¹ Ngapano Yesu avwanga u mulumbe kwe woliwo ivya kuti wangapepa wuliwuli penye swinya watakatonthe, ² atinji, ''Mu musumba wumwi kwalinji a kalonzya wino atatinanga Leza swinya atachindikanga awanthu. ³ Nomba kwalinji u mufwilwe mu musumba wulyanye, swinya ayizanga penye kwe kalonzya, atinji, 'Unjavwe pa mulandu wane nu mulwani wane.' ⁴ Pa mphindi iyitali e kalonzya atalondanga ukuti amwavwilizye weliwe, ukuwa lyo papita akamphindi akatichi e kalonzya atili mu mwenzo wakwe, 'Napano nsitina e Leza pamwi ukuchindika umunthu, ⁵ lelo umulandu wee umufwilwe akuntchuzya, nenji nandi imwavwilizye pa mulandu wakwe, alyakuti atakanthonsye nu kwiza kwakwe ukwa penyepe.'''' ⁶ Ngapano i Mfumu yatili, ''Teyelezyani kwe chino e kalonzya u nthalungamana akulanda. ⁷ Nomba wuzye e Leza nawenye atanga alete uwulungamane kwe wasolwa wakwe wano wakulilila kwe weliwe umusanya nu wusiku? Wuzye alizimba pakwe woliwo? ⁸ Nenji nkhuwanena ukuti alileta uwulungamane kwe woliwo nanthi kuzimba. Naponye, pano u Mwana wa Munthu wiza, wuzye molimonye alizana isuwilo munsi ya pansi?'' ⁹ Ngapano Yesu avwanzile u mulumbe woo kwe wamwi wano wayilolanga awenecho ngati walinji awa lungamane swinya wano wakachefya awawuye, ¹⁰ '''Awanthu wawili wayile mwi tempeli ukuti wapepe -- wonga alinji amu Farisi swinya wunji alinji e kasonkhesya wa nsonkho. ¹¹ Umu Farisi ayimilile swinya apepanga ivinthu vyoo ivya mwenecho, 'Leza, nenji nkhukusalifya ukuti nene nthawa ngati awanji awanthu --Wakapoka, wanthalungamana, awazelele -- pamwi na wenye wee e kasonkhesya wansonkho. ¹² Nenji nkhafunga kawili mwe sabata. Nenji nkhawika ichikumi cha vyonsi vino nkhazana.' ¹³ Ukuwa e kasonkhesya wansonkho, ayimilile pawutali katichi, nanthi akwinula amino yakwe mwiyulu, kweni wuma pa chifuwa chakwe, atinji, 'Leza mfwila inkhumbu nene, ne muwembu.' ¹⁴ Nenji nkhuwanena, u munthu wee anyosile ku ng'anda yakwe alungamisilwe ukulusya wunji weyo, umulandu aliwensi wino akuyikwezya weka aliiswa, kweni aliwensi wino akuyisya weka ali kwezwa.'' ¹⁵ Awanthu nawonye wizanga kwe Yesu na wana wawo alyakuti angawapalamansya, ukuwa pano awasambilizi waweni choo, awawakalipila awanthu. ¹⁶ Ukuwa Yesu ayisile awana kwe weliwe, atinji, ''Zumilizyani awana awatichi ukuti wize kwe nene, swinya mutakati muwalesye. Amuno uwufumu wakwe Leza awawo. ¹⁷ Nakawuzyenye nkhuwanena, aliwensi wino atalipochelela uwufumu wakwe Leza ngati amwana atalitela ayinjile mwenemo.'' ¹⁸ E katungulula wumwi akolowozizye Yesu, atinji, ''Musambilizya umuzima, wuzye ningawomba wuli ukuti nkhapyane uwulanzi wamuyaya?'' ¹⁹ Yesu atili kwe weliwe, ''Wuzye achani fwandi ukunita umuzima? Pasi nanthi wonga umuzima, kandi Leza wekanye. ²⁰ Wewe wamanya amasundo--Utakachite uwuzelele, utakakome, utakiwe, utakasimichile ivyaufi, uchindike e wuso nu nyoko.'' ²¹ E katungulula atili, ''Vyonsinye ivinthu vyoo nenji navitonthela ukufuma ku wulumendo wane.'' ²² Pano Yesu ayivwa chocho, atili kwe weliwe, ''Chonga chino usi nacho. Ufwile ukazye vyonsi vino uli navyo nga upe kuwasaluke, ngapano wewe uliwa ni chuma mwiyulu--nga wize, unkhonkhe nene.'' ²³ Ukuwa pano e katungulula wivwile ivinthunye vyoo, ayizile awa ni chilanda nkhaninye, amuno alinji we chinondo nkhaninye. ²⁴ Apano Yesu, akulola weliwe ukuwa ni chilanda atili, ''Achitale wuli ukuti wawo wano a wachinondo ukuti winjile mu wufumu wakwe Leza! ²⁵ Amuno achipepuke ukuti umutwe wa ngamila winjile pa lyinso lya sindano, ukulusya ukuti umunthu umukankhale ayinjile mu wufumu wakwe Leza.'' ²⁶ Wawo wano wivwanga chenecho awatili, ''Nomba weweni wino angapokwa?'' ²⁷ Yesu atolelela, ''Ivinthu vino vitanga vichitike na wanthu vikachitika nu Leza.'' ²⁸ Peturo atili, ''Achizima, sweswe tulesile vilivyonsi vino avyitu nga tukonsile wewe.'' Ngapano ²⁹ Yesu atili kwe woliwo, ''Awenche, nenji nkhulanda kwe mwemwe ukuti pasi nanthi wonga wino alesile ing'anda, pamwi umuchi, pamwi awanyina, pamwi awakwasi, pamwi awana, ku mulandu wa wufumu wakwe Leza, ³⁰ wino atalipochelela ivivule ukulusya munsi yoo, swinya munsi iyakwiza, uwulanzi wa muyayaya.'' ³¹ Lyo awunganika iwikumi na wawili kwa mwenecho, atili kwe woliwo, ''Lolani, sweswe tukuya ku kupela ku Yerusalemu, swinya ivinthu vyonsi vino vyawalikwa na wakasema ivya Mwana wa Munthu vili fiswa. ³² Amuno alipwa ku Makandi, swinya aliwowozwa, swinya alisamulwa, swinya ukuswililwa amati. ³³ Lyo wamuvwapula, walimukoma, nga pa wanda wachititatu alikatuka swinya.'' ³⁴ Wativwisizye nanthi chimwi mu vinthu vyoo, swinya izwi lyoo lyalinji alifisame kwe woliwo, swinya wativwichisyanga ivinthu vino vyavwanzilwe. ³⁵ Chiza chawa ukuti, lyo Yesu alinji ukuti afike mu Yeriko, u munthu wumwi uwa nthonkho wikazile mumbali mwa musewo akulenga, ³⁶ lyo wivwa iwumba likupita mupipi, akolowozizye chino chachitikanga. ³⁷ Awamunena ukuti Yesu waku Nazareti wapitanga mupipi. ³⁸ Acheleka umunthu inthonkho yapundisizye, yatinji, ''Yesu, Mwana wakwe Davidi, uwe ni nkhumbu pakwe nene.'' ³⁹ Wawo wano wapitanga pankholelo awakalipila umunthu wa nthonkho, awamunena weliwe ukuti amyalale. Ukuwa apundisizye amwakonjelezya, ''Mwana wakwe Davidi, uwe ni nkhumbu pakwe nene.'' ⁴⁰ Yesu ayimilizile myaa nga alamulizile ukuti u munthu aletwe kwe weliwe. Ngapano pano umunthu inthonkho yawa mupipi, Yesu akolowozizye weliwe, ⁴¹ ''Wuzye wewe achani chino ukulonda ukuti nene nkhuchitile wewe?'' Atili, ''Mfumu, nenji nkhulonda ukupochelela ukulola kwane.'' ⁴² Yesu atili kwe weliwe, ''Pochelela ukulola kwako. Isuwilo lyako lyakupozya wewe.'' ⁴³ Paponapapo apochezile ukulola kwakwe nga amukonkha Yesu, achindamika Leza. Awanthu wionsinye, pano waweni choo, awapa ukutumvya kwe Leza.