¹ Ala Yesu wamala vyonsi weni wanenanga mukwivwa kwa wanthu, weni wizile winjila mu Kapenamu. ² Nomba e kenturiyo walinji nu muzya wino wimichilwa nkhaninye na weliwe, nga walwile na mupipi nu kufwa. ³ Pano e kenturiyo wivwa ivya Yesu, weni watumile kwe weliwe awasongo wa wa Yuda, ukulenga weliwe ukuti ayize nu kupozya umuwomvi wakwe. ⁴ Pano wafika kwe Yesu, awalambilizya weliwe, watinji, ''Weni wazipila ukuti wewe uchite choo muno weliwe, ⁵ umulandu weni wakunda insi yitu, swinya awili wenga wino watuzenjela e sinagogi.'' ⁶ Achaleka Yesu wapitilila mu nzila yakwe na woliwo. Ukuwa pano weni walinji mupipi ni ng'anda, e kenturiyo watuma iviwuzya vyakwe ukuti wati kwe weliwe, ''Mfumu, utakayitamye, umulandu nenji nthazipila ukuti wewe ungiza mu ng'anda yane. ⁷ Pa chifukwa choo nenji nthelezizye pe nenga ukuwa muzipile ukuti njize kwe wewe, kweni nenavye izwi nga umuwomvi wane alipola. ⁸ Amuno nenji nanenye ne munthu wino ali pansi pa maka, na wavita pansi pakwe nene. Nenji nkhati kwe wee wenga, 'Yanga,' nga weni akuya, swinya kwe wunji wenga, 'Zanga,' nga weni akwiza, swinya ku muwomvi wane, 'Womba choo,' nga weni akuchiwomba.'' ⁹ Pano Yesu wivwile choo, weni wazungusile kwe weliwe, nu kupiluchila kwi wumba lino lyakonkhanga weliwe atili, ''Nenji nkhuti kwe mwemwe, na mu Izirayelinye nthazana isuwilo ngati lyoo.'' ¹⁰ Pano wawo wano watumilwe wanyosile ukuya kung'anda, awazana umuwomvi ali chete. ¹¹ Lyo chachitikavye choo, Yesu wayile ku musumba uwakwitwa Nayini, nga awasambilizi wakwe ni wumba ikulu lyayile na weliwe. ¹² Lyoo wafika mupipi ni chimphongolo cha musumba, lolani, umunthu wino wafwile walinji nukuya ukumuzyika, umulumendo wenganye kwe nyina (wino walinji amufwilwe), swinya iwumba ikulunye ukufuma mu musumba lyalinji nawe. ¹³ Pano i Mfumu yaweni weliwe, ichilanda chamulema nkhaninye amuno weliwe nga atili kwe weliwe, ''Utalosya.'' ¹⁴ Ngapano weni wayile nu kulema mumbali mwa chino wanyamuzile penepo ichala, nga wawo wano wachinyamuzile wimilizile myaa. Weni atili, ''Mulumendo, nenji nkhuti kwe wewe, katuka.'' ¹⁵ Umufwe ayikala nu kutalika ukulanda, nga Yesu apa weliwe kwe nyina. ¹⁶ Apano inthete yalema wonsinye, awapitilila ukutumvya Leza, watinji, ''Umutumwa umukulu wakatuswa pakasi pakwe sweswe'' swinya ''Leza akulolechesya pa wanthu wakwe.'' ¹⁷ Ilandwe lyoo ilya Yesu lyasata mu kaya konsi ika Yudeya nu twaya twaya tonsi utwa mupipi. ¹⁸ Awasambilizi wakwe Yohani awamuvyanjila vyonsi ivinthunye vyovyo. ¹⁹ Ngapano Yohani ayita wawili iwa wasambilizi wakwe nu kuwatuma kwe Mfumu ukuti wati, ''Wuzye awewe wenga wino wandi ayize, pamwi tulolele wunji?'' ²⁰ Pano wizile papipi nu Yesu, awonsi watili, ''Yohani Kabatizya atutumile sweswe kwe wewe ukuti tuti, 'Wuzye awewe wenga wino ukwiza, pamwi tulolele wunji?'' ²¹ Pi ola lyolyo weni apozizye awavule awanthu ukufuma ku ndwala ni nthazi nu kufuma ku mizimu miwipe, swinya na ku wanthu awavule wano walinji a nthonkho wapile ukulola. ²² Yesu atolelela nu kuti kwe woliwo, ''Ndi mwapita pa nzila yinu, munene kwe Yohani chino muweni nu ukwivwa. Inthonkho zikupochelela ukulola, awalemale wakupita, awamambombo wakuswepa, awakutwi wakwivwa, awanthu wano wafwa wakukatuswa ukunyochela ku wumi, awasaluke wakuvwangwa ilandwe zima. ²³ Umunthu wino atakuleka ukusuwila mwakwe nene umulandu wa milimo yane a mupepwe.'' ²⁴ Ala pano intumwi zyakwe Yohani zyapita, Yesu atalika ukuti ku mawumba ivya Yohani, ''Wuzye mwayile mu lupalang'ang'a ukulola chani? A litete lino likayinganwa nu muza? ²⁵ Ukuwa mwayile ukulola chani? U munthu wino wazwite ivizwalo ivitonthe? Lolani, wawo wano wakuzwala ivizwalo vya kuyitopwa swinya wano wakakwikala ichete wali mung'anda zya mafumu. ²⁶ Kweni mwayile ukulola chani? U mutumwa? Amolimo, nenji nkhuti kwe mwemwe, nu kulusya nu mutumwanye. ²⁷ Wee a weni wino chawalikwa, 'Lolani, nenji nkhutuma inthumwi pa minso yinu, wino alisengania inzila yinu yinu.' ²⁸ Nenji nkhuti kwe mwemwe, pakasi pe wano wakwatwa ku wanachi nanthi wenga amukulu ukulusya Yohani. Kweni wenga wino wachepesya mu wufumu wakwe Leza a mukulu ukumulusya.'' ²⁹ (Pano awanthu wivwa choo, ponga na wakasonchezya wa musonkho, awazumilizya kuno Leza a mulungamane, umulandu wabatizizwe nu wubatizyo wakwe Yohani. ³⁰ Ukuwa awa Farisi na wakamanya masundo wakanile ukulonda kwakwe Leza umulandu wakwe woliwo awenecho, amuno watabatizizwe nu Yohani.) ³¹ ''Ku chani, nomba, ningakolania awanthu awa nkhwatwa yoo? Wuzye wali ngati achani? ³² Wali ngati awana wakwizya mu masyo yakukazizya, wano wakwikala nu kwitana wenga nu muwuye nu kuti, 'Twawimbilizile imfwemfwe, kweni mutachinile. Twimbilizile indwimbo zya pamfwa, kweni mutalosizye.' ³³ Amuno Yohani kabatizya wizile atakulya umukate nu kung'wa nanthi alipala, nga mwatinji, 'Weni ali ni dimoni.' ³⁴ U Mwana wa Munthu wizile akulya nu kung'wa, nga mwati, 'Lolani, weni watemwa ukulya swinya we chakolwa, ichiwuza cha wakasonchezya wa musonkho na wawembu!' ³⁵ Ukuwa injelu zikalungamikwa na wana wakwe wansi.'' ³⁶ Nomba wenga uwa wa Farisi wisile Yesu ukuti alye na weliwe. Ala pano Yesu ayinjila mu ng'anda ya mu Farisi, ayikala pa beche ukuti alye. ³⁷ Lolani, kwalinji umwanachi mu musumba wino walinji a muwembu. Pano weni wizile wamanya kuno Yesu ali pa chakulya mu ng'anda ya mu Farisi, weni izile aleta infungo ya mafuta amanunchile. ³⁸ Pano wachilinji ayimilile kunsizi ye weliwe papipi na matamba yakwe, akulila, atalika ukunyesya amatamba yakwe namansozi, apyela yeneyo ni nyele zyakwe swinya afyompha amatamba yakwe nga apaka yeneyo na mafuta amanunchile. ³⁹ Pano u mu Farisi wino wisile Yesu waweni choo, welenginie kwe wenga umwenecho, atinji, ''Ndi umunthu wee walinji a mutumwa, wanga amanye ukuti umwanachinye wee wino akumulema weweni swinya achani, kuno a muwembu.'' ⁴⁰ Yesu atolelela nu kuti kwe weliwe, ''Simoni, nenji ndi na chimwi ichakuti nkhunene.'' Weni atili, ''chinene, Musambilizya!'' ⁴¹ Yesu atili, ''E kakopesya wa ndalama walinji na wa nkhongole wawili. Wenga walinji ninkhongole ama denari imyanda yisano(500), nga wunji amakumi yasano. ⁴² Pano waposilwe ukuti wamunyosezye, weni wizile watetela wonsi ponga. Ngafwandi, weweni mwakwe woliwo angamukundisya?'' ⁴³ Simoni atolelela weliwe nu kuti, 'Nkhwelengania weyo wino wamutetela ukulusya,'' Yesu atili kwe weliwe, ''Wapanzya molimonye.'' ⁴⁴ Yesu apiluchila ku mwanachi nu kuti kwe Simoni, ''Ukulola umwanachi wee. Nenji ninjila mu ng'anda yako. Utamphile nathi aminzi yakusamba ku matamba, kweni wee wanyesya amatamba yane na mansozi yakwe swinya wayasyumula ni nyele zyakwe. ⁴⁵ Wewe utampile nanthi akufyompha, ukuwa ukufuma pa mphindi nenji ninjizile moo atalesile ukufyompha amatamba yane. ⁴⁶ Wenji nanthi kupaka amafuta umutwe wane, ukuwa weni apasile amanama yane na mafuta amanunchile. ⁴⁷ Achaleka nkhuti kwe wewe, amawembu yakwe, yano yalinji ayavule, yatetelwa -- amuno weni wakundisya. Ukuwa weyo wenga wino watetelwa akatichi, akakunda akatichi.'' ⁴⁸ Ngapano weni atili kwe mukazyana, ''Amawembu yako yatetelwa.'' ⁴⁹ Wawo wano wikazile ponga watalisile akuvwanga mukasi muwenecho, ''Wuzye weweni wee wino akutetela na mawembukonye?'' ⁵⁰ Ngapano Yesu atili ku mwanachi, ''Isuwilo lyako lyakutula. Pitanga mu mutende.''