¹ Apano Yesu, umwizule nu Muzimu Mutele, anyoka ukufuma ku luzi lwa Yorodani nga akolezwa nu Muzimu mu lupalang'ang'a, ² kuno pa manda amakumi yani weni welezizwe nu muwipe. Weni atalile nanthi chimwi mu manda yayonye, nga pa wumalilo wa mphindinye yoyo ayivwa. ³ Umuwipe atili kwe weliwe, ''Ndi we Mwana wakwe Leza, lilamule iwe lyoo liwe a mukate.'' ⁴ Yesu amutolelela, ''Chawalikwa, 'Umunthu atanga awe nu wumi nu mukate wutupu.''' ⁵ Ngapano umuwipe akolela Yesu papela nu kulanjizya weliwe yonsi ama wufumu ya munsi pa mphindi inthichivyenye. ⁶ Umuwipe atili kwe weliwe, ''Nenji ndipa kwakwe wewe yonsi amaka yaa swinya wonsi uwuchindame wawo, amuno vyapewa kwe nene, swinya ningapa vyenevyo aliwensi wino nkhulonda. ⁷ Ngapano, ndi ungafukama pansi nu kumphepa nene, vyandi viwe avyako.'' ⁸ Ukuwa Yesu atolelela nu kuti kwe weliwe, ''Chawalikwa, ''Ulipepa i Mfumu e Leza wako, swinya mulitewetela wenganye.''' ⁹ Apano u muwipe akolela Yesu ukuya mu Yerusalemu nu kumuwika papela nkhani pa ng'anda ya tempeli, nga atili kwe weliwe, ''Ndi we Mwana wakwe Leza, yisumbe wemwenecho pansi ukufuma paa. ¹⁰ Amuno chawalikwa, ''Weni alilamula awangelo wakwe ku vyakwe wewe, ukukupususya,' ¹¹ swinya, 'Walikunyamula mupela na makasa yawo, alyakuti utize upunule itamba lyako pa liwe.'' ¹² Pakutolelela weliwe, Yesu atili, ''Chavwangwa, 'Utakayiwike i Mfumu e Leza wako mu melezyo.'''' ¹³ Pano umuwipe wamala ukwelezya Yesu, weni afumapo nu kumuleka mpaka pa mphindi yinji. ¹⁴ Apano Yesu wanyochela ku Galileya mu maka ya Muzimu, swinya ilandwe lyakwe alisata konsi ukuliwilizya ichiputula chonsi. ¹⁵ Ngapano weni atalika ukusambizya mu ma sinagogi yawo swinya weni watumvizwe na wonsi. ¹⁶ Weni ayiza ku Nazareti, kuno wikalanga nu kukulila, nga, ndivino imiteto yakwe, ayinjila mu sinagogi pa wanda wa Sabata nga ayimilila ukuti awazye umwakupundilila. ¹⁷ E kalata wa mutumwa Yesaya yapilwe kwe weliwe. Weni ayiyula e kalata nu kuzana amasyo pano chawalikwa, ^{18 19} ''U Muzimu wa Mfumu wuli pakwe nene, umulandu weni apasile nene ukuti indande ilandwe zima ku wasaluke. Weni anthuma nene ukuwizya uwunthungwa ku wanyepwa sinya ukunyosya ukulola ku nthonkho, ukusapula wawo wano wakutitichizwa, ¹⁹ ukuwizya umwaka wakulondelekwa kwakwe Mfumu.'' ²⁰ Ngapano avunga e kalata, anyosya kwe kayamwite, nu kwikala pansi. Aminso ya wonsi wano walinji mu sinagogi yatonthomezile pakwe weliwe. ²¹ Weni atalika ukuvwanga kwe woliwo, ''Ilelo amawaliko yaa yafiswa mu kwivwa kwinu.'' ²² Aliwensi palyanye avwanzile ivizima vyakwe weliwe swinya awazunguka pa nkhumbu mu mazwi yano yafumanga mu mulomo wakwe, nga awawuzichizya, ''Wuzye wee asa mwana wakwe Yosefe?'' ²³ Atili kwe woliwo, ''Nakawuzyenye muli nena umulumbe woo kwe nne, 'Ng'anga, yipozye wenga. Chilichonsi twivwile chino wawomvile mu Kapenamu, womba chilichonga kumwinyu.''' ²⁴ Kweni weni atili, ''Nakawuzyenye nenji nkhuvwanga kwe mwemwe, pasi nanthi a mutumwa wino akapochelelwa kumwawo. ²⁵ Ukuwa mu chisinkha nkhuwanena ukuti kwalinji awavule awanachi awafwilwe mu Izirayeli mu mphindi ya Eliya, pano kupela kwiyalizilwe imyaka yitatu ni myezi mutanda swinya inzala iyikulu ayiza munsi yonsi. ²⁶ Kweni Eliya atatumilwe nanthi kwakwe wenga wa woliwo, kwenivye ku Zarepati mu Sidoni, ku mwanachi umufwilwe wino wikalanga kulyanye. ²⁷ Kwalinji awavule awa mambombo mu Izirayeli mu mphindi ya Elisha umutumwa, ukuwa nanthi uwa woliwo wapozizwe ukufumyako Namani wa ku Siriya.'' ²⁸ Wonsi awanthu mu sinagogi wizwile nu kufulwa pano wivwile ivinthu vyoo. ²⁹ Awakatuka, nukupatichizya weliwe afume mu musumba, nu kumukolela pamutwe wa mwamba wuno umusumba wawo wazengwa, alyakuti wangasumba weliwe ukufuma pa mutwe. ³⁰ Ukuwa weni achilingania pakasi pakwe woliwo nu kuya ku masyo yanji. ³¹ Apano weni aya ku Kapenamu, umusumba mu Galileya, nga atalika ukusambilizya woliwo pa Sabata. ³² Awazunguka ni misambilizizye yakwe, umulandu weni avwanganga na maka. ³³ Nomba mu sinagogi mwalinji umunthu wino walinji nu muzimu wa dimoni iyinyale, nga apunda nizwi ikulu, ³⁴ ''Iye! Achani chino tungawomba na wewe, Yesu wa ku Nazareti? Wuzye wiza ukuti utonone sweswe? Nenji nkhumanyile -- u Mutele wakwe Leza!'' ³⁵ Yesu akalipila i dimoni, ati, ''Utakalande! Fumamo mwakwe weliwe!'' Pano i dimoni yasumvile umunthu pansi pakasi pakwe woliwo, afumamo mwakwe weliwe, swinya nanthi kumuchisa mu nzila yiliyonsi. ³⁶ Awanthu wonsi awazunguka, swinya awapitilila ukuvwanga vilyanye wenga nu muwuye. Awati, ''Wuzye amazwichi yaa? Weni akulamula imizimu iyinyale nu wulamulilo na maka swinya yikufuma.'' ³⁷ Achaleka ilandwe ilya weliwe lyatalika ukusata ukuya imbali zyonsi zya kuliwilizya ichiputulwa. ³⁸ Ngapano Yesu afuma mu sinagogi nu kwinjila mu ng'anda yakwe Simoni. Nomba e nyinavyala wakwe Simoni walwile inzekema, nga awamupepelezya umulandu wakwe nyinavyala. ³⁹ Achaleka Yesu wimilile papipi nawe nu kukalipila inzekema, nga yamusya. Paponapapo akatuka nu kutalika ukuwapyunjila. ⁴⁰ Pano ilanzi lyalinji nu kwinjila, awanthu awaleta aliwensi wino walinji amulwale ni ndwala zya misango iyivule iyilekane. Weni alambalika ikasa lyakwe pa aliwensi mwakwe woliwo nu kuwapozya. ⁴¹ Na madimoni nayonye ayafuma mu wavule wakwe woliwo, yakupunda nu kuti, ''Wewe we Mwana wakwe Leza!'' Yesu akalipila ama dimoni swinya ayilesya ukuvwanga, umulandu yamanyile kuno weni walinji we Kristu. ⁴² Pano kwacha, weni aya ku masyo aya wenga. Amawumba ya wanthu yamulondanga nga ayiza ku masyo yano weni walinjiko. Awelezya ukumulesya ukuti atakufume kwe woliwo. ⁴³ Ukuwa weni atili kwe woliwo, 'Nenji mfwilenye indumbilile ilandwe zima ilya wufumu wakwe Leza ku misumba yinji iyivule, amuno woo awuli mulandu natumwa koo.'' ⁴⁴ Ngapano apitilizya ukulumbilila mu ma sinagogi monsi mu Yudeya.