¹ Chachisilwe zuwa pankholelo kuno Yesu watalisile ukupita mu misumba na mutwaya utupusane, ukulumbilila nu kuwizya ilandwe zima ilya wufumu wakwe Leza. Awi kumi na wawili walinji nanwe, ² na wanachinye wamwi wano wapozizwe ku mizimu miwipe ni zyandwala: Mariya wino witwangwa Magadaleni, ukufuma mwakwe wino ama demoni munenula mbali(7) yasamazizwe; ³ Yoana, umuchi wakwe Chuza, e kalolechesya wakwe Herodi; Suzana; na wanji awavule, wano, mwe vino walinji navyo, wapanga ivya kulondeka vyawo. ⁴ Pano iwumba ikulu lya wanthu lyachilinji likuwungana, swinya awanthu wiza kwe weliwe ukufuma mu musumba nu musumba, wanenile umulumbe: ⁵ ''U mulimi ayile mukutanda imbeyu. Lyo akutanda, zimwi zyaponezile mu mbali ya nzila nga azilyatwa pansi pa matamba, nga inyunyi zya mupela azilya zyenezyo. ⁶ Yimwi ayiponela piwe, nga zuwazuwa pano yakula, ayinyala, umulandu patalinji aminzi. ⁷ Yimwi ayiponela mu minga, nga iminga ayikula ponga ni mbeyu nu kuyititichizya. ⁸ Ukuwa yimwi ayipona pa muvundo nga ayiwapa ivizuwalo vino vyalinji umwanda(100) uwukulu.'' Ukufuma pano Yesu avwanga ivinthunye vyoo, wapunzile, ''Aliwensi ali na makutwi iya kwivwa, mulekani ayivwe.'' ⁹ AZwasambilizi wakwe awamukolowozya achani umulumbe woo wukupiliwula. ¹⁰ Weni atili, ''Ukumanya kwa nkhama zya mu wufumu wakwe Leza chapwa kwe mwemwe, kweni ku wanji nkhuvwanga mu milumbe, alyakuti 'ukulola waliwalola nanthi kulolechesya, swinya ukwivwa waliyivwa nanthi kwivwichisya.' ¹¹ Lelo koo akusula kwa mulumbe: Imbeyu alizwi lya kwe Leza. ¹² Zino zyalinji mu mbali munzila a wawo wano wivwa, ukuwa pano satana wiza nu kufumya izwi ukufuma mu myenzo yawo alyakuti watati wasuwile nga wapusuke. ¹³ Zino zyalinji pa liwe a wawo wano, pano wivwa izwi, wakulipochelela ni chimwemwe. ukuwa wasi ni misisi; wakusuwila pa mphindi iyitichi, nga mu mphindi ya melezyo wakapona. ¹⁴ Imbeyu zino zyaponezile mu myunga a wanthu wano wakwivwa izwi, kweni lyo wakupita mu nzila zyawo, wakakopekwa na makumbuchila aya chuma nu lwizyo lwa wulanzi woo, nga ichikomwa chawo chisicha. ¹⁵ Ukuwa imbeyu yino yaponile pa muvundo, waa awali wano, wakwivwa izwi nu mwenzo wa chisinga nu wuzima, wakusunjilila swinya ukukoma ichikomwa nu kutepwa kwa kujimba. ¹⁶ ''Nanthi wumwi akukozya inyale nga ayikupichile nu lweso pamwi ayiwike mwivungululu lya chitala. Ukuwa, akayiwika pa chilemelo alyakuti aliwensi wino akwinjila angalola uluswepo. ¹⁷ Amuno nanthi chimwi ichifisame chino chitalimanyikwa, nathi chimwi icha nkhama chino chitalimanyikwa nu kwiza mu luswepo. ¹⁸ Acho teyelezyani mwivwichisye, amuno kwe wenga wino alinavyo, ivivule vilipwa kwe weliwe, ukuwa weyo wenga wino asinavyo, ne vino akwelengania weni alinavyo vilipokwa ukufuma kwe weliwe.'' ¹⁹ Apano e nyina na wanyina awiza kwe weliwe, kweni awapotwa ukupalamila kwe weliwe umulandu ni wumba. ²⁰ Wamunenile, ''E nyoko na wanyoko wimilile panzi, wakuvwamba mulolane.'' ²¹ Ukuwa Yesu atolelela nu kuti kwe woliwo, ''E mayo na wanyina wane a wawo wano wakwivwa izwi lyakwe Leza nu kuliwomba.'' ²² Nomba uwanda wumwi Yesu ayinjila mu wato na wasambilizi wakwe nga atili kwe woliwo, ''Tuyani tulambe tuye kumbalama yinji iyakwe sumbi.'' Awakatuka. ²³ Ala lyo wakupita uwulendo wapa minzi Yesu aponechela. Ichimuza ichikulu achiza pe sumbi, swinya mu wato mwinjilanga aminzi, swinya walinji mu chakutinia. ²⁴ Apano awasambilizi wakwe Yesu awiza kwe weliwe awamuziwusya, awavwanga, ''Bwana, bwana! Tuli mupipi ukufwa!'' Yesu aziwuka nga akalipila umuza ni pwizi lya minzi, nga vyamyalala nu kutekania. ²⁵ Ngapano atili kwe woliwo, ''Wuzye isuwilo linu lili kwinye?'' Kweni walinji ni nthete swinya awazunguka, nga awakolowozyania wenga nu muwuye, ''Wuzye nomba weweni wee, wino akupingula ni chimuzanye na minzi, swinya vikumwivwila?'' ²⁶ Awapita pa chipya cha Geraseni, chino chilinji wulunji ne sumbi ukufuma ku Galileya. ²⁷ Pano Yesu wika walyata pa chitunthu, asunkhine nu monsi wumwi ukufuma mu musumba wino walinji na mademoni. Mumphindi iyitali atazwalanga ivizwalo, swinya atikalanga mu ng'anda kweni wikalanga pakasi pa nkhungwe. ²⁸ Pano waweni Yesu, wizile wapunda nu nukupona pansi pankholelo ya weliwe nga atili nizwi ikulu, ''Wuzye ukulonda uchite chani na nene, Yesu, Mwana wakwe Leza Umukulu Ukulusya? Nkhukulenga, utakansunde.'' ²⁹ Amuno Yesu wapinguzile imizimu iyinyale yifume mu monsi. Amuno imphindi izivule yamulemanga, swinya chingatenga wamunyefile ni minyololo ku vimiti nu kumulindilila, waputulanianga iminyololo yakwe swinya ayimusamazya ukuya mu mphanga. ³⁰ Ngapano Yesu akolowozya weliwe, ''Wuzye izina lyako weweni?'' Atili, ''Chiliwumba,'' amuno ama demoni ayavule yinjizile mwakwe weliwe. ³¹ Ama demoni ayatwalilila ukumulenga ukuti atakayasamazizye mwizongolela. ³² Nomba iwufyo lya wakapoli awavule lyalinji palyanye wakulya mumbali ya mwamba. Ama demoni ayalenga weliwe ukuti aleke yaye mu wakapoli, nga ayazumilizya. ³³ Achaleka ama demoni ayafuma mu monsi nu kuya mu wakapoli, nga uwufyo awusamala nu kutelemuchila mwe sumbi swinya awung'wela. ³⁴ Pano wawo wano wachemanga wakapoli walola vino vyachitisile, awasamala nu kusasya vyenevyo mu musumba na mutwaya. ³⁵ Achaleka awanthu wayile mukulola vino vyachitisile, nga awiza kwe Yesu nu kuzana umonsi wino ama demoni yafumilemo. Wikazile pa matamba yakwe Yesu, azwite swinya ali na mano yakwe; Awawa ni nthete. ³⁶ Apano wawo wano wachiweni wawanena woliwo muno u monsi wino walemilwe na ma demoni wapolezile. ³⁷ Ngapano wonsi awanthu wa mu chipya cha Geraseni walenzile Yesu ukuti afume kwe woliwo, amuno walinji ni nthete nkhani nkhaninye. Achaleka winjizile mu wato alyakuti watalike ukunyoka. ³⁸ U monsi mwakwe wino ama demoni yafumile alenga Yesu ukuti amuleke apite na weliwe, ukuwa Yesu amusamazizye, atinji, ³⁹ ''Nyochela ku musolo wako swinya uye uwanene chino Leza wakuwombela.'' U monsi izile apita, akuwizya monsinye mu musumba wonsi chino Yesu wamuchitizile weliwe. ⁴⁰ Walile Yesu ala wanyoka, iwumba ali mupochelela, amuno wonsinye walindililanga weliwe. ⁴¹ Lolani, u monsi wino witwanga Jayirasi, wino walinji wenga wa wanankholelo mu sinagogi, awiza nu kupona pansi pa matamba yakwe Yesu, nga walenga weliwe ukuti aye ku ng'anda yakwe ⁴² umulandu umwana wakwe umukazyana wenganye, uwa myika ikumi na yiwili, alinji mupipi nu kufwa. Lyo Yesu ali munzila, amawumba ya wanthu yamutitichizya ukuliwilizya weliwe. ⁴³ Nomba palinji umwanachi palyanye wino wafumanga uwazi imyaka ikumi na yiwili swinya wasumvile indalama zyakwe zyonsi, lelo patalinji nanthi wumwi uwa kumupozya. ⁴⁴ Aya kunsizi kwe Yesu nu kukumvya insongo ya mwinjilo wakwe, nga paponapapo ukufuma kwa wazi akuputuka. ⁴⁵ Yesu atili, ''Ngafwandi weweni wino wankhumvya?'' Nga lyo wonsi wakana, Peturo atili, ''Bwana, iwumba lya wanthu likuliwilizizye swinya likukufyenyentchezya.'' ⁴⁶ Kweni Yesu atili, ''Wumi wankhumvya, amuno namanya kuno amaka yamwi yafuma mwakwe nene.'' ⁴⁷ Pano umwanachi wamanya kuno atanga asamale ukumanyikwa, ayiza akuzakaza nu kupona pansi pankholelo ya weliwe. Mukulola kwa wanthu wonsi awumbula umulanduchi akumvyizizye weliwe swinya muno paponapapo wapolela. ⁴⁸ Ngapano atili ku mwanachi, ''Mwanane, isuwilo lyako lyakupozya. Upite mu mutende.'' ⁴⁹ Pano wachilinji akuvwanga, akwiza wumwi ukufuma ku ng'anda yakwe nankholelo mu sinagogi, akuti, ''Umukazyana wako wafwa. Utakatwalilile ukuchuzya.'' ⁵⁰ Ukuwa pano Yesu wivwa choo, atolelela kwe Jayirasi, ''Utakatine; usuwilevye, nga alipola.'' ⁵¹ Pano wiza ku ng'anda, atazumilizizye nanthi wenga ukuti ayinjile nawe, nkhani Peturo nu Yohani nu Yakobi, ne tata wakwe mukazyana nu nyina. ⁵² Nomba wonsinye walosyanga nu kuchichima umulandu wa mukazyana, kweni Yesu atili, ''Mutakati mwalosya; atafwile kweni aponechezile.'' ⁵³ Ukuwa awamuseka, umulandu wamanyile kuno wafwile. ⁵⁴ Ukuwa alema ikasa lya mukazyana nu kupunda, ati. ''Mwana, katuka!'' ⁵⁵ U muzimu wa mukazyana awunyochela, nga wakatuka paponapapo. Awalamulila ukuti wamupe chimwi ukuti alye. ⁵⁶ Awakwasi wakwe awazunguka, lelo Yesu awakomelezya watakanene nanthi wenga chino chachitisile.