¹ Wizile wapunda ikumi na wawili ponga nukuwapa amaka ni nsambu nu kusamazya imizimu miwipe nukupozya izya ndwala. ² Awatuma wolio ukuwizya uwufumu wakwe Leza nukupozya awalwale. ³ Ati kwe woliwo, '' Mutakasende nanthi chimwi pa wulendo-- nanthi a sozo, nanthi akakwama, nanthi amukate, nanthi a ndalama swinta nathi a amwinjilo uwa konjelezya. ⁴ Yiliyonsi ing'anda yino mwiza mwinjila, yikalani poponye mphaka pano mulifuma. ⁵ Kulikonsi kuno wataliwapochela, pano mukufuma mukayanye kako, muwakungutila itukumbu kumatamba yinu ngati awukamboni uwakususyania nawo.'' ⁶ Apano wafuma nukupitila mutwaya, wakuwizya ilandwe zima nu kupozya pliponsi. ⁷ Nomba Herodi e bwanamkubwa wivwile ivya vyonsi vino vyachitikanga, swinya azungusile, umulandu chavwanzilwe na wamwi ukuti Yohani akatusile ukufuma kuwafwe, ⁸ swinya wanji watili Eliya alolesile, na wanji swinya ukuti wonga mu wa kasema awa kali akatusile. ⁹ Herod atili, ''Naputuzile umutwe wakwe Yohani. Wuzye weweni wee wino nkhwivwa ivyakwe ivya musango woo. ¹⁰ Pano awa positole wanyoka, awa munena Yesu vilivyonsi vino wawomvire. Ngapano Yesu awasenda ponga na weliwe, nga waya ukutali ukumyalale ku musumba wuno witwanga Betisayida. ¹¹ Ukuwa pano amawumba yivwile choo, ayamukonkha weliwe. Yesu apochezile woliwo nu kuvwanga kwe woliwo ivya wufumu wakwe Leza, swinya apozizye wawo wano walondanga ukupola. ¹² Nomba uwanda walinji nukuti wumale, nga awikumi na wawili wizile kwe Yesu nga awatili, ''Usamazye iwumba ukuti waye mutwaya twa mupipi ukuliwilizya paa ukuti waye wazane apakulala ni chakulya, umulandu tuli koo ukutali nu twaya.'' ¹³ Ukuwa Yesu atili kwe woliwo, ''Mwemwe muwape chimwi ichakuti walye.'' Awatili, ''Imikate yino tulinayo yitanga yichile yisano ni nswi ziwili--kandi ndi tungaye nu kukala ichakulya cha wanthu wonsi waa.'' ¹⁴ (Palinji awonsi papipi ni myanda yisano.) Yesu atili ku wasambilizi wakwe, ''Wikazyani pansi mu viwunga vya kufika amakumi yasano chonga.'' ¹⁵ Achaleka awawomba choo, nu kwikazya awanthu pansi. ¹⁶ Ukusenda imikate yisano ni nswi ziwili, Yesu winusizye aminso mwiyulu, avilota nu kuvimenulania, nga apile vyolivyo ku wasambilizya ukuti wape iwumba. ¹⁷ Wonsinye walile swinya wikusi, nga vino vyasyazile awavisenda--ivitundu ikumi na viwili vya tumontholanie. ¹⁸ Kwizile kwawa pano Yesu apepanga wengavyenye, awasambilizi walinji na weliwe. Yesu awakolowozizye ati, ''Wuzye amawumba yakuti nene ne weni?'' ¹⁹ Awatolelela, ''Yohani e Kabatizya. Kweni awanji wakuti Eliya, swinya awanji wakuti wonga mu wakasema ukufuma kali akatusile.'' ²⁰ Ngapano Yesu atili kwe woliwo, ''Ukuwa wuzye mwemwe mukuti nene ne weni?'' Peturo atolelela, ''E Kristu wakwe Leza.'' ²¹ Kweni Yesu awachenjezizye ukuti watamunene nanthi wonga choo, ²² atinji, ''U Mwana wa Munthu afwile achule ivinthu ivivule swinya akanwe na wasongo na wasimapepo na wakawalika, swinya alikomwa nga pa wanda wachititatu ali katuswa.'' ²³ Ngapano atili kwe woliwo wonsi, ''Ndi wumwi akulonda akonkhe nene, afwile ayikane wenga swinya asende uwuchingane wakwe imphindi zyonsi nga akonkhe nene. ²⁴ Aliwensi anga tula uwulanzi wakwe aliwusovya, kweni wensi wino asovya uwulanzi wakwe umulandu wakwe nene aliwutula. ²⁵ Wuzye achizimachi ukuti umunthu azane insi ya pansi yonsi, kweni ayisovye pamwi ayipoke wenga? ²⁶ Wensi wino ali ninsoni muno nene na mazwi yane, muno weliwe u Mwana wa Munthu aliwa ninsoni pano akwiza mu wuchindame wakwe umwenecho swinya uwuchindame wakwe Tata wakwe nu wa wangelo awatele. ²⁷ Ukuwa nkhuwanena mu chisinkha, pali wamwi wano wimilizile paa wano watalitela wawonje imfwa lyo wachili wataweni uwufumu wakwe Leza.'' ²⁸ Nomba papipi amanda kananimonsi(8) ukufuma pano Yesu avwanzile amazwi yaa, asenzile ponga na weliwe Peturo, nu Yohani, nu Yakobi nga wayile mu mwamba mu kupepa. ²⁹ Pano wapepanga, imilolechele ya paminso pakwe papiliwusile, ni vizwalo vyakwe vyawa iviswepe ukulusya. ³⁰ Lolani, awonsi wawili wavwanganga na weliwe, Mose nu Eliya, ³¹ wano walolesile mu wuchindame, wakuvwanzania nu Yesu ivya wulendo wakwe, wuno alinji nukuwumalizya mu Yerusalemu. ³² Nomba Peturo na wano walinji na weliwe walinji nu tulo utukulu, ukuwa pano waziwuka ichete, waweni uwuchindame wakwe na wonsi wawili wano wimilile na weliwe. ³³ Pano wayanga apatali nu Yesu, Peturo atili kwe weliwe, ''Bwana, achizima ukuti sweswe tuwe paa. Uleke sweswe tuzenge utututu tutatu, konga kakwe wewe, konga kakwe Mose, na konga kakwe Eliya.'' (Atamanyile chino wavwanganga.) ³⁴ Lyo achilinji akuvwanga choo, iwingo lizile nga lyawavwimba woliwo, swinya awawa ni nthete pano winjilanga mwi wingo. ³⁵ Izwi lyizile ukufuma mwi wingo, lyatinji, ''Wee a Mwana wane, wonga wino amusolwe; muteyelezye kwe weliwe.'' ³⁶ Pano izwi lyavwanzile, Yesu azanilwe ali wenga. Awamyalala swinya nanthi kumunena wumwi mu mandanye yayo chilichonsi icha vino waweni. ³⁷ Nomba pa wanda wakukonkha, pano wizile wika ukufuma mu lupili, iwumba ikulu lyasunkhine na weliwe. ³⁸ Lolani, u monsi mwi wumba izile apunda, atinji, ''Musambilizya, nkhukulenga ukuti ulole umwana wane umulumendo, amuno amwana wane wenganye. ³⁹ Wewe ulole, u muzimu wukuwa na maka pakwe weliwe ngapano akutalika ukukuta; wukupanjisya ukuti asalamanthe alyakuti itatafulo alifuma mu mulomo. Umuzimu nanthi kumusya swinya wukamusyotolania uwuwi. ⁴⁰ Nakomelezizye awasambilizi wako ukuti wawupatichizye wufume, kweni awapotwa.'' ⁴¹ Yesu atolelela nga atili, ''Mwe wanthasuwila swinya inkhulo iyiwipe, wuzye pangapita imphindi wuli ukuti nene injimbe muno mwemwe? Mulete umwana wako paa.'' ⁴² Pano umulumendo wizanga, i demoni alimumisya pansi swinya ukumuyingania nu kusalamantha. Ukuwa Yesu akalipila umuzimu uwunyale swinya apozizye umulumendo, nga amunyosya kwe baba wakwe. ⁴³ Ngapano awazunguka wonsinye nu wukulu wakwe Leza. Pano wonsinye wazungukanga pakwe vilivyonsi Yesu wachitanga, atili ku wasambilizi wakwe, ⁴⁴ ''Lekani amazwi yaa yinjile mukasi nkhani ya makutwi yinu: U Mwana wa Munthu alilemekwa ukuya mu makasa ya wanthu.'' ⁴⁵ Ukuwa wativwichisizye imivwanjile yakwe. Chalinji achifisame kwe woliwo, alyakuti watakamanye chino chikusula, ukuwa lelo awatina ukuti wangakolowozya ivya mivwanjile yoo. ⁴⁶ Ngapano ukupazinkhana akutalika pakasi pakwe woliwo ivyakuti weweni mwakwe woliwo aliwa amukulu ukulusya. ⁴⁷ Ukuwa Yesu, ukumanya amelenganio mu myinzo yawo, wizile asenda umwana umutichi nu kumuwika pa mbali yakwe ⁴⁸ nga atili kwe woliwo, ''Wensi wino apochelela umwana wee mwi zina lyane, akupochelela nene; swinya wensi wino akupochelela nene, akupochelela wonga wino wanthuma nene. Amuno wensi wino amuchepe mwakwe mwemwe mwensi a wonga wino amukulu.'' ⁴⁹ Yohani atolelela, ''Bwana, sweswe tuweni wumwi akusamazya ama demoni mwi zina lyako kweni twamulesizye, umulandu asipita ponga na sweswe.'' ⁵⁰ ''Matakamulesye,'' Yesu atili, ''Umulandu wensi wino atakususya mwemwe awinu.'' ⁵¹ Pano amanda yapalamila ukuti asendwe, alondesizye ukuti aye ku Yerusalemu. ⁵² Atumile inthumwi pa nkholelo zyakwe, nga awaya winjila mu kaya ka Samariya ukuti wasenganie vilivyonsi kwe weliwe. ⁵³ Kweni awanthu kulyanye watamupochelezile weliwe umulandu alondesyanga ukuti aye ku Yerusalemu. ⁵⁴ Pano awasambilizi u Yakobi nu Yohani waweni choo, awatili, ''Mfumu, wuzye ukulonda sweswe tupingule umulilo ukuti wize pansi ukufuma mwiyulu nu kuwonona woliwo?'' ⁵⁵ Ukuwa apiliwusile swinya awakalipilizile woliwo, ⁵⁶ nga awaya ku kaya akanji. ⁵⁷ Pano wapitanga mu musewo, wumwi atili kwe Yesu, ''Nenji nandi inkhonkhe wewe kulikonsi kuno ukuya.'' ⁵⁸ Yesu atili kwe weliwe, ''Awa mumbwe wali ni vipompho, ni nyunyi zya mupela zili ni visalanzo, kweni u Mwana wa Munthu asi nanthi pamwi ukuti alambalike umutwe wakwe.'' ⁵⁹ Ngapano atili kwe wunji, ''Konkha nene.'' Ukuwa weni atili, ''Mfumu, pakutalichila leka inje nzyike e baba wane.'' ⁶⁰ Ukuwa Yesu atili kwe weliwe, ''Waleke awafwe ukuti wazyike awafwe wawo. Ukuwa pano ukuya, yanga swinya uwizye ukutali na mu mbali uwufumu wakwe Leza.'' ⁶¹ Ngapano wunji wumwi nawenye atili, ''Nenji ndikonkha wewe, Mfumu, kweni pakutalichila leka inje imbalaye wawo mu kaya kane.'' ⁶² Yesu atolelela kwe weliwe, ''Nanthi wonga wino walema inkhundi nga akulola kwisinda amuyane ku wufumw wakwe Leza.''