¹ Nomba chachitisile pano awanthu wamuliwilizizye Yesu swinya wivwanga kwizwi lyakwe Leza, kuno Yesu wimilile mumbali mwe sumbi wa Genesareti. ² Yesu aweni amawato yawili yali mumbali mwe sumbi. Awa kasikula wanswi wafumile mu mawato swinya waswefyanga ivyandaluwa vyawo. ³ Yesu ayinjila mwe wonga wa mawato, wuno walinji awa kwe Simoni, nga amulenga weliwe ukuti asuntchilizye iwato mukasi katichi ukufuma pa mulundu. Ngapano Yesu ayikala pansi nu kusambilizya awanthu ukufuma mu wato. ⁴ Pano Yesu wamala ukuvwanga, atili kwe Simoni, ''Senda iwato uye kuno akwiwile nga uleke ivyandaluwa ukuti uleme inswi.'' ⁵ Simoni atolelela nga ati, ''Bwana, tuwomvile uwusiku wonsi, tutalemile nanthi yimwi inswi, ukuwa pizwi lyako, nandi nisye ivyandaluwa.'' ⁶ Pano wawomvile choo, wizile walema inswi imvule nkhaninye, swinya ivyandaluwa avitalika ukulepuka. ⁷ Achaleka awapunda awanji awawomvi mu mawato ayanji ukuti wize wawavwilizye. Awiza nga wizuzya amawato yonsi, alyakuti amawato yatalika ukuya pansi. ⁸ Ukuwa Simoni Peturo, pano aweni choo, apona pansi pa vimphevu vya Yesu, ati, ''Fumako kwe nene, amuno ne muwembu, Mfumu.'' ⁹ Amuno azungusile, ponga na wonsi wano walinji nawe, panswi zino walemile. ¹⁰ Ponga nu Yakobi nu Yohani, awana awalumendo wakwe Zebediya, wano wawombanga ponga nu Simoni. Yesu atili kwe Simoni, ''Atati watina, umulandu ukufuma nomba uliwalema awanthu.'' ¹¹ Pano wiza na mawato yawo ku mulundu, wasyile vyonsi nu kukonkha Yesu. ¹² Kwiza kwawa ukuti pano alinji mu wonga wa misumba, u monsi uwa mambombo alinji kulyanye. Pano waweni Yesu, izile apona pansi nu kulenga Yesu, atinji, ''Mfumu, ndi ukulonda, unganswefya nene.'' ¹³ Ngapano Yesu ayololosya ikasa lyakwe nu kumupalamansya, atinji, ''Nenji nkhulonda. Swepa.'' Paponapapo amambombo yamusyile weliwe. ¹⁴ Yesu amunenile ukuti atakamunene nanthi wu kumwi kweni amunenile ukuti apite, swinya ayilanjizye kwe simapepo nga ape inzuwi ku kuswefwa kwakwe, ukuyana ne vino Mose apinguzile, ukuti wuwe wukamboni kwe woliwo. ¹⁵ Ukuwa ilyasi ilya wamambombo alisata ukuya ukutali, swinya amawumba makulu ya wanthu ayiza apaliponga ukuti yivwe Yesu akusambilizya swinya ukuti wapozwe ku zyandwala zyawo. ¹⁶ Ukuwa Yesu ayanga penye ku masyo ayamyalale nga apepa. ¹⁷ Kwiza kwawa pa wonda wonga wa manda yayo yano Yesu wasambilizyanga, swinya palinji awa Farisi na wasambilizya wa masundo wikazile palyanye wano wafumile mu twaya tonsi twa Galileya nu Yudeya nu kufuma mu Yerusalemu. Amaka yakwe Mfumu yalinji nu Yesu ukuti apozye. ¹⁸ Nomba awanthu wamwi wanyamuzile umunthu wumwi pa chitanda wino alinji a mulemale, swinya wavwambanga inzila iya kuti wangaleta weliwe mukasi alyakuti wamulambalike paminso ya Yesu. ¹⁹ Watazanile inzila nanthi yimwi iyakuti wanga muleta mukasi umulandu wi wumba, achaleka wayile pamusonje nga wamwisya pansi ukupiila mwisote, pa chitanda chakwe, ukuya muwanthu, paminso ya Yesu apenecho. ²⁰ Ukulola isuwilo lyawo, Yesu atili, ''Monsi, amawembu yako yatetelwa kwe wewe.'' ²¹ A wakawalika na wa Farisi awatalika ukukolowozya choo, watinji, ''Wuzye weweni wee wino akuvwanga ivya musamu? Wuzye weweni angatetela amawembu kweni Leza wenganye?'' ²² Ukuwa Yesu, lyo wamanya chino welenganianga, atolelela nga atili kwe woliwo, ''Wuzye achani chino mukukolowozya choo mu myenzo yinu? ²³ Wuzye achani chino achipepuke akuvwanga, 'Amawembu yinu yatetelwa kwe mwemwe' pamwi ukutu, 'Katuka swinya uwapita'? ²⁴ Lelo ukuti mumanye kuno u Mwana wa Munthu ali namaka munsi ya pansi ukutetela amawembu,''-- Yesu atili ku mulemale--''Nenji nkhukunena, katuka, nyamula ichitanda chako nga uye ku ng'anda yako.'' ²⁵ Paponapapo akatuka paminso ya woliwo nga anyamula ichitanda chino walazile penepo. Ngapano ayile ku ng'anda yakwe, akutumvya Leza. ²⁶ Aliwensi wazungusile swinya watumvizye Leza. Awizula ni nthete, watinji, ''Tuweni ivinthu ivizungusyo uwanda wilelo.'' ²⁷ Lyo ivinthu vyoo vyachitika, Yesu ayile kunzi ukufuma mulyanye nga aweni e kasonkhesya wansonkho izina lyakwe Levi wikazile mukatutu ka kasonkhesya wansonkho. Yesu atili kwe weliwe, ''Ukunkhe nene.'' ²⁸ Achaleka Levi ayimilila nu kukonkha Yesu, asya vyonsi kwisinda. ²⁹ Ngapano Levi apile Yesu ichakulya chakuzewela mu ng'anda yakwe. Kwalinji awasonkhesya wansonkho awavule kulyanye na wanthu wanji wano wikazile pa tebulo swinya Yesu alyanga na woliwo. ³⁰ Ukuwa awa Farisi na wakawalika wawo awayilizania kuwasambilizi wakwe, watinji, ''Wuzye achani fwandi chino ukulya swinya ukung'wa na wasonkhesya wansonkho na wawembu?'' ³¹ Yesu atolelela kwe woliwo, ''Awanthu wano awazima wasilonda ing'anga; kandi wawo wano awalwale. ³² Nenji nthiza ukwita awalungamane, kweni awawembu ukuti watontholokwe.'' ³³ Awatili kwe weliwe, ''Awasambilizi wakwe Yohani wakafunga nu kupepepa penye, na wasambilizi wa wa Farisi nawonye wakawomba chilichonga. Ukuwa awasambilizi wako wakulya swinya wakung'wa.'' ³⁴ Yesu atili kwe woliwo, ''Wuzye pali wumwi wino angaleka awasindisi wa siwinga wafunge pano e siwinga achili ali pakasi pa woliwo? ³⁵ Lelo amanda yaliyiza pano e siwinga alisendwa ukufuma kwe woliwo, apano mu mandanye yayo walifunga.'' ³⁶ Ngapano Yesu avwanzile swinya kwe woliwo mu mulumbe. ''Pasi nanthi wumwi wino akasenda ichigamba pa chizwalo ichipya nukuwika pa chizwalo ichakali. Ndi awomba chocho, alinyepula ichizwalo ichipya, swinya ichigamba cha kufuma pa chizwalo ichipya chitanga chiyanane nu mwenda wa chizwalo ichakali. ³⁷ Nanthi wumwi akawika ipala lya nomba mwikwela ilya kali. Ndi wawomba chocho, ipala lya nomba lingapunsya amakwela, swinya ipala lingasata, nga ichakusendela chingoliyononeka. ³⁸ Ukuwa ipala lya nomba lifwile liwikwe mwikwela ilipya. ³⁹ Nanthi wonga lyo ang'wa ipala lya kali akalonda ilya nomba, amuno akati, 'Ilya kali lyazipa.''