1 Mwepwi pa wanda wakutalichila uwa mulungu, awiza ku nkhungwe, ukuleta ivinuntchile vino wayipekinie. 2 Awazana iwe litanthazilwe ukufuma pa nkhungwe. 3 Awinjila mukasi, kweni watazanile umuwili wakwe Mfumu Yesu. 4 Chachitisile kuno, pano wachilinji wakuzunguka ivya choo, napaponapapo, awonsi wawili awimilila papipi na woliwo mu mwinjilo iyiwale iyizikimile. 5 Ala pano awanachi wizwile ni nthete nu kufukamila pansi ivisyo vyawo pansi, awati ku wanachi, ''Ngamuno chani mukuvwamba umupuma mu wafwe? 6 Weni atali paa, ukuwa akatusizwe! Yizukani muno weni wavwanzile kwe mwemwe pano wachilinji ali mu Galileya, 7 ukuti u Mwana wa Munthu afwile alemekwe mu makasa wanthu awawembu swinya apamanthilwe, nga pa wanda wachititatu akatuke swinya.'' 8 Awanachi awizuka amazwi yakwe 9 nga awanyoka ukufuma ku nkhungwe nu kunena vyonsi ivinthu vyoo kwi kumi na wenga na wanji wonsi. 10 Nomba Mariya Magadaleni, Joana, nu Mariya unyina wakwe Yakobi, na wanachi wanji wano walinji nawo awanena vyoo ivinthu ku wa positoli. 11 Ukuwa ilandwe lyoo lyalinji ngati alyavye ku positoli, swinya watasuwizile awanachi. 12 Kweni Peturo wakatusile nu kusamalila ku nkhungwe, nga, ayinama nu kusungamila mukasi, weni aweni imyenda yili payenga. Ngapano Peturo anyamuka ukuya ku ng'anda yakwe, akuzunguka chino chachitisile. 13 Lolani, wawili wakwe woliwo awaya pa wanda wulyanye ku kaya ikakwitwa Emawusi, kano kalinji amakumi mutanda ichipimo ukufuma ku Yerusalemu. 14 Awavwanzania wenga nu muwuye ivya vyonsi ivinthu vino vyachitisile. 15 Chachitisile kuno, pano wachilinji wakuvwanzania nu kuwuzichisya apaliponga, Yesu umwenecho apalamila nu kuya na woliwo. 16 Ukuwa aminso yawo yawakanizya ukuti wamanye weliwe. 17 Yesu atili kwe woliwo, ''Wuzye achani chino mwe wawili mukuvwanga pano mukupita?'' Awimilila palyanye wakuloleka na malanda. 18 Wenga mwakwe woliwo, izina we Kiliyopasi, atolelela weliwe, ''Wure we wenganye mu Yerusalemu wino utamanyile ivinthu vino vyachitisile kulyanye amanda yaa?'' 19 Yesu atili kwe woliwo, ''Ivinthuchi?'' Awatolelela weliwe, ''Ivinthu ivya kwe Yesu umu Nazareti, wino alinji amutumwa, uwamaka mu milimo na mu mazwi paminso yakwe Leza na wanthu wonsi, 20 swinya muno awasimapepo wakulu nawa nankholelo walemesile weliwe ukuti akomwe nga awamupamanthila. 21 Ukuwa twachetekelanga kuno weni alinji wenga wino walinji nu kukomola Izirayeli. Eta, nukonjelezya, nomba awanda wachititatu ukufuma pano ivinthu vyoo vyachitisile. 22 Kweni swinya, wamwi awanachi wano tuliponga watuzungusizye, pano walinji ku nkhungwe akachelochelo. 23 Pano watazanile umuwili wakwe, awiza, awati kuno waweni ichilolwa cha wangelo wano watili kuno amumi. 24 Awonsi wamwi wano walinji na sweswe awaya ku nkhungwe, nga awazana ndivino awanachi wavwanzile. Kweni watamuweni,'' 25 Yesu atili kwe woliwo, 'Mwe vipuwa vya wanthu swinya wa myenzo iyisitakupitisua mu kusuwila mu vyonsi awatumwa wavwanzile! 26 Wuzye chitalinji chakulondeka ukuti Kristu ayimbe kwe vyonye vyoo, swinya ukwinjila mu wuchindame wakwe?'' 27 Apano ukutalichila ukufuma pakwe Mose swinya ukufika ku watumwa wonsi, Yesu apilula kwe woliwo ivinthu ivya kuyana nu mwenecho mu mawaliko yonsi. 28 Walile pano wapalamila mu kaya kano wayanga kweneko, Yesu alolesizye ngati akupitilila. 29 Kweni awamusinjilizya, awati, ''Yikala naswe, amuno likuya kupipi na manguzi swinya wanda wuli nukusila.'' Achaleka Yesu winjila nu kwikala na woliwo. 30 Chachitisile kuno, pano weni wikala pansi na woliwo ukuti walye, weni asenda umukate, awupepela, nu kuwumonthola, weni wizile apa wenewo kwe woliwo. 31 Apano aminso yawo ayiuka, swinya awamumanya weliwe, nga weni azimatila ku kulola kwawo. 32 Awati wenga ku muwuye, ''Wuzye yitalungulanga imyenzo yitu mukasi mwitu, pano weni wachilinji akuvwanga kwe sweswe munzila, pano wiyulanga amawaliko?'' 33 Awakatuka pi ola lilyanye nu kunyochela ku Yerusalemu. Awazana ikumu na wenga wawungine apaliponga na wawo wano walinji na weliwo, 34 watinji, ''I Mfumu amwelimonye yikatusile, swinya yilolesile kwe Simoni.'' 35 Nga awavwanga ivinthu vino vyachitisile munzila, swinya wuliwuli Yesu alolesizye kwe woliwo mu kamontholanizye ka mukate. 36 Lyo wakuvwanga vyoo ivinthu, Yesu weliwenye imilizile pakasi pakwe woliwo. nga atili kwe woliwo, ''Umutende kwe mwemwe.'' 37 Kweni awawa ninthete nu kwizuzwa nu kutina, swinya walinji ngati waweni i chiwa. 38 Yesu atili kwe woliwo, ''Nga munochani mukutamika? Nga muno chani amawuzyo yakukatuka mu myenzo yinu? 39 Lolani amakasa na matamba yane, kuno anenenye. Ndemani nu kulola. Amuno umuzimu wusi nu munyafu na mafupa, ndivino mukulolela nene ndinavyo.'' 40 Pano wavwanzile choo, weni alanjizizye woliwo amakasa yakwe na matamba yakwe. 41 Ukuwa naponye nanthi kusuwila umulandu wa chimwemwe, swinya awazunguka. Yesu atili kwe woliwo, ''Wuzye muli na chimwi ukuti mulye?'' 42 Awamupa weliwe inswi iyitende, 43 nga ayisenda nu kuyilya paminso yawo. 44 Weni atili kwe woliwo, ''Pano nalinji namwe, nawanenile kuno chonsi chino chawalisilwe mwi sundo lya kwe Mose na Watumwa na Masalimo chifwile chifiswe.'' 45 Ngapano weni ayiyula imelenganio yawo, kuno wangiluka amawaliko. 46 Weni atili kwe woliwo, ''Amo chawalikwa, kuno e Kristu afwile atamike nu kukatuka swinya ukufuma ku wafwe pa wanda wachititatu. 47 Ukutontholokwa swinya ukutetelwa ku luwembu kulumbililwe mwi zina lyakwe ku myiko yonsi, ukutalichila mu Yerusalemu. 48 Mwe wakamboni ku vinthu vyoo. 49 Lolani, nenji nkhutumila mwemwe chino e Tata wane alayizizye. Kweni yikalani mumusumba wonye ukufika mwemwe mwazwikwa na maka ukufuma papela.'' 50 Ngapano Yesu akolela woliwo ukufuma kunzi ukufichila walinji mupipi nu Betaniya. Weni ayimika amakasa yakwe mupela nu kuwalota. 51 Chachitisile kuno, pano wachilinji akuwalota, weni wasyile woliwo nga wanyamuzilwe mupela ukuya mwiyulu. 52 Achaleka awamufukamila nu kunyochela ku Yerusalemu ni chimwemwe ichikulu. 53 Awalanga sitakulechelezya ukuwa mwi tempeli, ukupepa leza.