³¹ ''Simoni, Simoni, uwe aminso, Satana alenzile ukuti awe nawewe, kuno akusole ngati avisaka. ³² Ukuwa nene nkhupepelezile, kuno isuwilo lyako litize lilongoloke. Ndi wiza wanyoka swinya, uyize usimphisye awanyina.'' ³³ Peter atili kwe weliwe, ''Mfumu, nene nasinama ukuti inje na wewe apaliponga ku vingololo na kumfwa.'' ³⁴ Yesu atolelela, ''Nkhukunena, Peturo, e mukolwe atani alamule uwanda woo, uliwa wankhana katatu kuno utamanyile nene.'' ³⁵ Ngapano Yesu atili kwe woliwo, ''Pano nawatumile nanthi kusenda akachola aka mphiya, nanthi achola cha vyakulya, pamwi andyatu, wuzye mwasowezilwe chimwi? Awatolelela, ''Nanthi chimwi.'' ³⁶ Ngapano atili kwe woliwo, ''Ukuwa nomba, weyo wino ali ni chola icha mphiya, mulekani asende, ni chola cha vyakulya nachonye. Weyo wino asi nu lupanga afwile akazye umwinjilo wakwe nu kukala lumwi. ³⁷ Amuno nkhuti kwe wewe, chino chawalikwa ukuyana nene chifwile chifiswe, 'Weni wasanzizwe ponga sikwivwila masundo.' Amuno chino chalolwa kunkholelo ivya kwe nene chili mukasi chikufiswa.'' ³⁸ Ngapano awati, ''Mfumu, lola! Paa pali yawili amalupanga.'' Weni atili kwe woliwo, ''Viyine.'' ³⁹ Yesu wapita, ngati muno wachitilanga penye, ukuya ku lupili lwa Olivi na wasambilizi wakwe wakonsile weliwe. ⁴⁰ Pano wafika, watili kwe woliwo, ''Pepanji ukuti mutakinjile mu myelezyo.'' ⁴¹ Weni apita ukutali na woliwo ndi pano iwe lyakuzukuza lingafika, nga asokowala pansi nu kupepa, ⁴² ati, ''Tata, ndi wewe ukulonda, funthusya ulupindi loo pe nene. Naponye asakulonda kwane, kweni kwakwe wewe kuchitwe.'' ⁴³ Ngapano umungelo ukufuma mwiyulu al oleka kwe weliwe, ukusimphisya weliwe. ⁴⁴ Ali mukulwilwita, apepa ni chikonkho nkhaninye, ni twinsi lyakwe lyawa ngati akutonya ukukulu ukwa wazi awutonya pansi. ⁴⁵ Ngapano wakatuka ukufuma kumapepo yakwe, weni wizile kuwa sambilizi nu kuzana wakuponechela umulandu wa malanda yawo ⁴⁶ nga awuzichisya woliwo, ''Nga muno chani muponechile? Katukani nu kupepa, ukuti mutakinjile mu myelezyo.'' ⁴⁷ Pano achili akulanda, lolani, iwumba lyalolesile, nu Yudasi, wenga wikumi na wawili, akuwakolela. Weni wizile papipi nu Yesu akuti amufyomphe, ⁴⁸ kweni Yesu atili kwe weliwe, ''Yudasi, wuzye ukukazya u Mwana kwe Munthu pa kufyompha?'' ⁴⁹ Pano wawo wano wamuliwilizile Yesu walola vino vyawombwanga, awati, ''Mfumu, wuzye tuwakome nu lupanga?'' ⁵⁰ Ngapano wenga mwe woliwo wamuma umuzya wakwe simapepo mukulu, nu kusenga ikutwi lyake ilya ndilo. ⁵¹ Yesu atili, ''Vyoo viyine!'' Weni alema ikutwi, nu kumupozya. ⁵² Yesu atili kuwa simapepo wakulu, kuwa kalola wa mwi tempeli, na kuwa songo wano wizile ukususya weliwe, ''Wuzye mukwiza ngati mukulonda kapoka, ni zya mphanga ni ndugu? ⁵³ Pano nalinji namwe amanda yonsi mwi tempeli, mutatela muwike amakasa yinu pakwe nene. Kweni lyoo a li ola lyinu, swinya amaka ya mfizi.'' ⁵⁴ Ukumulema, awamukolelela ukufuma nu kumuleta mu Ng'anda ya simapepo mukulu. Ukuwa Peturo akonkha akatalamuchila. ⁵⁵ Walile pano wapemba umulilo mukasi mulusasa swinya watezile wikala pansi apaliponga, Peturo wikazile pakasi pakwe woliwo. ⁵⁶ U muwomvi wumwi umwanachi wamuweni pano wikalanga mu kuwala kwa mulilo nu kumulolechesya nkhaninye nukuti, ''Wee umunthu nawenye walinji nawe.'' ⁵⁷ Kweni Peturo wachikanile. ati, ''Mwanachi, nene nthamumanyile.'' ⁵⁸ Lyo patani pazimbe winji nawenye wamulola, nukuti, ''Newenye we wenga wakwe woliwo.'' Kweni Peturo atili, ''Monsi, nenji pole,'' ⁵⁹ Lyo pazimba katichi umunthu winji apanichisya nukuti, ''Achisinkha umunthu wee nawenye walinji na weliwe, amuno weni amu Galileya.'' ⁶⁰ Kweni Peturo atili, ''Monsi, nene nthamanyile chino ukulanda.'' Paponapapo, achilinji akulanda, e mukolwe alamula. ⁶¹ Akupiliwuka, i Mfumu alola Peturo, nga Peturo ayizuka izwi lyakwe Mfumu, pano watili kwe weliwe, ''Wala pano e mukolwe atani alamule ilelo ulinkhana nene katatu.'' ⁶² Peturo aya kunzi nukulila nkhaninye. ⁶³ Ngapano awanthu awavita wano walindililanga Yesu awatalika ukumusoweka nu kumuma. ⁶⁴ Awamuvwimba kuminso nu kumuwuzichisya, ukuti, ''Lotela! Nga wewenu wino wakuma?'' ⁶⁵ Awavwanga ivinji ivivule ukususya Yesu, awamukwelengula. ⁶⁶ Mwezuwazuwa kwalinji kwacha,awasongo wa wanthu wawungine apaliponga, wonsinye awa simapepo wakulu nawa kawalika. Awamukolela ukuya mwi pembo ⁶⁷ nu kuti, ''Ndi we Kristu, tunene.'' Kweni weni atili kwe woliwo, ''Ndi nawanena, mutandi musuwile, ⁶⁸ swinya ndi nawakolowozya, mutandi mutolelele. ⁶⁹ Kweni ukufuma nomba nu muyayaya, u Mwana kwe Munthu aliyikala kwi kasa lya ndilo ilya maka y Leza.'' ⁷⁰ Wonsinye awati, ''Ala fwandi we Mwana wakwe Leza? Yesu atili kwe woliwo, ''Mukuti anene.'' Awati, ⁷¹ ''Nga chani chino tukulonda e kamboni? Amuno sweswenye twayivwila ukufuma pamulomo wakwe wenga.''