¹ Yesu wavwanzile kuwa sambilizi, '' Amolimo ukuti kuliwa ivinthu vino vililenga ukuti tuwembuke. kweni akalanda kumunthu wino vilipitilamo ukuti vyize! ² Chingazipa kwakwe weliwe ukumunyepelela iwe munsingo nukumusumbila mwe sumbi ukuchila ukupunuzya wumwi uwawatichinye waa. ³ Muyilolechesye. Ndi umunyina akuwembuka, mukalipile, ndi watontholokwa, umutetele. ⁴ Ndi wawembuka kwe wewe imphindi munenulambali pawanda wonga, swinya imphindi munenulambali wanyoka kwe wewe, akuti, ' Natontholokwa,' ufwile ukumutetela!'' ⁵ Awapositole awati ku Mfumu, '' Tonjelezye isuwilo lyitu." ⁶ Imfumu yati, '' Ndi mwalinji nisuwilo ngati a mbeyu ya muzimwa, munganena ku muti wa muposya, ' Yinyunkhule, nukuya yilembeka mwe sumbi,' swinya wulikwivwila. ⁷ Nomba wewenu wakwe mwemwe, wino ali nuwa ntchito akulima pamwi akuchema ing'onzi, aliti kwe weliwe pano wiza ukufuma ku vyalo', ' Zanga zuwa uyikale paa tuwalya?' ⁸ Atangize ati kwe weliwe, 'Sengania chimwi indye, nukunyepa umupango muvizwalo vyako nukumbombela mpaka imalizye ukulya nukumwa. Apano pankholelo ulye nu kumwa'? ⁹ Atangasalifye umuwomvi umulandu wachisile ivinthu vino wamupatichizizye, angatela? ¹⁰ Avimo namwenye, pano mwachita ivinthu vyonsi vino mwakomelezwa, amuti, ' Swe wawomvi wavye. Twachita muno tukawombela.''' ¹¹ Ala pano watela akuya mu Yerusalemu, wapitanga mumphaka pakasi pe Samaliya nu Galileya. ¹² Pano winjilanga mukaya kamwi, kokonye wasunkhana na wonsi ikumi wano walinji namambombo. Wimilile apatali na weliwe ¹³ nga awapunda nizwi papela, awati, '' Yesu, tatakulu, twivwile inkhumbu.'' ¹⁴ Ala pano wawalola, avwanga kwe woliwo, '' Pitani mukayilanjizyekwe wasimapepo.'' Pano wapita awaswefya. ¹⁵ Apano wumwi uwakwe woliwo alola kuno wapozwa, anyoka, nizwi ikulu atumvya Leza. ¹⁶ Apona pansi pa matamba ya Yesu, akumusalifya. Walinji amu Samariya. ¹⁷ Apano Yesu ati, '' Watalinji ikumi wano waswefizwe? Wali kwinye wa mufundikambali (9)? ¹⁸ Wuzye pasi wanji wano wanyochezile ukutumvya Leza, lelo awenye umulendo?'' ¹⁹ Ati kwe weliwe, '' Katuka, swinya pitanga. Isuwilo lyako lyakupozya'' ²⁰ Pano wamukolowozyanga awa Farisi imphindi yino uwufumu wakwe Leza wuliyiza, Yesu atolelela ku woliwo ati, ''Uwufumu wakwe Leza wusikwiza pano tukulolechesya. ²¹ Pasi wumwi wino aliti, 'Lolani, woo koo!' pamwi, 'wowo koko' Amuno uwufumu wakwe Leza wuli mwakwe mwemwe.'' ²² Ati ku wasambilizi, '' Amanda yakwiza pano mulilonda ukuti mulole uwanda wumwi uwa Mwana wa Munthu, kweni mutaliwulola. ²³ Apano waliti kwe mwemwe, 'Lola, koko! Lola, paa!' Kweni mutakaye kweneko pamwi ukuwasamalila, ²⁴ chili ndi vino ukumesya kukawala pano kakuchilingania ukufuma imbali yonga iya mupela ukuya kumbali yinji iya mupela, avino chiliwa nu Mwana Munthu pawanda wakwe. ²⁵ Ukuwa alitalichila ayimbe nivinthu vivule swinya alikanwa nu luko loo. ²⁶ Ndivino chachisilwe mu manda yakwe Nowa, avino chiliwa mu manda ya Mwana Munthu. ²⁷ Walyanga, wamwanga, watwalananga, watwazyananga nukwiza fika imphindi yino Nowa winjilanga mu ngalawa -- ninthalala ayiza ing'wenzya wonsi ²⁸ Ndivino, chiliwa ngati achino chachisilwe mu manda ya Lot -- walyanga nu kumwa, wakazyanga nu kukala, wakomelanga nu kuzenga. ²⁹ Ukuwa pa wanda wino Loti wafumile mu Sodom, kwatonyile umulilo ne safule ukufuma mwiyulu ayonona wonsinye. ³⁰ Wowonye avino chiliwa na pawanda wuno Umwana Munthu ali wumbulika. ³¹ Pa wandanye wowo umunthu wino ali pa musonje atakize awakwika ukuti akasende ivinthu vyakwe mung'anda, swinya mutakaleke wino ali kuchalo anyochele. ³² Yizuka umuchi wakwe Lot. ³³ Wensi wino akulonda ukusunjilila uwumi wakwe aliwusumba, kweni wensi wino wasumba uwumi wakwe aliwusunjilila. ³⁴ Nkhuwanena, uwusiku wulyanye awanthu wawili pa chitala. Wonga alisendwa wumwi alisyala. ³⁵ Paliwa awanachi wawili walisyanga ponga. Wonga alisendwa, swinya wumwi alisyala. ³⁶ Awonsi wawili waliwa mu chalo; wonga alisendwa, wumwi alisyala. ³⁷ Awamukolowozya awati, ''Kwinye, Mfumu?'' Awati kwe woliwo, '' Kuno kuli Ichala, akuno mawimba nayo yakawungana ponga.''