¹ Iwumba lyonsi lya woliwo alikatuka nu kumuleta Yesu paminso yakwe Pilato. ² Awatalika ukumupa umulandu, ati, ''Twamuzana umunthu wee akuvulungania insi yitu, ukulesya ukupa imisonkho kwe Kayisare, nu kuti kuno weni umwenecho we Kristu, imfumu. ³ Pilato amukolowozya, ati, ''Wuzye wewe we Mfumu ya wa Yuda?'' Yesu atolelea weliwe swinya atili, ''Acho walanda.'' ⁴ Pilato atili kwe simapepo mukulu na kwi wumba, ''Nthazanile nanthi amulandu mu munthu wee.'' ⁵ Ukuwa walemansyanga, watinji, ''Weni akuvulungania awanthu, ukusambilizya mwe Judeya wonsi, ukutalichila ukufuma mu Galieya na ku masyo yanye yaa.'' ⁶ Ala Pilato wivwa choo, weni wakolowoz,izye ndi wee umunthu alinji a mu Galileya. ⁷ Pano wamanya kuno walinji pansi pa maka yakwe Herodi, weni watuile Yesu kwe Herodi, wino umwenecho nawenye walinji mu Yerusalemu amanda yalyanye. ⁸ Pano Herodi waweni Yesu, akunda nkhaninye, umulandu walondesyanga ukuti angalola weliwe pa mphindi inthali. Weni wivwile ivyakwe weliwe swinya wachetekelanga ukuti alole chimwi ichizungusyo ichakuwombwa na weliwe. ⁹ Herodi amukolowozizye Yesu mu mazwi amavule, kweni Yesu atamutolelezile nanthi chimwi. ¹⁰ Awa simapepo wakulu na wakawalika awimilila, awamusonthelezya kuno ali nu mulandu. ¹¹ Herodi na wa vita awatuka Yesu swinya wamusoweka. Ngapano awamuzwika ivizyalo ivizima sana nu kutuma weliwe ukunyochela kwe Pilato. ¹² Amuno Herodi nu Pilato wizile wawa viwuza winga nu muwuye pa wanda wulyanye, amuno pansizi pakwe vyoo walinji awapatane wenga nu muwuye. ¹³ Pilato nga apunda apaliponga wa simapepo wakulu swinya inthunguluzi ni wumba lya wanthu ¹⁴ nu kuti kwe woliwo, ''Mulesile kwe nene umunthu wee ngati a munthu wino akukolelela awanthu ukuwomba iviwipe, lolani, nenji, lyo namukolowozya paminso yakwe mwemwe, nthazana nanthi amulandu mu munthu wee ukuyana nivinthu vino mukumupa umulandu. ¹⁵ Awe, nanthi we Herodinye, amuno wamutuma ukumunyosya kwe sweswe, lolani, nanthi chimwi ichakulonda akomwe chiwomvilwe na weliwe. ¹⁶ Nenji acho nandi musunde nu kumusapula.'' ¹⁷ Apano Pilato ayelengania ukusapula kuwa Yuda wenga umunyepwe pa wanda wakuzevya. ¹⁸ Ukuwa awapunda apaliponga, watinji, ''Ukutali nu munthu wee, nga utusapulile Barabasi!'' ¹⁹ Barabasi walinji amunthu wino wawisilwe mu vingololo umulandu wa chongo chimwi mu musumba swinya uwuchikoma. ²⁰ Pilato avwanzya woliwo swinya, ukulonda asapule Yesu. ²¹ Kweni awapunda, watinji, ''Musayikani, musayikani.'' ²² Weni atili kwe woliwo imphindi ya chititatu, ''Munochani, achani ichiwipe chino umunthu wee awomvile? Nenji nthazanile nanthi chimwi chino chikulonda ukusunda kwa mfwa mwe weliwe.'' Achaleka ndi namusunda, nenje nandi musapule.'' ²³ Ukuwa walondesyanga na mazwi aya papela, ukupatichizya ukuti asayikwe. Amazwi yawo yamulema Pilato. ²⁴ Acho Pilato welenginie ukupa chino walondanga. ²⁵ Weni wasapula weyo wenga walenzile wino wawisilwe mu vingololo umulandu wa chongo nu wuchikoma. Kweni awapa Yesu ku kulonda kwawo. ²⁶ Wala pano wapita nawe, awalema wenga Simoni wa ku Sayirini, wizanga ukufuma mukaya, awawika uwuchingane pakwe weliwe ukuti anyamule, kukonkha Yesu. ²⁷ Iwumba ikulu lya wanthu, ni lya wanachi wano walinji namalanda nu awalosyela weliwe, wakonkhanga weliwe. ²⁸ Kweni pakupiliwuchila kwe woliwo, Yesu atili, ''Wakazyana wa mu Yerusalemu, mutakati mwandosyezya, kweni muyilosezye mwewenecho na wana winu. ²⁹ Amuno lolani, amanda yakwiza yano waliti, 'Awapepwe awanyepwe nu wula wuno wutapapa, na mawele yano yatatela yalele.' ³⁰ Ngapano walitalika ukuti ku myamba, 'Tuponele,' na ku tumyamba, ''Tuvwimbani.' ³¹ Amuno ndi wangawomba vyoo ku muti uwuwisi, achani chino chiliwombwa pano wakala?'' ³² Awanji awanthu, wawili ivipondo, wakolelezilwe na weliwe ukuti waye wawakome. ³³ Ngapano wafika pa masyo yano yakwitwa ''Ifupa lya Mutwe,'' palyanye awamupamanthila swinya ni vipondo -- wenga ku ndilo yakwe swinya wenga kwe kamani wakwe. ³⁴ Yesu atili, ''Tata, watetelani, amuno watakumanya chino wakuwomba.'' Ngapano awapanga amayele, ukwankhana ivizyalo vyakwe. ³⁵ Awanthu awimilila ukulolela pano inthunguluzi nazyonye zyamusowekanga, zyatinji, ''Wapususyanga wanji. Mulekani ayipususye umwenecho, ndi weni we Kristu wakwe Leza, umusolwa.'' ³⁶ Awa vita nawonye wamusamulanga, ukusenjelela kwe weliwe, ukupa weliwe ipala isase, ³⁷ swinya watinji, ''Ndi we Mfumu ya wa Yuda, yipususye wemwenecho.'' ³⁸ Palinji swinya ichimanyikwilo pakwe weliwe, ''Wee a Mfumu ya wa Yuda.'' ³⁹ Wenga uwa vipondo wino wapamanthizilwe palyanye wamutuka watinji, ''Wuzye asa we Kristu? Yipususye wemwenecho na sweswe.'' ⁴⁰ Ukuwa wunji wamukalipila, atinji, Wuzye usitina Leza, pakuti uli pi panzyo lililyonga? ⁴¹ Sweswe ichisinkhanye tuyine ukuwa paa, amuno tukupochelela chino chiyine ni milimo yitu. Ukuwa u munthu wee atachita nanthi chimwi ichiwipe.'' ⁴² Ngapano weni atili, ''Yesu, unjizuke nene pano wiza mu wufumu wako.'' ⁴³ Yesu atili kwe weliwe, ''Nakawuzyenye nkhuti kwe wewe, ilelonye wandi uwe na nene mu paradiso.'' ⁴⁴ Nomba kwalinji mupipi ni ola lya mutanda, swinya imfizi ayiza munsi yonsi ukufika pi ola lya mufundikambali (9) ⁴⁵ alila uluswepe lwi ilanzi lwapotwa. Ngapano ichimwenda cha mwi tempeli chalepusile vyawa viwili. ⁴⁶ Ukulila nizwi kulu, Yesu atili, ''Tata, mu makasa yako nkhuwika umuzimu wane.'' Watili walanda choo, weni afwa. ⁴⁷ Pano kenturiyo waweni chino chachisilwe, weni wachindisile Leza, pakuti, ''Amolimonye wee walinji a munthu umulungamane.'' ⁴⁸ Pano awavule wonsi wano wizile ponga ukuti wawe wakamboni ku chilolwa choo waweni ivinthu vino vyachisilwe, wanyochezile wakuma pachifuwa. ⁴⁹ Ukuwa wonsi wawo wano wamumanyile weliwe, swinya awanachi wano wamukonsile ukufuma mu Galileya, wimilile apatali katichi, wakulola ivinthu vyoo. ⁵⁰ Lolani, kwalinji umunthu izina lyakwe Yosefe, wino alinji awa mwiwumba lya pi pembo. Weni walinji amunthu umuzima swinya umulungamane, ⁵¹ Umunthu wee atazumilizinie ni panzyo lya pi pembo ni vyakuchitika vyawo. Weni wafumile mu musumba wa Arimasiya uwa mu Yudeya, swinya walondanga uwufumu wakwe Leza. ⁵² Umunthu wee, akupalamila kwe Pilato, walenzile umuwili wakwe Yesu. ⁵³ Weni awisya pansi, apomba mu mwenda uwutelepe, nu kuwuwika mu nkhungwe yino wimvile mwiwe, muno nanthi wenga atatela alambalikwe. ⁵⁴ Walinji a Wanda wa Kusengania, swinya e Sabata walinji mupipi ukutalika. ⁵⁵ Awanachi wano wizile nu Yesu ukufuma ku Galileya wakonsile nu kulola inkhungwe swinya vino walambalisile umuwili wakwe. ⁵⁶ Awanyochela nu kusengania ivyakununtchila na mafuta. Ngapano pe Sabata awapuza ukuyana na masundo.