¹ Nomba chachitisile ukuti pa wanda wa Sabata kuno Yesu wapitilanga mu vyalo vya malezi, nga awasambilizi wakwe wasolanga imitwe ya malezi, awayipukusa mu makasa yawo, nga awalya imphumba. ² Ukuwa wamwi mu wa Farisi awati, ''Wuzye achani fwandi chino mukuwomba chino asa lisundo pa wanda wa sabata?'' ³ Pakutolela woliwo, Yesu atili, ''Wuzwe mutawelenga chino Davidi wachitile pano alinji ni nzala, weni na wanthu wano walinji na weliwe? ⁴ Ayile ku ng'anda yakwe Leza nu kusenda umukate wa kuzanwa nga alya wumwi mu mikate swinya apa wumwi ku wonsi wano alinji nawo ukuti walye, napano chalinji a lisundo ku wasimapepo watupu ukuti walye wenewo.'' ⁵ Ngapano atili kwe woliwo, ''U Mwana wa Munthu a Mfumu yakwe Sabata.'' ⁶ Chachitisile pe Sabata winji kuno ayile mu sinagogi swinya asambilizizye awanthu kulyanye. Kulyanye kwalinji umunthu wina ikasa lyakwe lyalinji alilemale. ⁷ Wakawalika na wa Farisi wamulolechesyanga ukuti walole ndi angapozya wumwi pe Sabata, alyakuti wangazana chimwi ichakuti wamupe umulandu. ⁸ Ukuwa amanyile chino welenganianga nga atili ku monsi wino ikasa lyakwe lyalinji a lilemale, ''Katuka swinya wimilile paa pakasi pa wanthu.'' Achaleka umonsi akatusile swinya ayimilila palyanye. ⁹ Yesu atili kwe woliwo, ''Nenji nkhukolowozya kwe mwemwe, wuzye a lisundo pe Sabata ukuwomba ichiwipe pamwi ichizima, ukupususya uwulanzi pamwi ukuwonona?'' ¹⁰ Ngapano aliwilila ukulola ukuwalola wonsi nga atili ku monsi, ''Yololosya ikasa lyako.'' Ayololosya, nga ikasa lyakwe lyapola. ¹¹ Ukuwa awizula nu kufulwa swinya awavwanzania ivya kuti wamuchite Yesu. ¹² Chichitisile mu mandanye yayo ukuti Yesu ayili kunzi ku lupili mukupepa. Atwalilizile uwusiku wonsi ukupepa kwe Leza. ¹³ Pano kwacha, ayisile awasambilizya kwe weliwe, nga asozile ikumi na wawili, wano ayisile awa positole. ¹⁴ Amita ya wa positole yalinji e Simoni (wino amwisile swinya Peturo) nu munyina wakwe Andireya, Yakobi, Yohani, Filipu, Bateromyu, ¹⁵ Mateyu, Tomasi, Yakobi umwana wakwe Alufeyasi, Simoni wino witwanga uwa Bwangu, ¹⁶ Yudasi umwana wakwe Yakobi, nu Yudasi Ikariyoti, wino ayiza awa mulyalya. ¹⁷ Ngapano Yesu ayika umwamba ponga na woliwo nga ayimilila apayane na pano iwumba ikulu lya wasambilizi wakwe wimilile ni mphendo iyikulu ya wanthu ukufuma mu Yudeya na mu Yerusalemu swinya mu mbali mwe sumbi mu Taya na mu Sidoni. ¹⁸ Awiza ukukwivwa kuli weliwe swinya ukuti wapozwe ku zya ndwala zyawo. Awanthu wano walinji mu machuzi ni mizimu iyinyale nawonye wapozizwe. ¹⁹ Aliwensi mwi wumba watwalilizile ukwelezya ukuti waleme Yesu umulandu amaka ya kupozya yafumanga mwakwe weliwe, nga apozizye wonsinye pyuu. ²⁰ Ngapano alolechesizye pa wasambilizi wakwe nga atili, ''Mwe walotwe mwemwe wano mwe wasaluke, amuno awinu uwufumu wakwe Leza. ²¹ Mwe walotwe mwemwe wano muli ni nzala nomba, amuno muliyizuzwa. Mwe walotwe wano mukulila nomba, amuno muliwa ni nseko. ²² Mwe walotwe mwemwe pano awanthu wakuwapata, swinya pano wakuwalesania swinya wakutuka mwemwe nu kukana izina lyinu ngati liwipe, umulandu wakwe Mwana wa Munthu. ²³ Sechelelani mu wandanye wowo swinya muzewele, umulandu molimonye muliwa ni chisalifyo ichikulu mwiyulu, amuno awa tatakulu wawo wawawombelanga chilichonga awa kasema. ²⁴ Ukuwa akalanda kwe mwemwe wano muli ni chuma, amuno mupochezile kali uwupole. ²⁵ Akalanda kwe mwemwe wano mwikuta nomba, amuno muliwa ni nzala pa nkholelo. Akalanda kwe mwemwe wano muli ni nseko nomba, amuno muliwalosya nu kulila pa nkholelo. ²⁶ Akalanda kwe mwemwe pano awanthu wonsi wakuwavwanjila ivizima vyakwe mwemwe, amuno avino awa tatakulu wawo wachitanga ku wakasema wawufi. ²⁷ ''Ukuwa nenji nkhuvwanga kwe mwemwe wano mukwivwa, muwakunda awalwani winu swinya wombelani ivizima kwe wawo wano wapata mwemwe. ²⁸ Muwalota wawo wano wakutipa mwemwe swinya muwapepa muno wawo wano wakuyimvya mwemwe. ²⁹ Kw weyo wino wakuma ku lusaya longa, mupe swinya nu lunji. Ndi wumwi asenda ichizwalo chako, mulekele ni nu mwenda wakonye. ³⁰ Muwapa kwe aliwensi wino akulenga. Ndi wumwi asenda chimwi chino achako, utakamunene ukuti akunyosezye. ³¹ Ndivino mukalondela awanthu wawawombele, muwawomba wuliwonga kwe woliwo. ³² Ndi mwakunda awanthu wano wakunda mwemwe, achizima chani kwe mwemwe? Amuno na waluwembunye wakakunda wano wakunda woliwo. ³³ Ndi mukuwombela ivizima awanthu wano wakawombela ivizima mwemwe, chingawa wuli achizima kwe mwemwe, amuno na wauwembu wakawomba wuliwonga. ³⁴ Ndi mukwazimya awanthu wano mukuchetekela ukuti walinyosya, achizichi kwe mwemwe? Na waluwembu nawonye wakakwazimyana, ukuti wawanyosezye wuliwonga. ³⁵ Ukuwa muwakunda awalwani winu swinya muwawomba ivizima kwe woliwo. Muyazimye, nanthi akuchetekela ukuti walinyosya, nga ichisalifyo chinu chiliwa achikulu, swinya muliwa awana awakwe Wapapela Nkhaninye, amuno weni umwenecho ali nu wila ku wanthu wano wasisalifya swinya awawipe. ³⁶ Muwe nu wila, ndivino e Tata winu ali nu wila. ³⁷ Mutakti mupingule, nga namwenye mutalipingulwa. Mutakawifye, nga namwenye mutaliwifwa. Mutetele wanji, nga namwenye mulitetelwa. ³⁸ Muwapa, nga chilipwa kwe mwemwe. Ivivule, ivisindile, ivisunkhanie swinya ivifulukile -- vilikunkhumulilwa pa manama yinu. Amuno ni chipimo mukuwomvya, achipimo chochonye chino waliwombela kwe mwemwe.'' ³⁹ Ngapano swinya avwanzile kwe woliwo umulumbe. ''Wuzye inthonkho yingakolela inthonkho iyiwuye? Ndi yingakolela, wonsinye wangaponela mwizonzi, asamwelimo? ⁴⁰ Umusambilizi atanga awe amukulu ukulusya umusambilizya wakwe, ukuwa aliwensi pano wasambilizwa ukufikapo aliwa ngati a musambilizya wakwe. ⁴¹ Wuzye achani fwandi wewe ukulola a kalisote kano kali mwi linso lya munyoko, kweni utakulola ichizinkha chino chili mwilinso lyako? ⁴² Wuzye ungavwanga wuli kwe munyina wako, 'Mwana witu, leka nkhufumye akalisote kano kali mwilinso lyako,' pano wewe wemwenecho utakulola ichizinkha chino chili mwilinso lyako wemwenecho? We wawufi! Talichila ukufumya ichizinkha mwilinso lyako wemwenecho, ngapano ulilola ichete ukuti ufumye akalisote kano kali mwilinso lya munyina wako. ⁴³ Amuno kutawa umuti uwuzima wuno wukaleta ichikomwa ichiwole, nanthi amuti uwuwole wuno wukaleta ichikomwa ichizima. ⁴⁴ Amuno umuti wukamanyikwa nu musango wa chikomwa chino wukaleta. Amuno awanthu wasiwunganika amasuku ukufuma mu muti we pupwe, swinya wasiwunganika inthumbusya ukufuma ku muti wa ponda. ⁴⁵ U munthu umuzima ukufuma ku chuma ichizima cha mu mwenzo wakwe akaleta chino achizima, swinya umunthu umuwipe ukufuma ku chuma ichiwipe cha mu mwenzo wakwe akaleta vino aviwipe. Amuno ukufuma ku vivule vya mu mwenzo umulomo wakwe wukavwanga. ⁴⁶ ''Wuzye achani fwandi mukwita nene, 'Mfumu, Mfumu,' napano musikwivwila ivinthu vino nkhuvwanga? ⁴⁷ Umunthu wensi wino akwiza kwe nene nu kwivwa amazwi yane nu kuvwa, nandi imbanene chino ali ngati. ⁴⁸ Ali ngati a munthu akuzenga ing'anda, wino wimvile pansi nkhani nga azenga ing'anda yakwe pa lufula lwiwe. Pano aminzi yizula, yaliyuma ing'anda kweni nanthi kuyiyingania, umulandu yazengwa ichete. ⁴⁹ Ukuwa umunthu wino akwivwa amazwi yane nga nanthi kwivwila, ali ngati a munthu wino wazenga ing'anda papela pansi nanthi a lufula. Pano aminzi yakwiza nu kuyumizya ku ng'andanye yoyo, paponapapo yikupona, nga ukumongoka kwa ng'andanye yoyo akukulu.''