¹ Yesu ayinjila nga wapitanga ukupitila mu Yeriko. ² Lolani, kwalinji umunthu kulyanye izina lyakwe Zakeyu. Weni walinji e kasonkhezya wa musonkho swinya walinji wa chinondo. ³ Weni welezyanga ukuti alole ukuti Yesu walinji weweni, ukuwa wapositwe ukulola ukupitilila iwumba, umulandu walinji amufupi. ⁴ Achaleka weni asamalila pa nkholelo ya wanthu nu kukwela umuti uwukulu ukuti am,ulole, umulandu Yesu walinji mupipi ukupitila inzilanye yoyo. ⁵ Pano Yesu wizile fika pa masyo, apunamila nu kuti kwe weliwe, ''Zakeyu, pitisya yika, amuno ilelo nenji mfwile nikale pa ng'anda yako.'' ⁶ Achaleka weni wika nanthi kuzimba nu kupochelela weliwe ni chimwemwe. ⁷ Pano aliwensi waweni choo, awakwinuluka wonsinye, watinji, '''Weni ayinjizile ukulola a munthu wino a muwembu.'' ⁸ 'Zakeyu wimilila nukuti kwe Mfumu, ''Lola, Mfumu, insawu ya viya vyane nkhapa awasaluke, swinya ndi nachenjezya nanthi wenga chilichonsi, nenji ndinyosezya uwuvule imphindi zini.'' ⁹ Yesu atili kwe weliwe, ''Ilelo itulwa lyiza mu ng'anda yoo, umulandu weni nawenye a mwana wakwe Abrahamu. ¹⁰ Amuno u Mwana wa Munthu wiza ukuvamba nu kutula awanthu wano wasowa.'' ¹¹ Ala awivwa ivinthu vyoo, weni alandalila ukuvwanga nu kunena ichinilo, umulandu weni walinji papipi nu Yerusalemu, swinya awelengania kuno uwufumu wakwe Leza walinji mupipi ukuti wuloleke paponapapo. ¹² Achaleka weni atili, ''U munthu wumwi umuchindikwe ayile kunsi iya kutali ukuti akapochele kumwenecho uwufumu nga pano anyoke. ¹³ Weni ayita awawomvi wakwe ikumi nu kupa woliwo imphiya ikumu nga watili kwe woliwo, 'Muwomvye ukukala nu kukazya suka njize nyochele.' ¹⁴ Ukuwa awanthu wakwe awamupata swinya awatuma awanthu ukuya kwe weliwe, watinji, 'Tutanga tuzumile ukuti umunthu wee atulamulile.' ¹⁵ Chachitisile pano wizile wanyoka swinya, atili apochelela uwufumu, wapatichizizye awawomvi wakwe kwe wano wapile imphiya ukuti witwe kwe weliwe, kuno angamanya vino wasandulizile pa kukala nu kukazya. ¹⁶ ''Uwakutalichila wiza pankholelo yakwe, atili, 'Mfumu, ulundalama lwako lwasandulula izinji ikumi.' ¹⁷ Umunthunye weyo atili kwe weliwe, 'Wachiti chete, we muwomvi umuzima. Umulandu walinji we musuwilwa mu vitichi sana, wandi uwe na maka pa misumba ikumi.' ¹⁸ UWa chitiwili ayiza, atinji, 'Ulundalama lwako, mfumu, lwasandulula zinji zisano.' ¹⁹ Umunthu umuchindamikwe atili kwe weliwe, 'Senda amaka pa misumba yisano.' ²⁰ Wunji ayiza, atinji, 'Mfumu, senda ulundalama lwako, luno nasunzile ichete ku mwenda, ²¹ amuno natinanga wewe, umulandu wewe we munthu umutale. Ukasenda chino utawika mwenemo, swinya ukuvuna chino utakomela.' ²² Umunthu umuchindamikwe atili kwe weliwe, 'Na mazwi yakonye nandi nkhupanzye wewe, we muwomvi umuwipe. Wewe wamanya kuno ne munthu umutale, nkhasenda chino nthawika mwenemo, swinya nkhuvuna chino nthakomela. ²³ Nomba achani chino utawisile imphiya zyane ku wakakopezya, ilyakuti pano nanyoka ningaye nzisende ponga niya papela?' ²⁴ Umunthu umuchindikwe atili kwe woliwo wano wimilile papipi, 'Mupokani ulundalama, nga mupe weliwe wino ali ni kumi.' ²⁵ ''Awati kwe weliwe, 'Mfumu, ali nazyo indalama ikumi.' ²⁶ Nenji nkhuti kwe mwemwe, kuno aliwensi wino ali navyo alipewa ivivule, ukuwa kwakwe wino asinavyo, na chilyanye chino ali nacho chilipokwa. ²⁷ Kweni waa awalwani wane, wawo wano watalondanga imbe ne mfumu yawo, waletani koo swinya muwakome pa minso yane. ²⁸ Pano weni wavwanzile ivinthunye vyoo, weni apitilila nu wulendo, ukuya ku Yerusalemu. ²⁹ Kwizile kwawa pano wizile fika papipi nu Betifegi nu Betaniya, ku mwamba wuno witwanga Oliveti, weni watumile wawili mu wasambilizi, ³⁰ atinji, ''Yani mukaya ka pa nkholelo. Pano mukwinjila, mwandi muzane umwana wa ndokwe wino atatela akwelwe. Mumusapule nu kumuleta kwe nene. ³¹ Ndi aliwensi akukolowozya mwemwe, 'Achani chino mukumusapulila?' Muti, 'Imfumu yikumulonda.' ³² Wawo wano watumilwe awaya nu kuzana umwana wa ndokwe ndimuno Yesu wanenile woliwo. ³³ Pano wasapulanga umwana wa ndokwe, awenecho watili kwe woliwo, ''Achani chino mukusapulila umwana wa ndokwe?'' ³⁴ Awati, ''Imfumu yikumulonda.'' ³⁵ Awamuleta kwe Yesu, nga awasumbila imyinjilo yawo pa mwana wa ndokwe nu kwikazya penepo Yesu. ³⁶ Pano weni wapitanga, awanza imyinjilo yawo pa nzila. ³⁷ Pano nomba walinji nu kufika pa masyo yano umwamba wa Olive wukwikila, Iwumba lyonsi lya wa sambilizi lyatalisile ukusechelela swinya ukumutumvya Leza nizwi ikulu pa milimo iyikulu yino waweni, ³⁸ watinji, ''Ayilotwe imfumu yino yikwiza mwizina lya Mfumu! Umutende mwiyulu nu wuchindame mupela!'' ³⁹ Wanji mu wa Farisi mwi wumba watili kwe weliwe, ''Musambilizya, kalipila awasambilizi wako.'' ⁴⁰ Yesu atolelela nu kuti, ''Nkhuwanena mwemwe, Ndi waa walinji wamyalale, amawe yangapunda.'' ⁴¹ Pano Yesu wapalamila mu musumba, walosizye pakwe wenewo. ⁴² atinji, ''Ndi mwemwenye mwamanyile mu wanda woo, namwenye, ivinthu vino vikaleta umutende! ukuwa nomba vivwamisilwe ku minso yinu. ⁴³ Amuno amanda yaliyiza pakwe mwemwe pano awalwani winu walizenga ilinga ukuliwilizya mwemwe nu kuliwilizya mwemwe swinya ukuwafyenyelezya mu mbali zyonsi. ⁴⁴ Waliyuma mwemwe ukuya pansi swinya na wana winu na mwemwe. Watalileka nanthi lyonga iwe piwuye umulandu mutalimanyile pano Leza welezyanga ukuwatula.'' ⁴⁵ Yesu winjizile mwi tempeli nu kutalika ukuwinga wawo wano wakazyanga, ⁴⁶ atinji kwe woliwo, ''Kwawalikwa, 'Ing'anda yane yiliwa a ng'anda ya mapepo,' ukuwa mwayiwika yiwe yakwikalamo wakapoka.'' ⁴⁷ Achaleka Yesu wasambizyanga penye mwi tempeli. E simapepo mukulu na wakawalika na wasongo wa wanthu walondanga ukuti wakome weliwe, ⁴⁸ ukuwa nanthi kuzana inzila yakuchitila chochonye umulandu awanthu wonsi wateyelezizye sana kwe weliwe.